ന്യൂഡല്‍ഹി: പാലക്കാട് ശ്രീനിവാസന്‍ വധക്കേസ് പ്രതികളുടെ ജാമ്യം റദ്ദാക്കണമെന്ന് ആവശ്യപ്പെട്ട് എന്‍ഐഎ നല്‍കിയ ഹരജി സുപ്രീം കോടതി തള്ളി. കേസില്‍ 18 പോപ്പുലര്‍ ഫ്രണ്ട് പ്രവര്‍ത്തകര്‍ക്ക് ജാമ്യം അനുവദിച്ച കേരള ഹൈക്കോടതി വിധിക്കെതിരെയാണ് എന്‍ ഐഎ സുപ്രീം കോടതിയെ സമീപിച്ചത്. 

എന്നാല്‍ ഹൈക്കോടതി വിധ ഒരു വര്‍ഷം പളക്കമുള്ളതാണെന്നും വ്യവസ്ഥകള്‍ ലംഘിച്ചാല്‍ ജാമ്യം റദ്ദാക്കാന്‍ ഹൈക്കോടതിക്ക് അധികാരമുണ്ടെന്നും സുപ്രീം കോടതി നിരീക്ഷിച്ചു. ജസ്റ്റിസുമാരായ അഭയ് എസ് ഒകെ, എന്‍ കോടീശ്വര്‍ സിങ് എന്നിവരുടെ ബെഞ്ചാണ് ഹരജി പരിഗണിച്ചത്. 

കേരള ഹൈക്കോടതി ജാമ്യം അുവദിച്ച കേസിലെ പ്രതികള്‍ക്ക് വ്യക്തമായ ക്രിമിനല്‍ പശ്ചാത്തലം ഉണ്ടെന്നും അതിനാല്‍ ജാമ്യം അനുവദിക്കരുതെന്നുമായിരുന്നു എന്‍.ഐ.എയുടെ ആവശ്യം. ഇത് സംബന്ധിച്ച വിശദാംശങ്ങളും എന്‍ ഐ എ കോടതിയില്‍ ഹാജരാക്കിയിരുന്നു. എന്നാല്‍ റിപ്പോര്‍ട്ട് പരിശോധിച്ച സുപ്രീംകോടതി ഗൗരവമേറിയ കാര്യങ്ങള്‍ ഒന്നും റിപ്പോര്‍ട്ടില്‍ ഇല്ലെന്ന് ചൂണ്ടിക്കാട്ടുകയും, ഹൈക്കോടതി വിധി ശരിവെക്കുകയും ചെയ്തു. 

2022 ഏപ്രില്‍ 16നാണ് പാലക്കാട് ആര്‍എസ്എസ് നേതാവായിരുന്ന ശ്രീനിവാസന്‍ കൊല്ലപ്പെട്ടത്. പോപ്പുലര്‍ ഫ്രണ്ട് നേതാവ് എ സുബൈറിനെ കൊലപ്പെടുത്തിയതിന്റെ പ്രതികാരമായാണ് ശ്രീനിവാസന്‍ കൊല്ലപ്പെട്ടതെന്നാണ് അന്വേഷണ സംഘത്തിന്റെ കണ്ടെത്തല്‍. പിഎഫ്‌ഐ - എസ്ഡിപിഐ പ്രവര്‍ത്തകരായിരുന്ന നാല്‍പ്പതിലേറെപ്പേരാണ് പ്രതികള്‍.