ദുബൈ: യുഎഇയിലെ അല്‍ഐനില്‍ 3,000 വര്‍ഷം പഴക്കമുള്ള ഇരുമ്പുയുഗ കാലത്തെ ശ്മശാനം കണ്ടെത്തി. അബൂദബി സാംസ്‌കാരിക, ടൂറിസം വകുപ്പ് (ഡിസിടി അബൂദബി) തിങ്കളാഴ്ചയാണ് കണ്ടെത്തലിനെക്കുറിച്ച് വെളിപ്പെടുത്തല്‍ നടത്തിയത്. ചരിത്ര വകുപ്പിന്റെ പുരാവസ്തു വിഭാഗമാണ് ഇത് കണ്ടെത്തിയത്.

നൂറിലധികം ശവകുടീരങ്ങള്‍ അടങ്ങിയിരിക്കാന്‍ സാധ്യതയുള്ള ഈ പുരാതന ശ്മശാനം, യുഎഇയുടെ ചരിത്രത്തിലെ അത്ര അറിയപ്പെടാത്ത ഒരു കാലഘട്ടത്തെക്കുറിച്ചുള്ള വിലപ്പെട്ട ഉള്‍ക്കാഴ്ച നല്‍കുന്നു. നൂറ്റാണ്ടുകള്‍ക്ക് മുമ്പ് പല ശവകുടീരങ്ങളും കൊള്ളയടിക്കപ്പെട്ടതാണെങ്കിലും, പുരാവസ്തു ഗവേഷകര്‍ ഇവിടെ നിന്നും മനുഷ്യാവശിഷ്ടങ്ങള്‍ ആഭരണങ്ങള്‍, മണ്‍പാത്രങ്ങള്‍, ആയുധങ്ങള്‍ എന്നിവയുള്‍പ്പെടെ നിരവധി വസ്തുക്കളും കണ്ടെത്തിയിട്ടുണ്ട്.

.@dctabudhabi has unearthed a major Iron Age cemetery, the first discovery of its kind in Al Ain Region. The site, containing more than a hundred tombs and an array of artefacts, casts a new light on a previously unknown chapter of #AbuDhabi’s rich heritage. pic.twitter.com/vEHNxONTkx

— مكتب أبوظبي الإعلامي (@ADMediaOffice) April 21, 2025

അല്‍ ഐനിലെ ഈ കണ്ടെത്തലുകള്‍ ആയിരക്കണക്കിന് വര്‍ഷങ്ങള്‍ക്ക് മുമ്പ് ഈ പ്രദേശത്ത് ജീവിച്ചിരുന്ന ആളുകളുടെ ജീവിതം, വിശ്വാസങ്ങള്‍, കരകൗശല വൈദഗ്ദ്ധ്യം, സാമൂഹികവും സാംസ്‌കാരികവുമായ ജീവിതം എന്നിവയിലേക്കുള്ള ഒരു നേര്‍ക്കാഴ്ച നല്‍കുന്നു.

മനുഷ്യാവശിഷ്ടങ്ങള്‍ക്ക് മാന്യമായ പരിഗണന ഉറപ്പാക്കുന്നതിനായി, ഒരു ഓസ്റ്റിയോ ആര്‍ക്കിയോളജിസ്റ്റ് ഉള്‍പ്പെടെ ഫോറന്‍സിക് വിദഗ്ധരുടെ ഒരു സംഘം ഖനനത്തില്‍ പങ്കുചേര്‍ന്നു. അവശിഷ്ടങ്ങള്‍ ദുര്‍ബലമാണെങ്കിലും ലബോറട്ടറി പരിശോധനകളിലൂടെ മരിച്ചയാളുടെ പ്രായം, ലിംഗഭേദം, ആരോഗ്യം എന്നിവ നിര്‍ണ്ണയിക്കാന്‍ സഹായിക്കും. ഡിഎന്‍എ വിശകലനം കുടുംബബന്ധങ്ങളും കുടിയേറ്റ രീതികളും പോലും വെളിപ്പെടുത്തിയേക്കാം.

നൂറ്റാണ്ടുകള്‍ക്ക് മുമ്പ് ശവകുടീരങ്ങള്‍ കൊള്ളയടിക്കപ്പെട്ടെങ്കിലും, ഇവിടെ ചില ചെറിയ സ്വര്‍ണ്ണാഭരണങ്ങള്‍ അവശേഷിച്ചിട്ടുണ്ട്. ഒരുകാലത്ത് ശവകുടീരങ്ങളില്‍ എന്തായിരിക്കാം ഉണ്ടായിരുന്നതെന്ന് സൂചന നല്‍കുന്നു.

അലങ്കരിച്ച മണ്‍പാത്രങ്ങള്‍, മൃദുവായ കല്ലുപാത്രങ്ങള്‍, ചെമ്പിന്റെ ആയുധങ്ങള്‍, ബീഡ് നെക്ലേസുകള്‍, മോതിരങ്ങള്‍, റേസറുകള്‍, ഷെല്‍ കോസ്‌മെറ്റിക് പാത്രങ്ങള്‍ തുടങ്ങിയ വ്യക്തിഗത വസ്തുക്കള്‍ പോലുള്ള മനോഹരമായി നിര്‍മ്മിച്ച വസ്തുക്കളും ഇവിടെ നിന്ന് ഗവേഷകര്‍ കണ്ടെത്തിയിട്ടുണ്ട്. ചില ആയുധങ്ങളില്‍ മരക്കമ്പുകളുടെയും ആവനാഴികളുടെയും അടയാളങ്ങള്‍ ഉണ്ടായിരുന്നു.

പുരാതന യുഎഇയെ മനസ്സിലാക്കുന്നതിലെ ഒരു വഴിത്തിരിവാണ് ഈ കണ്ടെത്തലെന്ന് ഡിസിടി അബൂദബിയിലെ ചരിത്ര പരിസ്ഥിതി വകുപ്പ് ഡയറക്ടര്‍ ജാബിര്‍ സാലിഹ് അല്‍ മെറി വിശേഷിപ്പിച്ചു. 

'വര്‍ഷങ്ങളായി, ഇരുമ്പുയുഗത്തിലെ ശവസംസ്‌കാര പാരമ്പര്യങ്ങള്‍ ഒരു നിഗൂഢതയായി തുടരുകയായിരുന്നു. എന്നാല്‍ 3,000 വര്‍ഷങ്ങള്‍ക്ക് മുമ്പ് ഇവിടെ ജീവിച്ചിരുന്ന ആളുകളുമായി നമ്മെ കൂടുതല്‍ അടുപ്പിക്കുന്ന വ്യക്തമായ തെളിവുകള്‍ ഇപ്പോള്‍ നമുടെ പക്കലുണ്ട്,' അദ്ദേഹം പറഞ്ഞു. 

'ഭാവി തലമുറകള്‍ക്കായി അബൂദബിയുടെ പൈതൃകം സംരക്ഷിക്കാനും പ്രോത്സാഹിപ്പിക്കാനും സംരക്ഷിക്കാനുമുള്ള ഞങ്ങളുടെ ശ്രമങ്ങളെ ഇത് ശക്തിപ്പെടുത്തുന്നു.' അദ്ദേഹം കൂട്ടിച്ചേര്‍ത്തു.

മേഖലയുടെ സമ്പന്നമായ പൈതൃകം പര്യവേക്ഷണം ചെയ്യുന്നതിനും സംരക്ഷിക്കുന്നതിനുമുള്ള ഡിസിടി അബൂദബിയുടെ നിരന്തരമായ ശ്രമങ്ങളുടെ ഭാഗമാണ് ഈ കണ്ടെത്തല്‍. ഇതുവരെ കണ്ടെത്തിയിട്ടുള്ളതില്‍ വച്ച് ഏറ്റവും മികച്ച രീതിയില്‍ സംരക്ഷിക്കപ്പെട്ട ഇരുമ്പുയുഗ ശ്മശാനങ്ങളില്‍ ഒന്നായ ഈ സ്ഥലം, പ്രാദേശിക വികസനത്തിന്റെ നിര്‍ണായക ഘട്ടത്തില്‍ സാമൂഹിക, സാംസ്‌കാരിക, സാമ്പത്തിക ജീവിതത്തെക്കുറിച്ച് പുതിയ വെളിച്ചം വീശുമെന്ന കാര്യത്തില്‍ തര്‍ക്കമില്ല.

കഴിഞ്ഞ 65 വര്‍ഷത്തിനിടയില്‍, പുരാവസ്തു ഗവേഷകര്‍ അല്‍ ഐനിലെ ഇരുമ്പുയുഗ കാലത്തെ ഗ്രാമങ്ങള്‍, കോട്ടകള്‍, ക്ഷേത്രങ്ങള്‍, ഫലാജ്, പുരാതന ഉദ്യാനങ്ങള്‍ എന്നിവ കണ്ടെത്തിയിട്ടുണ്ട്. എന്നിരുന്നാലും ആ കാലഘട്ടത്തിലെ ശ്മശാനങ്ങളും ആചാരങ്ങളും ഇതുവരെ അജ്ഞാതമായിരുന്നു.

A 3,000-year-old Iron Age cemetery has been unearthed in Al Ain, UAE, revealing ancient burial practices. Viral footage of the archaeological site is drawing global attention to the region's rich history.