ന്യൂഡൽഹി: കുട്ടികൾ, ഗർഭിണികൾ, മുലയൂട്ടുന്ന അമ്മമാർ, കൗമാരക്കാരായ പെൺകുട്ടികൾ എന്നിവർക്ക് നൽകുന്ന പോഷകാഹാര കിറ്റുകളിൽ പഞ്ചസാര, ഉപ്പ്, കൊഴുപ്പ് എന്നിവ ഒഴിവാക്കണമെന്ന് കേന്ദ്രസർക്കാർ സംസ്ഥാനങ്ങൾക്ക് നിർദേശം നൽകി. വനിതാ-ശിശു വികസന മന്ത്രാലയം പുറപ്പെടുവിച്ച മാർഗനിർദേശ പ്രകാരം, അംഗൻവാടികൾ വഴി വിതരണം ചെയ്യുന്ന ഭക്ഷണത്തിലും പോഷകാഹാര കിറ്റുകളിലും സംസ്കരിച്ച പഞ്ചസാര, അധിക ഉപ്പ്, കൊഴുപ്പ്, പ്രിസർവേറ്റീവുകൾ, നിറങ്ങൾ, കൃത്രിമ രുചികൾ എന്നിവ ഉപയോഗിക്കരുത്.

അംഗൻവാടികളിൽ മൂന്ന് മുതൽ ആറ് വയസ്സ് വരെയുള്ള കുട്ടികൾക്ക് നൽകുന്ന ഭക്ഷണത്തിലും പോഷകാഹാര കിറ്റുകളിലും ഉയർന്ന അളവിൽ പഞ്ചസാരയും ഉപ്പും അടങ്ങിയിട്ടുണ്ടെന്ന് മന്ത്രാലയം കണ്ടെത്തിയതിനെ തുടർന്നാണ് ഈ നടപടി. പഞ്ചസാരയ്ക്ക് പകരം മധുരത്തിനായി ശർക്കര ഉപയോഗിക്കാമെങ്കിലും, അതിന്റെ അളവ് മൊത്തം ഊർജ്ജത്തിന്റെ അഞ്ച് ശതമാനത്തിൽ താഴെയായി നിയന്ത്രിക്കണമെന്ന് ഡെപ്യൂട്ടി സെക്രട്ടറി ജ്യോതിക വ്യക്തമാക്കി. അമിത കലോറി ശരീരത്തിൽ എത്തുന്നത് തടയാൻ ഈ നിയന്ത്രണം അനിവാര്യമാണ്.

ലോകാരോഗ്യ സംഘടനയുടെ മാർഗനിർദേശങ്ങൾ പാലിച്ച്, കൊഴുപ്പും ഉപ്പും പഞ്ചസാരയും അധികമുള്ള ഭക്ഷണങ്ങൾ പൂർണമായി ഒഴിവാക്കണമെന്ന് കേന്ദ്രം നിർദേശിച്ചു. ഉപ്പിന്റെ ഉപയോഗവും കർശനമായി പരിമിതപ്പെടുത്തണം. പോഷകാഹാര കിറ്റുകൾ ഉപയോഗിച്ച് ഉപ്പോ പഞ്ചസാരയോ ചേർക്കാതെ ഭക്ഷണം തയ്യാറാക്കുന്നതിനുള്ള പാചക മാർഗനിർദേശങ്ങൾ സംസ്ഥാനങ്ങളും കേന്ദ്രഭരണ പ്രദേശങ്ങളും തയ്യാറാക്കണം. ഇത് ഗുണഭോക്താക്കൾക്ക് അവരുടെ ഇഷ്ടാനുസരണം ആരോഗ്യകരമായ ഭക്ഷണം തയ്യാറാക്കാൻ സഹായിക്കുമെന്നും മന്ത്രാലയം വ്യക്തമാക്കി. 

The Central Government has directed states to eliminate sugar, excess salt, and fat from nutritional kits provided to children, pregnant women, lactating mothers, and adolescent girls through Anganwadis. The new guidelines by the Ministry of Women and Child Development also prohibit processed sugar, preservatives, artificial colors, and flavors, recommending limited use of jaggery and adherence to WHO standards for healthier diets.