ഗസ്സ സിറ്റി: ഗസ്സയില്‍ കരയാക്രമണം കൂടുതല്‍ ശക്തമാക്കി ഇസ്‌റാഈല്‍. ഇന്ന് പുലര്‍ച്ചെ മുതല്‍ നടത്തിയ ആക്രമണങ്ങളില്‍ മാത്രം 40ലേറെ പേരാണ് കൊല്ലപ്പെട്ടതെന്നും റിപ്പോര്‍ട്ടുകളില്‍ പറയുന്നു. വെടിനിര്‍ത്തല്‍ കാലാവധി കഴിഞ്ഞ ശേഷം ഇസ്‌റാഈല്‍ നടത്തിയ ആക്രമണങ്ങളില്‍ 1042 പേര്‍ കൊല്ലപ്പെട്ടതായാണ് ഔദ്യോഗിക കണക്കുകള്‍. വേള്‍ഡ് ഫുഡ് പ്രോഗ്രാമിന്റേതടക്കം 25 ബേക്കറികളാണ് ഇസ്‌റാഈല്‍ ഉപരോധം മൂലം അടച്ചു പൂട്ടിയിരിക്കുന്നത്. 

കഴിഞ്ഞ ദിവസം ഗസ്സ നഗരത്തിലെ റഫയില്‍ ഇസ്റാഈല്‍ സൈന്യം 15 സന്നദ്ധ പ്രവര്‍ത്തകരെ കൊന്ന് കുഴിച്ചുമൂടിയതായി കണ്ടെത്തിയിരുന്നു. റെഡ് ക്രസന്റ്, ഫലസ്തീന്‍ സിവില്‍ ഡിഫന്‍സ്, ഐക്യരാഷ്ട്ര സഭ എന്നിവിടങ്ങളില്‍ നിന്നുള്ള ഉദ്യോഗസ്ഥരെയാണ് കൊലപ്പെടുത്തിയത്. സന്നദ്ധപ്രവര്‍ത്തകര്‍ ഉപയോഗിച്ചിരുന്നതായി കരുതുന്ന ആംബുലന്‍സുകള്‍ ഉള്‍പ്പെടെയാണ് സൈന്യം കുഴികുത്തി മൂടിയത്. ബുള്‍ഡോസര്‍ ഉപയോഗിച്ച് വെട്ടിയ കുഴിയില്‍ നിന്നാണ് രക്ഷാപ്രവര്‍ത്തകരെ യു.എന്‍ അധികൃതര്‍ കണ്ടെത്തിയത്.

രക്ഷാപ്രവര്‍ത്തകരില്‍ ഓരോരുത്തരെയും സൈന്യം വെടിവച്ച് കൊലപ്പെടുത്തുകയായിരുന്നുവെന്ന് യു.എന്‍ മാനവികകാര്യ ഓഫിസ് മേധാവി ജോനാഥന്‍ വിറ്റാല്‍ പറഞ്ഞു. എട്ട് റെഡ് ക്രസന്റ് ഉദ്യോഗസ്ഥരുടെയും ആറ് സിവില്‍ ഡിഫന്‍സ്, ഒരു യു.എന്‍ ഉദ്യോഗസ്ഥരുടെയും മൃതദേഹങ്ങളാണ് റഫയില്‍ നിന്ന് കണ്ടെത്തിയത്.മാര്‍ച്ച് 23ന് പുലര്‍ച്ചെ തെക്കന്‍ ഗസ്സയിലെ റഫയില്‍ ടെല്‍ അല്‍ സുല്‍ത്താനില്‍ നിരവധി പേരുടെ മരണത്തിന് കാരണമായ വ്യോമാക്രമണം നടന്നിരുന്നു. ഇതില്‍ പരുക്കേറ്റവരെ രക്ഷിക്കാനെത്തിയ രക്ഷാപ്രവര്‍ത്തകര്‍ക്ക് നേരെയാണ് സയണിസ്റ്റ് സേനയുടെ വെടിവയ്പുണ്ടായത്. വിവരം അറിഞ്ഞെത്തിയ രണ്ടാമത്തെ സന്നദ്ധപ്രവര്‍ത്തകരുടെ സംഘമാണ് ആദ്യസംഘത്തെ കൊന്ന് കുഴിച്ചുമൂടിയതായി കണ്ടെത്തിയത്.

Israel has escalated its ground offensive in Gaza, resulting in over 40 deaths in the latest attacks. Since the ceasefire ended, official reports confirm 1,042 fatalities. The blockade has also forced the closure of 25 bakeries, including those operated by the World Food Programme.