ഐപിഎല്ലിൽ ആദ്യ അഞ്ചു മത്സരങ്ങൾ പിന്നിട്ടപ്പോൾ രണ്ട് ജയവും മൂന്ന് തോൽവിയുമാണ് സഞ്ജു സാംസണിന്റെ രാജസ്ഥാൻ റോയൽസിനുള്ളത്. അവസാന മത്സരത്തിൽ രാജസ്ഥാൻ ഗുജറാത്ത് ടൈറ്റൻസിനോട് പരാജയപ്പെട്ടിരുന്നു. ഇപ്പോൾ രാജസ്ഥാന്റെ ഈ മോശം പ്രകടനങ്ങളെക്കുറിച്ച് സംസാരിക്കുകയാണ് മുൻ ഇന്ത്യൻ താരം റോബിൻ ഉത്തപ്പ. 

''ലേലത്തിൽ രാജസ്ഥാന് പിഴച്ചത് ആ കാര്യങ്ങളിലാണ്. ജോസ് ബട്ലർ, അശ്വിൻ, യുസി ചഹാൽ എന്നിവരെ അവർ നിലനിർത്താത്തത് വളരെയധികം പ്രശ്നങ്ങൾ സൃഷ്ടിച്ചുവെന്നാണ് എനിക്ക് തോന്നുന്നത്. ഇപ്പോഴുള്ള ടീമിൽ ഷിർമോൺ ഹെറ്റ്മെയറിന് പരുക്ക് സംഭവിച്ചാൽ അവർക്ക് അദ്ദേഹത്തിന്റെ പകരക്കാരനെ കണ്ടെത്താൻ സാധിക്കില്ല'' റോബിൻ ഉത്തപ്പ സ്റ്റാർ സ്പോർട്സിലൂടെ പറഞ്ഞു. 

അവസാന മത്സരത്തിൽ രാജസ്ഥാനെ 58 റൺസിനാണ് ഗുജറാത്ത് ടൈറ്റൻസ് തകർത്തു വിട്ടത്. ഗുജറാത്തിന്റെ തട്ടകത്തിൽ നടന്ന മത്സരത്തിൽ ടോസ് നേടിയ രാജസ്ഥാൻ റോയൽസ് ബൗളിങ് തെരഞ്ഞെടുക്കുകയായിരുന്നു. ആദ്യം ബാറ്റ് ചെയ്ത ഗുജറാത്ത് 20 ഓവറിൽ ആറു വിക്കറ്റ് നഷ്ടത്തിൽ 217 റൺസാണ് അടിച്ചെടുത്തത്. വിജയലക്ഷ്യം പിന്തുടർന്നിറങ്ങിയ രാജസ്ഥാൻ 19.2 ഓവറിൽ 159 റൺസിന് പുറത്താവുകയായിരുന്നു.

രാജസ്ഥാൻ നിരയിൽ ഷിർമോൺ ഹെറ്റ്മെയർ അർദ്ധ സെഞ്ച്വറി നേടി. 32 പന്തിൽ നാല് ഫോറുകളും മൂന്ന് സിക്സുകളും ഉൾപ്പെടെ 52 റൺസായിരുന്നു താരം നേടിയത്. 28 പന്തിൽ 41 റൺസ് നേടി സഞ്ജുവും 14 പന്തിൽ 26 റൺസ് നേടി റിയാൻ പരാഗും മികച്ച ചെറുത്തുനിൽപ്പ് നടത്തി. 

മത്സരത്തിൽ ഗുജറാത്തിനു വേണ്ടി പ്രസിദ് കൃഷ്ണ മൂന്ന് വിക്കറ്റുകളും റാഷിദ് ഖാൻ, സായ് കിഷോർ എന്നിവർ രണ്ട് വീതം വിക്കറ്റുകളും നേടി മിന്നും പ്രകടനം നടത്തിയപ്പോൾ രാജസ്ഥാൻ ബാറ്റിംഗ് നിര തകരുകയായിരുന്നു. കുൽവന്ദ് കെജ്രോലിയ, മുഹമ്മദ്‌ സിറാജ്, അർഷദ് ഖാൻ എന്നിവർ ഓരോ വീതം വിക്കറ്റുകളും നേടി. 

ഏപ്രിൽ 13ന് റോയൽ ചലഞ്ചേഴ്‌സ് ബെംഗളൂരുവിനെതിരെയാണ് രാജസ്ഥാന്റെ അടുത്ത മത്സരം. റോയൽസിന്റെ തട്ടകമായ ജയ്‌പൂരിലെ സവായ് മാൻസിങ് സ്റ്റേഡിയമാണ്‌ വേദി. ഈ മത്സരത്തിൽ സഞ്ജുവും സംഘവും ശക്തമായി തിരിച്ചുവരുമെന്ന് തന്നെയാണ് ആരാധകർ പ്രതീക്ഷിക്കുന്നത്.

Former Indian player Robin Uthappa speaks out about Rajasthan Royals' poor performance in the IPL