കൊച്ചി: ലഹരി പരിശോധനയ്ക്കിടെ കൊച്ചിയിലെ ഹോട്ടൽ മുറിയിൽ നിന്ന് ഇറങ്ങിയോടിയ സംഭവത്തിൽ നടൻ ഷൈൻ ടോം ചാക്കോ ഇന്ന് വൈകിട്ട് മൂന്ന് മണിക്ക് പൊലീസിന് മുന്നിൽ ഹാജരാകും. ഓടിപ്പോയതിന്റെ കാരണം വ്യക്തമാക്കണമെന്ന് ആവശ്യപ്പെട്ട് എറണാകുളം നോർത്ത് പൊലീസ് നൽകിയ നോട്ടീസിന്റെ അടിസ്ഥാനത്തിലാണ് ഈ നടപടി. ഷൈൻ വൈകിട്ട് മൂന്ന് മണിക്ക് ഹാജരാകുമെന്ന് കുടുംബം മാധ്യമങ്ങളോട് വ്യക്തമാക്കി.

സംഭവത്തിന്റെ പശ്ചാത്തലത്തിൽ ഷൈനിന്റെ ഒരു മാസത്തെ ഫോൺ കോൾ വിശദാംശങ്ങളും അദ്ദേഹം താമസിച്ച ആറ് ഹോട്ടലുകളിലെ സിസിടിവി ദൃശ്യങ്ങളും പൊലീസ് പരിശോധിച്ചു. ചോദ്യാവലി തയ്യാറാക്കി അന്വേഷണ സംഘം ചോദ്യം ചെയ്യലിന് ഒരുങ്ങുകയാണ്. ഷൈൻ അഭിഭാഷകരുടെ സഹായം തേടിയതായും റിപ്പോർട്ടുകൾ സൂചിപ്പിക്കുന്നു.

എറണാകുളം നോർത്ത് പൊലീസ് ഷൈനിന്റെ തൃശൂരിലെ വീട്ടിൽ നോട്ടീസ് നൽകിയിരുന്നു. ശനിയാഴ്ച രാവിലെ 10 മണിക്ക് ഹാജരാകണമെന്നായിരുന്നു നിർദേശം. എന്നാൽ, വൈകിട്ട് മൂന്ന് മണിക്ക് ഹാജരാകുമെന്ന് കുടുംബം അറിയിച്ചു. "കേസ് വെറും ഓലപ്പാമ്പാണ്, ഷൈൻ ഇന്ന് ഹാജരാകും," കുടുംബം മാധ്യമങ്ങളോട് പ്രതികരിച്ചു.

ലഹരി പരിശോധനയ്ക്കായി ഡാൻസാഫ് സംഘം ഹോട്ടലിലെത്തിയപ്പോൾ ഷൈൻ എന്തിന് ഓടി രക്ഷപ്പെട്ടു എന്നതാണ് പൊലീസ് പ്രധാനമായും അന്വേഷിക്കുന്നത്. സെൻട്രൽ എസിപിയുടെ നേതൃത്വത്തിലാണ് ചോദ്യം ചെയ്യൽ. ഷൈൻ ഓടിപ്പോയ ശേഷം ഹോട്ടൽ മുറിയിൽ നടത്തിയ പരിശോധനയിൽ ലഹരി വസ്തുക്കൾ കണ്ടെത്തിയിരുന്നില്ല.