രാജസ്ഥാൻ റോയൽസ് ക്യാപ്റ്റൻ സഞ്ജു സാംസണും ഇംഗ്ലണ്ട് താരം ജോസ് ബട്ലറും തമ്മിലുള്ള സൗഹൃദത്തെക്കുറിച്ച് സംസാരിക്കുകയാണ് മുൻ ഓസ്‌ട്രേലിയൻ താരം ഷെയ്ൻ വാട്സൺ. സഞ്ജുവും ബട്ലറും തമ്മിലുള്ള ബന്ധം രാജസ്ഥാൻ ടീമിൽ വലിയ lസ്വാധീനമുണ്ടാക്കിയിരുന്നുവെന്നാണ് മുൻ ഓസീസ് താരം പറഞ്ഞത്. സ്റ്റാർ സ്പോർട്സിന് നൽകിയ അഭിമുഖത്തിലാണ് വാട്സൺ ഇക്കാര്യം പറഞ്ഞത്. 

''ജോസ് ബട്ലറുമായുള്ള സഞ്ജുവിന്റെ ബന്ധം ടീമിന് അകത്തും പുറത്തുമായി വലിയ മാറ്റങ്ങൾ ഉണ്ടാക്കി. ക്രിക്കറ്റിലെ അവരുടെ പ്രകടനത്തിൽ മാത്രമല്ല കളിക്കളത്തിൽ മറ്റ് പല ഘടകങ്ങൾക്കും ഇത് വളരെയധികം സഹായിക്കുന്നുണ്ട്. എന്നിട്ടും രാജസ്ഥാൻ റോയൽസ് അദ്ദേഹത്തെ നിലനിർത്താത്തത് എന്നെ ഇപ്പോഴും അത്ഭുതപ്പെടുത്തുന്നുണ്ട്'' ഷെയ്ൻ വാട്സൺ പറഞ്ഞു. 

2025 ഐപിഎല്ലിൽ  ബട്ലറിനെ രാജസ്ഥാൻ റോയൽസ് നിലനിർത്താതെ പോവുകയായിരുന്നു. ടീമിന്റെ പല വിജയത്തിലും ശ്രദ്ധേയമായ പ്രകടനങ്ങൾ നടത്തിയ ബട്ലറിനെപ്പോലൊരു താരത്തെ രാജസ്ഥാൻ നിലനിർത്താത്തത് ആരാധകർക്കിടയിൽ വലിയ ഞെട്ടലാണ് ഉണ്ടാക്കിയിരുന്നത്.

രാജസ്ഥാൻ റോയൽസിന് വേണ്ടി 83 മത്സരങ്ങളിൽ നിന്നും 3055 റൺസാണ് ഇംഗ്ലണ്ട് താരം അടിച്ചെടുത്തത്. മെഗാ ലേലത്തിൽ ഗുജറാത്ത് ടൈറ്റൻസ് 15.75 കോടി രൂപക്കാണ് ബട്ലറിനെ സ്വന്തമാക്കിയത്. സഞ്ജു സാംസൺ, റിയാൻ പരാഗ്, ധ്രുവ് ജുറൽ, ഷിംറോൺ ഹെറ്റ്മെയർ, സന്ദീപ് ശർമ എന്നിവരെയായിരുന്നു രാജസ്ഥാൻ നിലനിർത്തിയിരുന്നത്.

ഐപിഎല്ലിൽ ആദ്യ അഞ്ചു മത്സരങ്ങൾ പിന്നിട്ടപ്പോൾ രണ്ട് ജയവും മൂന്ന് തോൽവിയുമാണ് രാജസ്ഥാൻ റോയൽസിനുള്ളത്. നാല് പോയിന്റുമായി ഏഴാം സ്ഥാനത്താണ് സഞ്ജുവും സംഘവും. അവസാന മത്സരത്തിൽ രാജസ്ഥാൻ ഗുജറാത്ത് ടൈറ്റൻസിനോട് 52 റൺസിന്‌ പരാജയപ്പെട്ടിരുന്നു. മത്സരത്തിൽ ആദ്യം ബാറ്റ് ചെയ്ത ഗുജറാത്ത് 20 ഓവറിൽ ആറു വിക്കറ്റ് നഷ്ടത്തിൽ 217 റൺസാണ് അടിച്ചെടുത്തത്. വിജയലക്ഷ്യം പിന്തുടർന്നിറങ്ങിയ രാജസ്ഥാൻ 19.2 ഓവറിൽ 159 റൺസിന് പുറത്താവുകയായിരുന്നു.

മത്സരത്തിൽ മറ്റൊരു തിരിച്ചടിയും രാജസ്ഥാന് നേരിടേണ്ടി വന്നിരുന്നു. മത്സരത്തിൽ നടത്തിയ സ്ലോ ഓവർ റേറ്റിന് 24 ലക്ഷം രൂപയാണ് സഞ്ജുവിനെതിരെ പിഴ ചുമത്തിയത്. ഈ സീസണിൽ രാജസ്ഥാൻ നേരിടുന്ന രണ്ടാം സ്ലോ ഓവർ റേറ്റിങ് ആണിത്. ചെന്നൈ സൂപ്പർ കിങ്സിനെതിരെയുള്ള മത്സരത്തിലും രാജസ്ഥാൻ സ്ലോ ഓവർ റേറ്റിന്റെ തിരിച്ചടികൾ നേരിടേണ്ടി വന്നിട്ടുണ്ട്.

Former Australian player Shane Watson is talking about the friendship between Rajasthan Royals captain Sanju Samson and England player Jos Buttler