കൊൽക്കത്ത: ഇന്ത്യൻ സൂപ്പർ ലീഗിൽ ഇന്ന് കരുത്തരുടെ ഫൈനൽ പോരാട്ടം. മോഹൻ ബഗാൻ ബംഗളൂരു എഫ്.സിയെയാണ് നേരിടുന്നത്. ഗ്രൂപ്പ് ഘട്ടത്തിലെ ചാംപ്യൻമാരാണ് മോഹൻ ബഗാൻ. സെമിയിൽ മികച്ച തിരിച്ചുവരവാണ് അവർ നടത്തിയത്. ആദ്യ ഘട്ട സെമിയിൽ ബഗാൻ തോറ്റെങ്കിലും രണ്ടാം പാദത്തിൽ മികച്ച ജയത്തോടെ ബഗാൻ ഫൈനലിലേക്ക് മുന്നേറുകയായിരുന്നു. മത്സരം കൊൽക്കത്തയിലാണ് എന്നതാണ് ബഗാനുള്ള ആനുകൂല്യം. അതേസമയം ബംഗളൂരു ഒട്ടും ചെറിയ എതിരാളികളല്ല. സുനിൽ ഛേത്രിയുടെ മിന്നും ഫോം തന്നെയാണ് ടീമിന്റെ കരുത്ത്. 

കൊൽക്കത്തയിലെ വിവേകാനന്ദ യുബ ഭാരതി സ്‌റ്റേഡിയത്തിലാണ് മത്സരം. മത്സരത്തിൽ ചെറിയ മുൻതൂക്കം അതുകൊണ്ട് ടീമിനുണ്ട്. അതേസമയം ബംഗളൂരൂ വലിയ പ്രതീക്ഷയിലാണ്. ടീമിന്റെ രണ്ടാമത്തെ ഹോം ഗ്രൗണ്ടാണ് കൊൽക്കത്തയെന്നാണ് ക്യാപ്റ്റൻ ഗുർപ്രീത് സിങ് സന്ധുവും, ജെറാർഡ് സരഗോസയും അവകാശപ്പെടുന്നത്. മുമ്പ് എന്താണ് നടന്നതെന്നത് തനിക്ക് വിഷയമല്ല. മോഹൻ ബഗാന് ഏറ്റവും മികച്ചത് നൽകാനാണ് ശ്രമിക്കുന്നതെന്ന് കോച്ച് ഹോസെ മോളീന പറഞ്ഞു. 
ബംഗളൂരു ഇത് നാലാം തവണയാണ് ഐ.എസ്.എൽ ഫൈനലിലെത്തുന്നത്. എട്ട് സീസണുകളിൽ നിന്നായിട്ടാണ് ഈ നേട്ടം.

അതേസമയം ബഗാൻ തുടർച്ചയായ മൂന്നാം തവണയാണ് ഫൈനലിലെത്തുന്നത്. തുടരെ ഇത്രയും തവണ ഒരു ടീമും ഫൈനലിലെത്തിയിട്ടില്ല. 2022-23 ഇതേ ടീമുകൾ ഐ.എസ്.എൽ ഫൈനലിൽ ഏറ്റുമുട്ടിയിരുന്നു. അന്ന് ജയം പെനാൽറ്റിയിൽ മോഹൻ ബഗാനൊപ്പമായിരുന്നു. കൊൽക്കത്തയിലെ ആരാധകരുടെ വലിയ പിന്തുണയാണ് ബഗാന്റെ കരുത്ത്. ബംഗളൂരുവിനെ ഒരിക്കൽ കൂടി സമ്മർദത്തിലാക്കാൻ പോകുന്നതും ഈ കാണികളാണ്. 

കൊൽക്കത്തയിലെ പിച്ച് തനിക്കൊരു ഹോം ഗ്രൗണ്ടാണ്. എന്റെ പ്രൊഫഷണൽ ഫുട്‌ബോൾ കരിയർ ആരംഭിച്ചത് ഇവിടെ നിന്നാണെന്നും ബംഗളൂരു ഗോൾകീപ്പർ ഗുർപ്രീത് സിങ് സന്ധു പറഞ്ഞു. മോഹൻ ബഗാൻ ഈ സീസണിലെ മികച്ച ടീമാണെന്നും, അതുകൊണ്ടാണ് ലീഗ് ഷീൽഡ് അവർ നേടിയതെന്നും സന്ധു പറഞ്ഞു. 

ബംഗളൂരുവും ബഗാനും ഇതുവരെ ഐ.എസ്.എല്ലിൽ പതിനൊന്ന് തവണ ഏറ്റുമുട്ടിയിട്ടുണ്ട്. ഇതിൽ ഏഴിലും ജയം ബഗാനായിരുന്നു. ബംഗളൂരു ജയിച്ചത് രണ്ട് തവണ മാത്രമാണ്. രണ്ട് തവണ സമനിലയിലും കലാശിച്ചു. സുനിൽ ഛേത്രി, ദിമിത്രിയോസ് പെട്രാറ്റോസ്,  രാഹുൽ ബെക്കെ എന്നിവരാണ് ബംഗളൂരുവിന്റെ കരുത്ത്. ഇവർ തിളങ്ങിയാൽ ബംഗളൂരുവിന് കിരീടത്തിൽ മുത്തമിടാം.

Today we know the kings of Indian football Mohun Bagan and Bengaluru prepare for the crown battle