ഈ സീസൺ അവസാനത്തോട് കൂടി ഡി ബ്രൂയ്ൻ മാഞ്ചസ്റ്റർ സിറ്റി വിടുമെന്ന് അടുത്തിടെ അറിയിച്ചിരുന്നു. മാഞ്ചസ്റ്റർ സിറ്റിയിൽ നിന്നും വിട പറയുമ്പോൾ താരത്തിന്റെ അടുത്ത ക്ലബ് ഏതാകുമെന്നാണ് ഫുട്ബോൾ ലോകം ഉറ്റുനോക്കുന്നത്. ബെൽജിയൻ മിഡ്ഫീൽഡറെ സ്വന്തമാക്കാൻ മേജർ ലീഗ് സോക്കർ ക്ലബായ ഇന്റർ മയാമി ശ്രമിക്കുന്നുണ്ടെന്ന റിപ്പോർട്ടുകൾ ശക്തമായി നിലനിൽക്കുന്നുണ്ട്.  

ഇപ്പോൾ ഡി ബ്രൂയ്ൻ ഇന്റർ മയാമിയിലേക്ക് പോവുന്നതിനെക്കുറിച്ച് സംസാരിക്കുകയാണ് മുൻ അർജന്റൈൻ താരം സെർജിയോ അഗ്യൂറോ. ഡി ബ്രൂയ്ന് ഇന്റർ മയാമിയിൽ ലയണൽ മെസിക്കൊപ്പം മികച്ച കൂട്ടുകെട്ടുകൾ ഉണ്ടാക്കാൻ സാധിക്കുമെന്നാണ് അഗ്യൂറോ അഭിപ്രായപ്പെട്ടത്. 

''ഇതിനെക്കുറിച്ച് ഔദ്യോഗികമായി ഒന്നും തന്നെ വന്നിട്ടില്ല. പലരും ഡി ബ്രൂയ്ൻ ഇന്റർ മയാമിയിൽ കളിക്കാൻ ആഗ്രഹിക്കുന്നുണ്ടെന്ന് ഞാൻ കരുതുന്നു. എന്താണ് സംഭവിക്കാൻ പോവുന്നതെന്ന് നമുക്ക് ഉടനെ തന്നെ കാണാം. ഇന്റർ മയാമിയിൽ ലിയോയുമായി ഡി ബ്രൂയ്ന് മികച്ചൊരു കൂട്ടുകെട്ട് ഉണ്ടാക്കാൻ സാധിക്കുമെന്ന് ഞാൻ കരുതുന്നു'' സെർജിയോ അഗ്യൂറോ സ്റ്റേക്കിന് നൽകിയ അഭിമുഖത്തിൽ പറഞ്ഞു.  

2015 സീസണിൽ ജർമൻ ക്ലബ് വോൾഫ്സ്ബർഗിൽ നിന്നുമാണ് കെവിൻ ഡി ബ്രൂയ്ൻ മാഞ്ചസ്റ്റർ സിറ്റിയുടെ തട്ടകത്തിൽ എത്തിയത്. ഇത്തിഹാദിന്റെ മണ്ണിൽ ഡി ബ്രൂയ്ൻ ലോകത്തെ ഏറ്റവും മികച്ച മിഡ്ഫീൽഡർമാരിൽ ഒരാളായി മാറുകയായിരിക്കുന്നു. 

മാഞ്ചസ്റ്റർ സിറ്റിക്കായി 106 ഗോളുകളാണ് താരം നേടിയിട്ടുള്ളത്. ടീമിനൊപ്പം 16 കിരീടങ്ങളാണ് ഡി ബ്രൂയ്ൻ നേടിയിട്ടുള്ളത്. ഇതിൽ ആറ് ഇംഗ്ലീഷ് പ്രീമിയർ ലീഗ് കിരീടങ്ങളും ഒരു ചാമ്പ്യൻസ് ലീഗ് കിരീടവും ഡി ബ്രൂയ്ൻ മാഞ്ചസ്റ്റർ സിറ്റിക്കൊപ്പം സ്വന്തമാക്കിയിട്ടുണ്ട്. 

മാഞ്ചസ്റ്റർ സിറ്റിക്കായി ഈ സീസണിൽ ഇംഗ്ലീഷ് പ്രീമിയർ ലീഗിൽ ഡി ബ്രൂയ്ൻ 24 മത്സരങ്ങളിലാണ് കളിച്ചിട്ടുള്ളത്. ഇതിൽ മൂന്ന് ഗോളുകളും ഏഴ് അസിസ്റ്റുകളുമാണ് താരം നേടിയിട്ടുള്ളത്. ഡി ബ്രൂയ്നെ പോലുള്ള ഒരു മികച്ച താരത്തിന്റെ അഭാവം വരും സീസണിൽ മാഞ്ചസ്റ്റർ സിറ്റിയുടെ മധ്യനിരയിൽ വലിയൊരു വിടവ് തന്നെയായിരിക്കും സൃഷ്ടിക്കുക. 

Sergio Aguero says Kevin De Bruyne could form a great partnership with Lionel Messi if he joins Inter Miami