സ്പാനിഷ് വമ്പൻമാരായ ബാഴ്സലോണയിൽ എത്തിയ സമയത്തുണ്ടായിരുന്ന തന്റെ അനുഭവങ്ങളെക്കുറിച്ച് പങ്കുവെച്ചിരിക്കുകയാണ് സ്പാനിഷ് യുവതാരം പെഡ്രി. ബാഴ്സയിൽ എത്തിയ ആദ്യ നാളുകളിൽ ലയണൽ മെസി, സെർജിയോ ബുസ്ക്വറ്റ്സ്, ജെറാഡ് പിക്വ എന്നീ താരങ്ങളെ കണ്ടപ്പോൾ ഉള്ള അനുഭവത്തെക്കുറിച്ച് ആയിരുന്നു പെഡ്രി സംസാരിച്ചത്. ഈ ഇതിഹാസതാരങ്ങളെ ആദ്യം കണ്ടപ്പോൾ തനിക്ക് ഭയമാണ് ഉണ്ടായതെന്നാണ് പെഡ്രി പറഞ്ഞത്. സ്പാനിഷ് മാധ്യമമായ എൽ പെയ്സിന് നൽകിയ അഭിമുഖത്തിൽ സംസാരിക്കുകയായിരുന്നു പെഡ്രി. 

"ലാസ് പാൽമാസിൽ നിന്നും ബാഴ്സലോണയിലേക്ക് പോയപ്പോൾ ഞാൻ അത്ഭുതപ്പെട്ടിരുന്നു. ലിയോ, ബുസ്ക്വറ്റ്സ്, പിക്വ എന്നിവർ ആ സമയങ്ങൾ ഉണ്ടായിരുന്നു ഞാൻ അവരെ ആദ്യമായി നേരിട്ട് കാണാൻ തുടങ്ങിയപ്പോൾ എനിക്ക് ഭയമാണ് ഉണ്ടായിരുന്നത്" പെഡ്രി പറഞ്ഞു.

പെഡ്രി പാൽമാസിൽ നിന്നുമാണ് ബാഴ്സലോണയുടെ തട്ടകത്തിലെത്തുന്നത്. സ്പാനിഷ് വമ്പന്മാർക്ക് വേണ്ടി ഇതിനോടകം തന്നെ 189 മത്സരങ്ങളിൽ കളത്തിൽ ഇറങ്ങിയ സ്പാനിഷ് താരം 25 ഗോളുകളും 20 അസിസ്റ്റുകളും ആണ് സ്വന്തമാക്കിയിട്ടുള്ളത്. ഈ സീസണിൽ ഹാൻസി ഫ്ലിക്കിന്റെ കീഴിലും ബാഴ്സലോണയുടെ ഇലവനിലെ സ്ഥിര സാന്നിധ്യമാണ് പെഡ്രി. ഈ സീസണിൽ 46 മത്സരങ്ങളിൽ നിന്നും അഞ്ച് ഗോളുകളും ഏഴ് അസിസ്റ്റുകളും ആണ് താരം സ്വന്തമാക്കിയിട്ടുള്ളത്. 

ഈ സീസണിൽ മിന്നും ഫോമിലാണ് ബാഴ്സലോണ കളിച്ചുകൊണ്ടിരിക്കുന്നത്. നിലവിൽ സ്പാനിഷ് ലീഗിൽ ഒന്നാം സ്ഥാനത്താണ് ബാഴ്സലോണ. 30 മത്സരങ്ങളിൽ നിന്നും 21 വിജയവും നാല് സമനിലയും അഞ്ച് തോൽവിയും അടക്കം 67 പോയിന്റാണ് ബാഴ്സക്കുള്ളത്. ചാമ്പ്യൻസ് ലീഗിലും മികച്ച മുന്നേറ്റമാണ്‌ ഹാൻസി ഫ്ലിക്കും സംഘവും കാഴ്ചവെക്കുന്നത്. ക്വാർട്ടർ ഫൈനലിൽ ജർമൻ ക്ലബ്‌ ബൊറൂസിയ ഡോർട്മുണ്ടാണ് ബാഴ്‌സയുടെ എതിരാളികൾ. ഏപ്രിൽ പത്തിനാണ് ആദ്യ ലെഗ്ഗ് നടക്കുന്നത്. രണ്ടാം ലെഗ്ഗ് ഏപ്രിൽ പതിനാറിനും നടക്കും.

Spanish player Pedri talks about his experience meeting Lionel Messi, Sergio Busquets and Gerard Pique when he arrived at Barcelona