ദുബൈ: സൈക്ലിസ്റ്റുകളുടെയും ഇ-സ്‌കൂട്ടര്‍ യാത്രക്കാരുടെയും നിയമലംഘനങ്ങള്‍ നിരീക്ഷിക്കുന്നതിനായി ഉടന്‍ തന്നെ ഒരു പ്രത്യേക യൂണിറ്റ് ആരംഭിക്കുമെന്ന് ദുബൈ അധികൃതര്‍. സൈക്ലിംഗ്, ഇ-സ്‌കൂട്ടര്‍ ട്രാക്കുകളിലെ ഗതാഗത സുരക്ഷ മെച്ചപ്പെടുത്തുന്നതിനൊപ്പം എല്ലാ സുരക്ഷാ മാനദണ്ഡങ്ങളും പാലിക്കുന്നുണ്ടെന്ന് ഉറപ്പാക്കുകയും ചെയ്യുക എന്നതാണ് പുതിയ പേഴ്സണല്‍ മൊബിലിറ്റി മോണിറ്ററിംഗ് യൂണിറ്റിന്റെ ലക്ഷ്യം.

റോഡ്സ് ആന്‍ഡ് ട്രാന്‍സ്പോര്‍ട്ട് അതോറിറ്റി (ആര്‍ടിഎ)യും ദുബൈ പൊലിസും തമ്മിലുള്ള സഹകരണത്തിലൂടെ ആരംഭിച്ച ഈ യൂണിറ്റ് ഗതാഗത നിയമങ്ങള്‍ പാലിക്കല്‍, സൈക്ലിംഗ് പാതകളിലെ ഗതാഗതം നിയന്ത്രിക്കല്‍, സുരക്ഷിതമായ റൈഡിംഗ് രീതികളെക്കുറിച്ചുള്ള പൊതുജന അവബോധം പ്രോത്സാഹിപ്പിക്കല്‍ എന്നിവയ്ക്ക് മേല്‍നോട്ടം വഹിക്കും 

നിലവിലുള്ള ചട്ടങ്ങള്‍ അനുസരിച്ച് കുറ്റവാളികള്‍ക്ക് പിഴ ചുമത്തും. പ്രവര്‍ത്തനം നിരീക്ഷിക്കുന്നതിനും നിയമങ്ങള്‍ നടപ്പിലാക്കുന്നതിനുമായി പ്രധാന സൈക്കിള്‍ പാതകളിലും സോഫ്റ്റ് മൊബിലിറ്റി സോണുകളെ ബന്ധിപ്പിക്കുന്ന പ്രധാന തെരുവുകളിലും യൂണിറ്റിലെ ഉദ്യോഗസ്ഥര്‍ നിലയുറപ്പിക്കും.

''സൈക്കിള്‍ യാത്രകള്‍ 2023 ല്‍ 44 ദശലക്ഷത്തില്‍ നിന്ന് 2024 ല്‍ 46.6 ദശലക്ഷമായി വര്‍ധിച്ചു. അതായത് ഒരു വര്‍ഷം കൊണ്ട് കൈവരിച്ചത് 5% വളര്‍ച്ച, അതേസമയം ഇ-സ്‌കൂട്ടര്‍ യാത്രകള്‍ 30 ദശലക്ഷത്തില്‍ നിന്ന് 32.3 ദശലക്ഷമായി ഉയര്‍ന്നു, 8 ശതമാനം വര്‍ധനവ്,'' ദുബൈ ആര്‍ടിഎയും ദുബൈ പൊലിസും സംയുക്ത പ്രസ്താവനയില്‍ പറഞ്ഞു. ഇ-സ്‌കൂട്ടര്‍, സൈക്കിള്‍ ഉപയോഗത്തില്‍ ഗണ്യമായ വര്‍ധനവ് രേഖപ്പെടുത്തിയതിനാലാണ് പുതിയ യൂണിറ്റ ആരംഭിക്കാന്‍ തീരുമാനിച്ചിരിക്കുന്നത്.  

കഴിഞ്ഞ വര്‍ഷം ദുബൈയില്‍ 254 ഇ-സ്‌കൂട്ടര്‍, സൈക്കിള്‍ അപകടങ്ങള്‍ റിപ്പോര്‍ട്ട് ചെയ്തിരുന്നു. ഇതില്‍ 10 പേര്‍ക്ക് ജീവന്‍ നഷ്ടപ്പെടുകയും 259 പേര്‍ക്ക് പരുക്കേല്‍ക്കുകയും ചെയ്തിരുന്നു. ഇതില്‍ 17 പേര്‍ക്ക് ഗുരുതരമായി പരുക്കേറ്റിരുന്നു. ഫെബ്രുവരിയില്‍ മൂന്ന് ദിവസത്തിനുള്ളില്‍ യുഎഇയില്‍ ഇ-സ്‌കൂട്ടര്‍ അപടകടങ്ങിലായി രണ്ടു മരണങ്ങള്‍ സംഭവിച്ചതോടെയാണ് ആശങ്ക വര്‍ധിച്ചത്.

ഇ-സ്‌കൂട്ടര്‍ ഉപയോഗത്തിന് കര്‍ശനമായ നിയന്ത്രണങ്ങള്‍ വേണമെന്ന് റോഡ് സുരക്ഷാ വിദഗ്ധര്‍ ആവശ്യപ്പെടുന്നു. സ്‌കൂളുകളില്‍ നിര്‍ബന്ധിത റോഡ് സുരക്ഷാ പാഠ്യപദ്ധതി അവതരിപ്പിക്കണമെന്ന് റോഡ്‌സേഫ്റ്റി യുഎഇയുടെ സ്ഥാപകനും മാനേജിംഗ് ഡയറക്ടറുമായ തോമസ് എഡല്‍മാന്‍ ആവശ്യപ്പെട്ടു.

'ഇ-സ്‌കൂട്ടറുകളുടെ കാര്യത്തില്‍ എന്താണ് സംഭവിക്കുന്നതെന്ന് മനസ്സിലാക്കാന്‍ കഴിയാത്തതാണ്. ഹെല്‍മെറ്റ്, റിഫ്‌ലക്ടീവ് വെസ്റ്റ്, ലൈറ്റുകളൊന്നുമില്ലാതെ, ഗതാഗതത്തിന് വിരുദ്ധമായി റോഡുകളില്‍ സ്വന്തം ഇഷ്ടപ്രകാരം വാഹനമോടിക്കുന്ന പ്രായപൂര്‍ത്തിയാകാത്ത കുട്ടികളെ ഞങ്ങള്‍ കാണുന്നു. നിയമങ്ങള്‍ പാലിക്കുന്ന ഒരു കുട്ടിയെയും ഞങ്ങള്‍ കാണുന്നില്ല.' അദ്ദേഹം പറഞ്ഞു.

കഴിഞ്ഞ വര്‍ഷം ദുബൈയില്‍ ഏകദേശം 40,000 ഇ-സ്‌കൂട്ടര്‍, സൈക്കിള്‍ നിയമലംഘനങ്ങള്‍ രജിസ്റ്റര്‍ ചെയ്തു. പൊതു റോഡുകളില്‍ വാഹനമോടിക്കുക, അശ്രദ്ധമായി വാഹനമോടിക്കുക, സുരക്ഷാ ഉപകരണങ്ങള്‍ ധരിക്കാതിരിക്കുക തുടങ്ങിയ നിയമലംഘനങ്ങള്‍ക്ക് 300 ദിര്‍ഹം വരെ പിഴ ചുമത്തും.

ജുമൈറ ബീച്ചില്‍ ഇ-സ്‌കൂട്ടറുകളുടെയും സൈക്കിളുകളുടെയും ഉപയോഗം നിരീക്ഷിക്കുന്നതിനായി ദുബൈ അടുത്തിടെ അഞ്ച് അടി ഉയരവും 200 കിലോഗ്രാം ഭാരവുമുള്ള ഒരു റോബോട്ടിനെ വിന്യസിച്ചിരുന്നു. നിയമ ലംഘനങ്ങള്‍ കണ്ടെത്തുന്നതിനും വ്യക്തിഗത മൊബിലിറ്റി ഉപകരണങ്ങളുടെ സുരക്ഷിതമായ ഉപയോഗം ഉറപ്പാക്കുന്നതിനും സഹായിക്കുന്നതിനാണ് ഈ റോബോട്ട് രൂപകല്‍പ്പന ചെയ്തിരിക്കുന്നത്.

Dubai Police launches a new unit to monitor e-scooters and bicycles, aiming to curb traffic violations and enhance road safety across the city. Monitoring to begin immediately.