ദുബൈ: അന്തരിച്ച ഫ്രാന്‍സിസ് മാര്‍പ്പാപ്പക്ക് ആദരാഞ്ജലികള്‍ അര്‍പ്പിച്ച് യുഎഇ പ്രസിഡന്റ് ഷെയ്ഖ് മുഹമ്മദ് ബിന്‍ സായിദ് അല്‍ നഹ്യാനും യുഎഇ പ്രധാനമന്ത്രിയും ദുബൈ ഭരണാധികാരിയുമായ ഷെയ്ഖ് മുഹമ്മദ് ബിന്‍ റാഷിദ് അല്‍ മക്തൂമും. 

'സഹിഷ്ണുതയുടെയും സ്‌നേഹത്തിന്റെയും ഐക്യദാര്‍ഢ്യത്തിന്റെയും ആഗോള പ്രതീകം' എന്നാണ് ആദരാഞ്ജലികള്‍ അര്‍പ്പിച്ചുകൊണ്ട് ഷെയ്ഖ് മുഹമ്മദ് ബിന്‍ സായിദ് അല്‍ നഹ്യാന്‍ ഫ്രാന്‍സിസ് മാര്‍പാപ്പയെ വിശേഷിപ്പിച്ചത്.

We are deeply saddened to hear of the passing of His Holiness Pope Francis @Pontifex , a great leader whose compassion and commitment to peace touched countless lives. His legacy of humility and interfaith unity will continue to inspire many communities around the world . pic.twitter.com/5LwoJq2Hxr

— HH Sheikh Mohammed (@HHShkMohd) April 21, 2025

'മനുഷ്യരാശിയുടെ പ്രയോജനത്തിനായി ഈ മൂല്യങ്ങള്‍ പ്രോത്സാഹിപ്പിക്കുന്നതിനായി അദ്ദേഹം വര്‍ഷങ്ങളോളം യുഎഇയുമായി ചേര്‍ന്ന് പ്രവര്‍ത്തിച്ചു,' ഷെയ്ഖ് മുഹമ്മദ് തന്റെ സന്ദേശത്തില്‍ പറഞ്ഞു. 

അദ്ദേഹത്തിന്റെ വിയോഗത്തില്‍ ലോകമെമ്പാടുമുള്ള കത്തോലിക്കാ വിശ്വാസികള്‍ക്ക് ഷെയ്ഖ് മുഹമ്മദ് അഗാധമായ അനുശോചനം രേഖപ്പെടുത്തി. 88 വയസ്സായിരുന്നു ഫ്രാന്‍സിസ് മാര്‍പ്പാപ്പക്ക്. 

യുഎഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ഷെയ്ഖ് മുഹമ്മദ് ബിന്‍ റാഷിദ് അല്‍ മക്തൂമും സോഷ്യല്‍ മീഡിയയിലൂടെ റോമന്‍ കത്തോലിക്കാ സഭയുടെ തലവന് ആദരാഞ്ജലി അര്‍പ്പിച്ചു. 

അദ്ദേഹത്തിന്റെ മരണത്തില്‍ 'അഗാധമായ ദുഃഖം' പ്രകടിപ്പിച്ച ഷെയ്ഖ് മുഹമ്മദ്, ഫ്രാന്‍സിസ് മാര്‍പാപ്പയെ 'എണ്ണമറ്റ ജീവിതങ്ങളെ സ്പര്‍ശിച്ച കാരുണ്യവും സമാധാനത്തോടുള്ള പ്രതിബദ്ധതയും നിറഞ്ഞ ഒരു മഹാനായ നേതാവ്' എന്നാണ് വിശേഷിപ്പിച്ചത്.

2019ല്‍ അറേബ്യന്‍ ഉപദ്വീപ് സന്ദര്‍ശിക്കുന്ന ആദ്യ പോപ്പായി ഫ്രാന്‍സിസ് മാര്‍പാപ്പ മാറിയിരുന്നു. യുഎഇയിലെ 120,000ത്തിലധികം ക്രിസ്തുമത വിശ്വാസികള്‍ക്കായി സായിദ് സ്‌പോര്‍ട്‌സ് സിറ്റി സ്റ്റേഡിയത്തില്‍ അദ്ദേഹം കുര്‍ബാനയും നടത്തിയിരുന്നു.

മൂന്ന് ദിവസത്തെ ഔദ്യോഗിക സന്ദര്‍ശന വേളയില്‍, ഫ്രാന്‍സിസ് മാര്‍പാപ്പ മുസ്‌ലിം കൗണ്‍സില്‍ ഓഫ് എല്‍ഡേഴ്‌സുമായുള്ള ഒരു സ്വകാര്യ യോഗത്തിലും ലോകമെമ്പാടുമുള്ള 700ലധികം പ്രതിനിധികള്‍ പങ്കെടുത്ത ഒരു ഇന്റര്‍ഫെയ്ത്ത് കോണ്‍ഫറന്‍സിലും പങ്കെടുത്തിരുന്നു.