ബെയ്ജിങ്: പുതിയ കണ്ടുപിടുത്തങ്ങളുടെ പേരില്‍ അടുത്ത കാലത്ത് ഏറെ പ്രശംസിക്കപ്പെടുന്നവരാണ് ചൈനീസ് ജനത. നെറ്റിസണ്‍സിനെ അത്ഭുതപ്പെടുത്തി കൊണ്ട് വീണ്ടും സോഷ്യല്‍ മീഡിയയില്‍ തരംഗമാവുകയാണ് ഒരു ചൈനീസ് എടിഎം. സ്വര്‍ണം നല്‍കിയാല്‍ അതിനു തുല്യമായ പണം നല്‍കുന്ന എടിഎമ്മാണ് സോഷ്യല്‍ മീഡിയയില്‍ വളരെ വേഗം ട്രെന്‍ഡിംങ് ആയിക്കൊണ്ടിരിക്കുന്നത്. 

ഷാങ്ഹായ് മാളിലാണ് ഇത്തരത്തില്‍ ഒരു തകര്‍പ്പന്‍ സ്വര്‍ണ്ണ എടിഎം അവതരിപ്പിച്ചിരിക്കുന്നത്. സ്വര്‍ണ്ണ വസ്തുക്കള്‍ ഉരുക്കി, അവയുടെ പരിശുദ്ധിയും ഭാരവും പരിശോധിച്ച്, 30 മിനിറ്റിനുള്ളില്‍ ഉപയോക്താവിന്റെ ബാങ്ക് അക്കൗണ്ടിലേക്ക് തുല്യമായ മൂല്യം കൈമാറുന്ന ഒരു സംവിധാനമാണിത്. ഇവിടെ യാതൊരു രേഖകളുടെയും ആവശ്യമില്ല. ഷെന്‍ഷെന്‍ ആസ്ഥാനമായുള്ള കിംഗ്ഹുഡ് ഗ്രൂപ്പ് വികസിപ്പിച്ചെടുത്ത ഈ യന്ത്രം, വിലയേറിയ ലോഹങ്ങളില്‍ സാമ്പത്തിക ഓട്ടോമേഷന്റെ ഒരു പുതിയ യുഗത്തെ അടയാളപ്പെടുത്തുന്ന ഒന്നാണ്. 

🔴 Çin, Şanghay'da bir altın ATM'si

Altını eritiyor ve ağırlığına karşılık gelen miktarı banka hesabınıza aktarıyor. pic.twitter.com/56sgALt7q5

— Conflict (@ConflictTR) April 19, 2025

ആഗോളതലത്തില്‍ സ്വര്‍ണ്ണ വില കുതിച്ചുയരുന്ന സാഹചര്യത്തില്‍ എടിഎം പെട്ടെന്നാണ് വിജയമായി മാറിയത്. പൈതൃകമായി ലഭിച്ച ആഭരണങ്ങളും പഴയ സ്വര്‍ണ്ണവും പണമായി മാറ്റാന്‍ ഷോപ്പര്‍മാരും താമസക്കാരും നീണ്ടവരിയില്‍ ഇടം കണ്ടെത്താനുള്ള പെടാപ്പാടിലാണ്.

ചെനാടൈംസിന്റെ റിപ്പോര്‍ട്ട് പ്രകാരം ആവശ്യം വളരെ കൂടുതലായതിനാല്‍ മെയ് മാസത്തില്‍ അപ്പോയിന്റ്‌മെന്റ് സ്ലോട്ടുകള്‍ പൂര്‍ണ്ണമായും ബുക്ക് ചെയ്യപ്പെട്ടിട്ടുണ്ട്. 40 ഗ്രാം നെക്ലേസിന് 36,000 യുവാനില്‍ കൂടുതല്‍ വില ലഭിച്ചെന്ന് എടിഎം ഉപയോഗിച്ച ഒരാള്‍ പറഞ്ഞു.

കിംഗ്ഹുഡിന്റെ സ്മാര്‍ട്ട് എടിഎം ശൃംഖല ചൈനയിലുടനീളമുള്ള ഏകദേശം 100 നഗരങ്ങളില്‍ വ്യാപിച്ചുകിടക്കുന്നു. ഷാങ്ഹായില്‍ രണ്ടാമത്തെ മെഷീന്‍ സ്ഥാപിക്കാനുള്ള പദ്ധതിയും പുരോഗമിക്കുകയാണ്.

സ്വര്‍ണ്ണ യന്ത്രം 3 ഗ്രാമില്‍ കൂടുതലുള്ള സ്വര്‍ണ്ണ വസ്തുക്കള്‍ കുറഞ്ഞത് 50% പരിശുദ്ധിയോടെ സ്വീകരിക്കുകയും, ഉരുക്കുകയും, വിശകലനം ചെയ്യുകയും ചെയ്യുന്നു. തുടര്‍ന്ന് ഷാങ്ഹായ് വിനിമയ നിരക്കിന്റെ അടിസ്ഥാനത്തില്‍ 30 മിനിറ്റിനുള്ളില്‍ നേരിട്ട് ബാങ്ക് അക്കൗണ്ടിലേക്ക് അവയുടെ വില നല്‍കുന്നു.

സ്വീകരിക്കുന്ന സ്വര്‍ണ്ണാഭരണങ്ങള്‍: കുറഞ്ഞത് 50% പരിശുദ്ധിയുള്ള, 3 ഗ്രാമില്‍ കൂടുതല്‍ ഭാരമുള്ള സ്വര്‍ണ്ണാഭരണങ്ങള്‍. നാണയങ്ങള്‍ അല്ലെങ്കില്‍ സ്വര്‍ണ്ണാഭരണങ്ങളാണ് സ്വീകരിക്കപ്പെടുക.
1,200°C ല്‍ സ്വര്‍ണ്ണം ഉരുക്കി, ശുദ്ധതയ്ക്കും ഭാരത്തിനും വേണ്ടി നൂതന സെന്‍സറുകള്‍ ഉപയോഗിച്ച് വിശകലനം ചെയ്യുന്നു.

• തത്സമയ വിലനിര്‍ണ്ണയം: ഷാങ്ഹായ് ഗോള്‍ഡ് എക്‌സ്‌ചേഞ്ചില്‍ നിന്നുള്ള തത്സമയ നിരക്കുകള്‍ ഉപയോഗിച്ചാണ് മൂല്യം കണക്കാക്കുന്നത്.
• വേഗത്തിലുള്ള കൈമാറ്റം: ഒരു ചെറിയ ഫീസ് കുറച്ചതിനുശേഷം ഇതിന്റെ വില ഉപയോക്താവിന്റെ ബാങ്ക് അക്കൗണ്ടിലേക്ക് നേരിട്ട് ട്രാന്‍സ്ഫര്‍ ചെയ്യപ്പെടും.
• വേഗത്തിലുള്ള പ്രക്രിയ: മുഴുവന്‍ ഇടപാടും 30 മിനിറ്റിനുള്ളില്‍ പൂര്‍ത്തിയാകും.