റിയാദ്: വിദേശ രാജ്യങ്ങളില്‍ നിന്നുള്ള പ്രതിഭകളെയും ബിസിനസുകളെയും പ്രത്യേക സാമ്പത്തിക മേഖലകളിലേക്ക് (SEZ) ആകര്‍ഷിക്കുന്നതിലൂടെ നിക്ഷേപ മേഖല മെച്ചപ്പെടുത്തുകയെന്ന ലക്ഷ്യത്തോടെ പുതിയ ക്യാമ്പയിന് തുടക്കം കുറിച്ച് സഊദി അറേബ്യ. നികുതി ഇളവുകള്‍, ലളിതവല്‍ക്കരിച്ച വിസാനടപടിക്രമങ്ങള്‍, നിയന്ത്രണ ആനുകൂല്യങ്ങള്‍ എന്നിവയടക്കം നിരവധി ആനുകൂല്യങ്ങളോടെയാണ് ക്യാമ്പയിന്‍ ആരംഭിച്ചിരിക്കുന്നത്.

സാമ്പത്തിക നഗരങ്ങളുടെയും പ്രത്യേക മേഖലകളുടെയും അതോറിറ്റി (ECZA) യുടെ നേതൃത്വത്തില്‍ നടക്കുന്ന ഈ സംരംഭം സകാത്ത്, നികുതി, കസ്റ്റംസ് അതോറിറ്റി, മാനവ വിഭവശേഷി, സാമൂഹിക വികസന മന്ത്രാലയം എന്നിവയുമായി സഹകരിച്ചാണ് നടപ്പിലാക്കുന്നത്.

കസ്റ്റംസ്, നികുതി ഇളവുകള്‍ വാഗ്ദാനം ചെയ്യുകയും വിസ നടപടിക്രമങ്ങള്‍ ലഘൂകരിക്കുകയും അന്താരാഷ്ട്ര പ്രതിഭകള്‍ക്കുള്ള സാമ്പത്തിക തുല്യതാ ആവശ്യകതകള്‍ നീക്കംചെയ്യുകയും വഴി ആഗോള ബിസിനസ് കേന്ദ്രങ്ങളായി രാജ്യത്തെ പ്രത്യേക സാമ്പത്തിക മേഖലകളെ മാറ്റുകയാണ് ലക്ഷ്യം.

'സര്‍ക്കാര്‍ സ്ഥാപനങ്ങളിലുടനീളം ഞങ്ങള്‍ കെട്ടിപ്പടുക്കുന്ന പങ്കാളിത്തങ്ങള്‍ കൂടുതല്‍ മത്സരാധിഷ്ഠിതവും നിക്ഷേപക സൗഹൃദപരവുമായ അന്തരീക്ഷം സാധ്യമാക്കുന്നതിന് പ്രധാനമാണ്,' ECZA സെക്രട്ടറി ജനറല്‍ നബില്‍ ഖോജ പറഞ്ഞു. 

'പ്രവര്‍ത്തനങ്ങളില്‍ കാര്യക്ഷമത മെച്ചപ്പെടുത്തുന്നതിനും, നിയന്ത്രണ സംഘര്‍ഷം കുറയ്ക്കുന്നതിനും, നമ്മുടെ പ്രത്യേക സാമ്പത്തിക മേഖലകളെ മേഖലയിലെ നിക്ഷേപത്തിനുള്ള ഏറ്റവും ആകര്‍ഷകമായ സ്ഥലമാക്കി മാറ്റുന്നതിനുമാണ് ഈ പുതിയ പദ്ധതി രൂപകല്‍പ്പന ചെയ്തിരിക്കുന്നത്.' അദ്ദേഹം കൂട്ടിച്ചേര്‍ത്തു.

ആഗോള ലോജിസ്റ്റിക്‌സ്, നിര്‍മ്മാണം, ടെക് കമ്പനികള്‍ എന്നിവയ്ക്കായി രൂപകല്‍പ്പന ചെയ്ത ഉയര്‍ന്ന വളര്‍ച്ചയുള്ള മേഖലകളായാണ് പ്രത്യേക സാമ്പത്തിക മേഖലകളെ വിഭാവനം ചെയ്തിരിക്കുന്നത്.

ക്യാമ്പയിനിന്റെ ഭാഗമായി, നീതിന്യായ മന്ത്രാലയവുമായും സഊദി സെന്റര്‍ ഫോര്‍ കൊമേഴ്സ്യല്‍ ആര്‍ബിട്രേഷനുമായും പങ്കാളിത്തത്തോടെ പ്രത്യേക സാമ്പത്തിക മേഖലകള്‍ക്കുള്ളില്‍ സമര്‍പ്പിത മധ്യസ്ഥത, അനുരഞ്ജന കേന്ദ്രങ്ങള്‍ സ്ഥാപിക്കും. അന്താരാഷ്ട്ര മാനദണ്ഡങ്ങള്‍ മാതൃകയാക്കി പ്രവര്‍ത്തിക്കുന്ന ഈ കേന്ദ്രങ്ങള്‍, സോണുകളില്‍ പ്രവര്‍ത്തിക്കുന്ന ബിസിനസുകള്‍ക്ക് നിയമപരമായ സഹായം വര്‍ധിപ്പിക്കാനും കൂടുതല്‍ കാര്യക്ഷമമായ തര്‍ക്ക പരിഹാര സംവിധാനങ്ങള്‍ വാഗ്ദാനം ചെയ്യാനും ലക്ഷ്യമിടുന്നു.

സഊദി സ്റ്റാന്‍ഡേര്‍ഡ്‌സ്, മെട്രോളജി ആന്‍ഡ് ക്വാളിറ്റി ഓര്‍ഗനൈസേഷന്‍ (SASO), സഊദി ഫുഡ് ആന്‍ഡ് ഡ്രഗ് അതോറിറ്റി (SFDA) എന്നിവയുമായുള്ള കൂടുതല്‍ കരാറുകള്‍ നിയന്ത്രണങ്ങള്‍ കുറയ്ക്കുന്നതിനും സഊദി അറേബ്യയിലേക്ക് ഇറക്കുമതി ചെയ്യുന്ന സാധനങ്ങളുടെയും സേവനങ്ങളുടെയും വിപണി പ്രവേശനം ലളിതമാക്കുന്നതിനും ലക്ഷ്യമിടുന്നു.

Saudi Arabia unveils a new strategy to simplify visa procedures and introduce tax incentives, aiming to attract skilled professionals and investors as part of its Vision 2030 economic diversification and talent development goals.