കൊച്ചി: മുണ്ടക്കൈ-ചൂരല്‍മല ഉരുള്‍പൊട്ടല്‍ ദുരന്തബാധിതരുടെ വായ്പ എഴുതിത്തള്ളില്ലെന്ന് കേന്ദ്രസര്‍ക്കാര്‍ ഹൈക്കോടതിയില്‍ അറിയിച്ചു. വായ്പയ്ക്ക് ഒരു വര്‍ഷത്തെ മോറട്ടോറിയം പ്രഖ്യാപിക്കുമെന്നും തിരിച്ചടവ് പുനഃക്രമീകരിക്കുമെന്നും കേന്ദ്രസര്‍ക്കാര്‍ ഹൈക്കോടതിയില്‍ വ്യക്തമാക്കി.

അതേസമയം, കേന്ദ്രസര്‍ക്കാര്‍ നിലപാടില്‍ ഹൈക്കോടതി അതൃപ്തി അറിയിച്ചു. മൊറട്ടോറിയം പോരെന്ന് പറഞ്ഞ കോടതി വായ്പ എഴുതിത്തള്ളുന്നത് പരിഗണിക്കണമെന്നും കേന്ദ്രത്തോട് ആവശ്യപ്പെട്ടു. ഇക്കാര്യത്തില്‍ സത്യവാങ്മൂലം സമര്‍പ്പിക്കാനും കോടതി നിര്‍ദ്ദേശിച്ചു. ദുരിതബാധിതര്‍ക്ക് ബാങ്ക് ഓഫ് ബറോഡ നല്‍കിയ നോട്ടിസ് പിന്‍വലിച്ചുവെന്നും കേന്ദ്രം ഹൈക്കോടതിയില്‍ അറിയിച്ചു. ഒരു വര്‍ഷം മൊറട്ടോറിയം ശുപാര്‍ശ ബാങ്കേഴ്‌സ് സമിതി നല്‍കിയിട്ടുണ്ടെന്നാണ് കേന്ദ്രം അറിയിച്ചത്. ഒരു വര്‍ഷത്തിനു ശേഷം തിരിച്ചടവ് ആരംഭിച്ചാല്‍ മതിയെന്നാണ് നിര്‍ദ്ദേശം.

മുണ്ടക്കൈ-ചൂരല്‍മല പുനരധിവാസത്തിനായി കേന്ദ്ര ഫണ്ട് വിവിധ വകുപ്പുകളുടെ അക്കൗണ്ടുകളിലേക്ക് നേരിട്ട് എത്തും. സംസ്ഥാന ധനവകുപ്പ് യൂട്ടിലൈസേഷന്‍ സര്‍ട്ടിഫിക്കറ്റ് കേന്ദ്രത്തിന് നല്‍കണം. 

ഫണ്ട് വിനിയോഗ കാലാവധിയിലും കേന്ദ്രം വ്യക്തത വരുത്തി. പുനരധിവാസത്തില്‍ സംസ്ഥാനത്തിന്റെ ഫണ്ട് വിനിയോഗ കാലാവധി കേന്ദ്ര സര്‍ക്കാര്‍ നീട്ടിയിരുന്നു. ഈ വര്‍ഷം ഡിസംബര്‍ 31 വരെ ഉപാധികളോടെയാണ് കേന്ദ്രം കാലാവധി നീട്ടിയിരുന്നത്.