ചേര്‍ത്തല: മാനസികാസ്വാസ്ഥ്യമുള്ള കുടുംബനാഥനെ പൊലിസ് മര്‍ദിച്ചതായി പരാതി. മായിത്തറ സ്വദേശിയായ എ.ടി ഷാര്‍മോനെയാണ് തുറവൂര്‍ താലൂക്കാശുപത്രിയിലെ എയ്ഡ് പോസ്റ്റ് ചുമതലയുള്ള നാല് പൊലിസുകാര്‍ മര്‍ദിച്ചത്. ഇവര്‍ക്കെതിരെ ചേര്‍ത്തല ഡിവൈഎസ്പിക്ക് പരാതി നല്‍കി. ബുധനാഴ്ച രാവിലെ 11നാണ് സംഭവം നടന്നത്. കണ്ണിന് തടിച്ചിലും ചൊറിച്ചിലും അനുഭവപ്പെട്ട ഷാര്‍മോനെയും കൂട്ടി ഭാര്യ വിമല തുറവൂര്‍ ആശുപത്രിയില്‍ എത്തിയതായിരുന്നു.

ആശുപത്രിയില്‍ എത്തിയ ഭാര്യ ചീട്ട് എടുക്കാന്‍ വേണ്ടി ഒപി കൗണ്ടറിലേക്ക് പോയിരുന്നു. ഈ സമയം ആശുപത്രിക്ക് മുന്‍വശം എത്തിയ ഒരു ഓട്ടോ ഷാര്‍മോന്റെ ദേഹത്ത് തട്ടുകയും ചെയ്തു. ഇതിനെച്ചൊല്ലിയുള്ള തര്‍ക്കത്തിനിടയില്‍ അടുത്തുണ്ടായിരുന്ന ഒരു പൊലിസുകാരന്‍ എത്തി യാതൊരു പ്രകോപനവുമില്ലാതെ ഷാര്‍മോന്റെ മുഖത്തടിച്ചു.

 തുടര്‍ന്ന് മറ്റ് മൂന്നു പേര്‍ കൂടി എത്തി എല്ലാവരും ചേര്‍ന്ന് ഷാര്‍മോനെ എയ്ഡ് പോസ്റ്റിനുള്ളിലേക്ക് കൊണ്ടു പോവുകയും ചെയ്തു. ഷര്‍ട്ടും മുണ്ടും ഊരി അടിവസ്ത്രം മാത്രം ധരിപ്പിച്ച് ക്രൂരമായി മര്‍ദിക്കുകയായിരുന്നെന്ന് ഭാര്യ വിമല നല്‍കിയ പരാതിയില്‍ പറയുന്നു.

ദേഹമാസകലം മര്‍ദിച്ചതിനെ തുടര്‍ന്ന് മുഖവും മുതുകും ചതഞ്ഞിട്ടുണ്ട്. ഷാര്‍മോനേ കാണാതെ അന്വേഷിച്ച് എത്തിയ വിമല കാണുന്നത് മേശപ്പുറത്ത് കിടത്തി തന്റെ ഭര്‍ത്താവിനെ മര്‍ദിക്കുന്നതാണ്. സുഖമില്ലാത്ത ആളാണെന്നും നാലു വര്‍ഷമായി മരുന്ന് കഴിക്കുകയാണെന്നും പറഞ്ഞു കരഞ്ഞ് കാല് പിടിച്ചിട്ടാണ് വിട്ടതെന്നും വിമല പറഞ്ഞു.

ദേഹാസ്വാസ്ഥ്യം ഉണ്ടായതിനെ തുടര്‍ന്ന് ചേര്‍ത്തല താലൂക്ക് ആശുപത്രിയില്‍ ചികിത്സ തേടി. വീട്ടിലേക്ക് മടങ്ങും വഴി വീണ്ടും ശാരീരികാസ്വാസ്ഥ്യം ഉണ്ടായതിനെ തുടര്‍ന്ന് എരമല്ലൂരിലെ സ്വകാര്യ ആശുപത്രിയില്‍ പ്രവേശിപ്പിച്ചിരിക്കുകയാണ്. രോഗിയായ ഭര്‍ത്താവിനെ അകാരണമായി മര്‍ദിച്ച പൊലിസുകാര്‍ക്കെതിരെ നടപടി ആവശ്യപ്പെട്ട് മുഖ്യമന്ത്രിക്കും ഡിജിപിക്കും പരാതി നല്‍കുമെന്നും വിമല പറഞ്ഞു.