വാഷിംഗ്ടൺ:അമേരിക്കയിൽ 30 ദിവസത്തിലധികം താമസിക്കുന്ന എല്ലാ വിദേശ പൗരന്മാർക്കും നിർബന്ധമായ രജിസ്ട്രേഷൻ ഏർപ്പെടുത്തി ട്രംപ് ഭരണകൂടം പുതിയ നീക്കമെടുത്തു. ഈ നിയമം 2025 ഏപ്രിൽ 11 മുതൽ കർശനമായി നടപ്പാക്കും. നിയമലംഘകർക്കെതിരെ പിഴയും ജയിൽ ശിക്ഷയും ഉൾപ്പെടുന്ന കർശന നടപടി സ്വീകരിക്കുമെന്ന് ഡിപ്പാർട്ട്‌മെന്റ് ഓഫ് ഹോംലാൻഡ് സെക്യൂരിറ്റി സെക്രട്ടറി ക്രിസ്റ്റി നോയം അറിയിച്ചു.

രജിസ്ട്രേഷൻ ആവശ്യകതകൾ ഇവയാണ്:

• 2025 ഏപ്രിൽ 11 വരെ 30 ദിവസത്തിലധികം യുഎസിൽ താമസിച്ച എല്ലാ വിദേശികളും
• ഏപ്രിൽ 11ന് ശേഷം യുഎസിൽ എത്തുന്നവർ, 30 ദിവസത്തിനുള്ളിൽ രജിസ്റ്റർ ചെയ്യണം
• യുഎസിൽ വെച്ച് 14 വയസ്സ് തികയുന്നവർ വീണ്ടും രജിസ്റ്റർ ചെയ്ത് വിരലടയാളം നൽകണം
• 14 വയസ്സിൽ താഴെയുള്ള കുട്ടികൾ 30 ദിവസത്തിൽ കൂടുതലായി താമസിക്കുകയാണെങ്കിൽ, രക്ഷിതാക്കൾ അവരുടെ പേരിൽ രജിസ്റ്റർ ചെയ്യണം

എങ്ങിനെയാണ് രജിസ്റ്റർ ചെയ്യേണ്ടത്?

യുഎസ് സിറ്റിസൺഷിപ്പ് ആൻഡ് ഇമിഗ്രേഷൻ സർവീസസിന്റെ (USCIS) ഔദ്യോഗിക വെബ്സൈറ്റ് വഴിയുള്ള ഓൺലൈൻ രജിസ്ട്രേഷൻ ആണ് നിർദേശിച്ചിട്ടുള്ളത്. രജിസ്ട്രേഷൻ പൂർത്തിയാക്കിയവർക്ക് ഒരു സർട്ടിഫിക്കറ്റ് നൽകും. 18 വയസ്സിനു മുകളിലുള്ളവർ ഈ രേഖ എല്ലായ്പ്പോഴും കൈവശം വെക്കണം. നിയമം ലംഘിക്കുന്നവർക്കെതിരെ യാതൊരു ഇളവും ഉണ്ടാകില്ലെന്ന് അധികൃതർ വ്യക്തമാക്കി.

ട്രംപ് ഭരണകൂടത്തിന്റെ ലക്ഷ്യം

രാജ്യത്തിന്റെ സുരക്ഷ ഉറപ്പാക്കുക എന്നതാണ് ഈ നിയമത്തിന്റെ പ്രധാന ലക്ഷ്യം. യുഎസിലെ താമസക്കാരുടെ കൃത്യമായ വിവരങ്ങൾ ശേഖരിച്ച് നിയമവിരുദ്ധ പ്രവർത്തനങ്ങൾ തടയുക എന്നതാണ് നിയമത്തിന്റെ ഉദ്ദേശം. 2025 ജനുവരി 20ന് പ്രസിഡന്റ് ട്രംപ് പുറത്തിറക്കിയ എക്സിക്യൂട്ടീവ് ഓർഡർ 14159 പ്രകാരം കുടിയേറ്റ നിയമങ്ങൾ കൂടുതൽ ശക്തമാക്കാനാണ് നീക്കം.

"അനധികൃതമായി താമസിക്കുന്നവർ ഉടൻ രാജ്യം വിട്ടുപോകണം. അല്ലെങ്കിൽ കർശനമായ നിയമനടപടി നേരിടേണ്ടിവരും. നിയമം പാലിക്കുന്നവർക്ക് മാത്രമേ പൗരത്വം നേടാനും അമേരിക്കയിൽ കഴിയാനും അവസരമുണ്ടാകൂ", എന്ന് ക്രിസ്റ്റി നോയം മുന്നറിയിപ്പ് നൽകി.

The Trump administration has introduced a strict law requiring all foreigners staying in the U.S. for over 30 days to register with USCIS by April 11, 2025. Failure to comply will lead to hefty fines and prison sentences. Homeland Security Secretary Kristi Noem stated this move aims to enhance national security. Even minors staying over 30 days must be registered by their guardians. Registration is mandatory online, and adults must carry proof at all times.