മുംബൈ: ഐപിഎല്ലിൽ സൺറൈസേഴ്സ് ഹൈദരാബാദിനെതിരെ മുംബൈ ഇന്ത്യൻസിന് 163 റൺസിന്റെ വിജയലക്ഷ്യം. മുംബൈയുടെ തട്ടകമായ വാംഖഡെ സ്റ്റേഡിയത്തിൽ നടക്കുന്ന മത്സരത്തിൽ ടോസ് നേടിയ മുംബൈ നായകന് ഹർദിക് പാണ്ഡ്യ ബൗളിങ് തെരഞ്ഞെടുക്കുകയായിരുന്നു. മത്സരത്തിൽ ഹൈദരാബാദ് അഞ്ച് വിക്കറ്റ് നഷ്ടത്തിലാണ് 162 റൺസ് സ്വന്തമാക്കിയത്. 

മത്സരത്തിൽ ഒരു തകർപ്പൻ റെക്കോർഡ് ആണ് ഹൈദരാബാദിന്റെ ഓസ്ട്രേലിയൻ വെടിക്കെട്ട് ഓപ്പണർ ട്രാവിസ് ഹെഡ് സ്വന്തമാക്കിയത്. ഐപിഎല്ലിൽ 1000 റൺസ് പൂർത്തിയാക്കാനാണ് താരത്തിന് സാധിച്ചിരിക്കുന്നത്. ഐപിഎല്ലിന്റെ ചരിത്രത്തിൽ ഏറ്റവും വേഗത്തിൽ ആയിരം റൺസ് പൂർത്തിയാക്കുന്ന രണ്ടാമത്തെ താരം കൂടിയാണ് ഹെഡ്. വെറും 575 പന്തുകളിൽ നിന്നുമാണ് താരം ഈ നേട്ടം കൈവരിച്ചത്. 545 പന്തുകളിൽ നിന്നും ഈ നേട്ടം സ്വന്തമാക്കിയ വെസ്റ്റ് ഇൻഡീസ് താരം ആന്ദ്ര റസ്സലാണ് ഏറ്റവും വേഗത്തിൽ ഐപിഎല്ലിൽ ആയിരം റൺസ് പൂർത്തിയാക്കിയത്. 594 പന്തുകളിൽ നിന്നും ആയിരം റൺസ് സ്വന്തമാക്കിയ ഹെൻറിച്ച് ക്ലാസനെ മറികടന്നു കൊണ്ടാണ് ഹെഡ് ഈ നേട്ടം സ്വന്തമാക്കിയത്.

മത്സരത്തിൽ 29 പന്തിൽ 28 റൺസ് ആണ് താരം നേടിയത്. പൊതുവേയുള്ള വെടിക്കെട്ട് ശൈലിയിൽ നിന്നും വ്യത്യസ്തമായി സ്ലോ ഇന്നിങ്സാണ് ഹെഡ് കളിച്ചത്. മൂന്ന് ഫോറുകളാണ് താരം നേടിയത്. 28 പന്തിൽ 40 റൺസ് നേടിയ അഭിഷേക് ശർമയാണ് ഹൈദരാബാദ് നിരയിലെ ടോപ്പ് സ്കോറർ. ഏഴു ഫോറുകളാണ് താരം നേടിയത്. ക്ലാസൺ 28 പന്തിൽ 37 റൺസും നേടി തിളങ്ങി. മൂന്ന് ഫോറുകളും രണ്ട് സിക്സുകളുമാണ് താരം സ്വന്തമാക്കിയത്. 

മുംബൈക്കായി വിൽ ജാക്സ് രണ്ട് വിക്കറ്റുകളും ട്രെന്റ് ബോൾട്ട്, ഹർദിക് പാണ്ഡ്യ, ജസ്പ്രീത് ബുംറ എന്നിവർക്ക് ഓരോ വിക്കറ്റുകളും സ്വന്തമാക്കി.

മുംബൈ ഇന്ത്യൻസ് പ്ലെയിങ് ഇലവൻ

റയാൻ റിക്കൽടൺ(വിക്കറ്റ് കീപ്പർ), വിൽ ജാക്ക്‌സ്, സൂര്യകുമാർ യാദവ്, തിലക് വർമ്മ, ഹാർദിക് പാണ്ഡ്യ(ക്യാപ്റ്റൻ), നമൻ ധിർ, മിച്ചൽ സാൻ്റ്‌നർ, ദീപക് ചാഹർ, ട്രെൻ്റ് ബോൾട്ട്, ജസ്പ്രീത് ബുംറ, കർൺ ശർമ്മ

സൺറൈസേഴ്‌സ് ഹൈദരാബാദ് പ്ലെയിങ് ഇലവൻ 

ട്രാവിസ് ഹെഡ്, അഭിഷേക് ശർമ്മ, ഇഷാൻ കിഷൻ, നിതീഷ് കുമാർ റെഡ്ഡി, ഹെൻറിച്ച് ക്ലാസൻ (വിക്കറ്റ് കീപ്പർ), അനികേത് വർമ, പാറ്റ് കമ്മിൻസ് (ക്യാപ്റ്റൻ), ഹർഷൽ പട്ടേൽ, സീഷൻ അൻസാരി, മുഹമ്മദ് ഷമി, ഇഷാൻ മലിംഗ

Travis Head Create a historical record in IPL History