ചെന്നൈ: കേന്ദ്ര ആഭ്യന്തര മന്ത്രി അമിത് ഷാക്കെതിരെ രൂക്ഷ വിമര്‍ശനവുമായി തമിഴ്‌നാട് മുഖ്യമന്ത്രി എംകെ സ്റ്റാലിന്‍. ഏത് ഷാ വന്നാലും തമിഴ്‌നാടിനെ ഭരിക്കാന്‍ സാധിക്കില്ലെന്ന് സ്റ്റാലിന്‍ പറഞ്ഞു. അടുത്ത വര്‍ഷം നിയമസഭാ തെരഞ്ഞെടുപ്പില്‍ കളംപിടിക്കാന്‍ ബിജെപിയും, എഐഎഡിഎംകെയും സഖ്യം പ്രഖ്യാപിച്ചതിന് പിന്നാലെയാണ് സ്റ്റാലിന്റെ പരാമര്‍ശം. ഡിഎംകെ തെരഞ്ഞെടുപ്പില്‍ കൂറ്റന്‍ വിജയം സ്വന്തമാക്കുമെന്നും സ്റ്റാലിന്‍ പറഞ്ഞു. 

തമിഴ്‌നാട് സര്‍ക്കാര്‍ സംഘടിപ്പിച്ച പൊതുപരിപാടിയിലാണ് സ്റ്റാലിന്‍ ബിജെപിയെയും, അമിത് ഷായെയും കടന്നാക്രമിച്ച് രംഗത്തെത്തിയത്. 

'ഏത് ഷാ വന്നാലും തമിഴ്‌നാടിനെ ഭരിക്കാന്‍ സാധിക്കില്ല. തമിഴ്‌നാട് എല്ലാകാലത്തും ഡല്‍ഹിയുടെ നിയന്ത്രണത്തിന് പുറത്തായിരിക്കും. സംസ്ഥാനങ്ങള്‍ അവകാശങ്ങള്‍ ചോദിക്കുന്നത് എങ്ങനെയാണ് തെറ്റാകുന്നത്. കേന്ദ്ര സര്‍ക്കാര്‍ പരാജയപ്പെട്ടത് കൊണ്ടാണ് ഞങ്ങള്‍ക്ക് സുപ്രീം കോടതിയെ സമീപിച്ച് ഗവര്‍ണര്‍മാര്‍ക്കെതിരെ ചരിത്ര വിധി നേടേണ്ടി വന്നത്. ഇന്ത്യയിലെ മുഴുവന്‍ സംസ്ഥാനങ്ങള്‍ക്കും വേണ്ടിയാണ് ഞങ്ങള്‍ പോരാടുന്നത്. സ്റ്റാലിന്‍ പറഞ്ഞു. 

പ്രസംഗത്തില്‍ ബിജെപി, എഐഎഡിഎംകെ സഖ്യത്തെ തട്ടിപ്പ് സഖ്യമെന്നാണ് സ്റ്റാലിന്‍ വിശേഷിപ്പിച്ചത്. ഇഡിയുടെ റെയ്ഡ് ഭയന്നാണ് ഐഐഎഡിഎംകെ ബിജെപിയുടെ കൂട്ടില്‍ ചേര്‍ന്നതെന്നും, ആരെയും ഭയപ്പെടുന്ന വ്യക്തിയല്ല താനെന്നും സ്റ്റാലിന്‍ പറഞ്ഞു. 

പുറമെ ഹിന്ദി നിര്‍ബന്ധിത ഭാഷയാക്കാനുള്ള ശ്രമം, നീറ്റ് പരീക്ഷ, പുതിയ മണ്ഡല രൂപീകരണം എന്നീ വിഷയങ്ങളില്‍ തമിഴ് ജനതയോട് അമിത് ഷാ ഉത്തരം നല്‍കണമെന്നും സ്റ്റാലിന്‍ കൂട്ടിച്ചേര്‍ത്തു. 

നേരത്തേ ഡിഎംകെ സര്‍ക്കാരും ഗവര്‍ണര്‍ ആര്‍എന്‍ രവിയും തമ്മില്‍ നിയമനിര്‍മ്മാണവുമായി ബന്ധപ്പെട്ട് തുടര്‍ച്ചയായ ഏറ്റുമുട്ടലുകളെത്തുടര്‍ന്ന് തമിഴ്നാടിന് കൂടുതല്‍ സ്വയംഭരണാവകാശം നല്‍കണമെന്ന തന്റെ പ്രചാരണം സ്റ്റാലിന്‍ ശക്തമാക്കിയിരുന്നു. ഏപ്രില്‍ 15 ന്, സംസ്ഥാനത്തിന്റെ അധികാരങ്ങള്‍ വര്‍ധിപ്പിക്കുന്നതിനും അവകാശങ്ങള്‍ വീണ്ടെടുക്കുന്നതിനുമുള്ള മാര്‍ഗങ്ങള്‍ ശുപാര്‍ശ ചെയ്യുന്നതിനായി തമിഴ്‌നാട് സര്‍ക്കാര്‍ ഒരു ഉന്നതതല സമിതി രൂപീകരിച്ചിരുന്നു. മുന്‍ സുപ്രീം കോടതി ജസ്റ്റിസ് കുര്യന്‍ ജോസഫ് നയിക്കുന്ന സമിതിയില്‍ വിരമിച്ച ഐഎഎസ് ഉദ്യോഗസ്ഥന്‍ അശോക് വര്‍ധന്‍ ഷെട്ടിയും മുനാഗരാജനുമാണ് അംഗങ്ങള്‍.

mk stalin says amith sha and bjp will never going to rule the people of tamil nadu