ന്യൂഡല്‍ഹി: ഓപ്പറേഷന്‍ സിന്ദൂറിന്റെ ഭാഗമായി ഇന്ത്യ നടത്തിയ വ്യോമാക്രമണത്തില്‍ 100 ഭീകരര്‍ കൊല്ലപ്പെട്ടതായി സ്ഥിരീകരണം.  ഇന്ന് ചേര്‍ന്ന സര്‍വ്വകക്ഷി യോഗത്തിലാണ് പ്രതിരോധ മന്ത്രി രാജ്‌നാഥ് സിങാണ് കണക്ക് പുറത്തുവിട്ടത്. ഇന്ത്യ പ്രകോപനത്തിനോ യുദ്ധത്തിനോ തയ്യാറല്ല എന്നാൽ പാകിസ്താൻ ആക്രമണം തുടർന്നാൽ ഇന്ത്യ തിരിച്ചടിക്കുമെന്ന് സർവകക്ഷി യോഗത്തിൽ കേന്ദ്രം വ്യക്തമാക്കി.

ഓപ്പറേഷന്‍ സിന്ദുറിലൂടെ പാകിസ്ഥാന് ശക്തമായ തിരിച്ചടി നല്‍കിയതിന് പിന്നാലെയാണ് കേന്ദ്രസര്‍ക്കാര്‍ സര്‍വ്വകക്ഷി യോഗം വിളിച്ചത്. പ്രധാനമന്ത്രി നരേന്ദ്രമോദിയുടെ അസാന്നിധ്യത്തിലായിരുന്നു യോഗം ചേര്‍ന്നത്. രാജ്‌നാഥ് സിങിന് പുറമെ, ആഭ്യന്തര മന്ത്രി അമിത് ഷാ,ലോക്‌സഭ പ്രതിപക്ഷ നേതാവ് രാഹുല്‍ ഗാന്ധി എന്നിവരും യോഗത്തില്‍ പങ്കെടുത്തു. അതേസമയം ഓപ്പറേഷന്‍ സിന്ദൂരിന് പൂര്‍ണ പിന്തുണയെന്ന് സര്‍വ്വകക്ഷി യോഗത്തില്‍ കോണ്‍ഗ്രസ് അറിയിച്ചു. 

ജമ്മുകശ്മിരിലെ പഹല്‍ഗാമില്‍ കുടുംബത്തോടൊപ്പമെത്തിയ വിനോദ സഞ്ചാരികളെ ഏപ്രില്‍ 22നു കൂട്ടക്കൊലചെയ്ത ഭീകരര്‍ക്ക് കൃത്യം പതിനഞ്ചാം ദിവസം തന്നെ ഇന്ത്യ അതിശക്ത തിരിച്ചടി നല്‍കിയിരുന്നു. ഭീകരാക്രമണത്തിന് ഇന്ത്യൻ സായുധ സേന നൽകിയ ശക്തമായ തിരിച്ചടിയാണ് ‘ഓപ്പറേഷൻ സിന്ദൂർ’. പ്രധാനമന്ത്രി നരേന്ദ്ര മോദി പേര് നൽകിയ ഈ സർജിക്കൽ സ്‌ട്രൈക്ക്, ഭീകരവാദത്തിനെതിരായ രാജ്യത്തിന്റെ നിലപാടിന്റെ പ്രതീകമായി മാറി.