റിയാദ്: സഊദി വമ്പന്മാരായ അൽ നസറിനൊപ്പമുള്ള കരാർ 2026ലാണ് അവസാനിക്കുന്നത്. ഇപ്പോൾ റൊണാൾഡോ സാഊദി ക്ലബ്ബിനൊപ്പം പുതിയ ഒരു കരാറിൽ ഒപ്പുവെക്കുമെന്നാണ് ഇപ്പോൾ പുറത്ത് വരുന്ന റിപ്പോർട്ടുകൾ. 2027 പകുതി വരെ റൊണാൾഡോ അൽ നസറിനൊപ്പം പുതിയ കരാറിൽ ഒപ്പുവെക്കുമെന്നാണ് മാർക്ക റിപ്പോർട്ട് ചെയ്യുന്നത്. കരാറിൻ്റെ ഭാഗമായി പ്രതിവർഷം 200 മില്യൺ തുക ലഭിക്കുമെന്ന് റിപ്പോർട്ടിൽ പറയുന്നു.

2022ലാണ് ക്രിസ്റ്റ്യാനോ റൊണാൾഡോ മാഞ്ചസ്റ്റർ യുണൈറ്റഡിൽ നിന്നും അൽ നസറിലെത്തുന്നത്  റൊണാൾഡോയുടെ വരവോടെ സഊദി ലീഗിൽ വലിയ മാറ്റങ്ങളാണ് സംഭവിച്ചിട്ടുള്ളത്. റൊണാൾഡോയുടെ കടന്നുവരവോടെ സഊദി ഫുട്ബോളിന് ലോക ഫുട്ബോളിൽ കൃത്യമായ ഒരു മേൽവിലാസം സൃഷ്ടിച്ചെടുക്കാൻ സാധിച്ചിരുന്നു. റൊണാൾഡോക്ക് പിന്നാലെ യൂറോപ്പിലെ വിവിധ ക്ലബ്ബുകളിലെ പ്രധാന താരങ്ങൾ ചേക്കേറിയിരുന്നു. കരിം ബെൻസിമ, നെയ്മർ, സാദിയോ മാനെ, റിയാദ് മെഹറസ്, റോബർട്ടോ ഫിർമീഞ്ഞോ തുടങ്ങിയ പ്രധാന താരങ്ങളും സഊദിയിലേക്ക് മാറിയിരുന്നു. 

റൊണാൾഡോ അൽ നസറിനായി ഈ സീസണിൽ മിന്നും പ്രകടനങ്ങളാണ് നടത്തിക്കൊണ്ടിരിക്കുന്നത്. അൽ നസറിനായി സഊദി ലീഗിൽ ഈ സീസണിൽ 23 ഗോളുകളാണ് റൊണാൾഡോ അടിച്ചുകൂട്ടിയിരിക്കുന്നത്. നിലവിലെ ലീഗിലെ ഗോൾ വേട്ടക്കാരുടെ പട്ടികയിൽ ഒന്നാമതുള്ളതും റൊണാൾഡോ തന്നെയാണ്. 

നിലവിൽ സഊദി പ്രോ ലീഗിൽ മൂന്നാം സ്ഥാനത്താണ് അൽ നസർ. 28 മത്സരങ്ങളിൽ നിന്നും 17 വിജയവും ആറു സമനിലയും അഞ്ചു തോൽവിയും അടക്കം 57 പോയിന്റുമയാണ് റൊണാൾഡോയും സംഘവും മൂന്നാം സ്ഥാനത്ത് തുടരുന്നത്. 65 പോയിന്റുമായി അൽ ഇത്തിഹാദാണ് ഒന്നാം സ്ഥാനത്തുള്ളത്. 61 പോയിന്റോടെ അൽ ഹിലാൽ രണ്ടാം സ്ഥാനത്തുമുണ്ട്.

Report says Cristaino Ronaldo will renew a new contract in Al Nassr