അമ്പലപ്പുഴ: മൂന്ന് പ്രിയകൂട്ടുകാരുടെ വേര്‍പാട് കുന്നുമ്മ ഗ്രാമത്തിന് താങ്ങാനാവുന്നില്ല. തകഴി കുന്നുമ്മ സാബിത്ത് മന്‍സിലില്‍ സാദിറത്തിന്റെ മകന്‍ മുഹമ്മദ് സാബിത്ത് (25), കുറുങ്ങാട്ട് ലക്ഷം വീട്ടില്‍ നൗഷാദ് (സുജീര്‍23), ഐരാംമ്പള്ളില്‍ ലക്ഷം വീട്ടില്‍ കുഞ്ഞുമോന്റെ മകന്‍ അനസ് (26) എന്നിവര്‍ കരുവാറ്റയില്‍ നടന്ന ബൈക്കപകടത്തില്‍ മരിച്ചതിന്റെ ഞെട്ടലിലാണ് നാട്ടുകാര്‍. മൂന്ന് പേരും ഉറ്റസുഹൃത്തുക്കളായിരുന്നു. തങ്ങളുടെ മുന്നില്‍ ഇന്നലെ വരെ ഓടിനടന്നവര്‍ ചേതനയറ്റ ശരീരമായി എത്തിയത് താങ്ങാനാവുന്നില്ല സുഹൃത്തുക്കള്‍ക്കും ബന്ധുക്കള്‍ക്കും.
ദേശീയപാതയില്‍ കരുവാറ്റ വഴിയമ്പലത്ത് ബൈക്കും പജീറ കാറും കൂട്ടിയിടിച്ചാണ് ബൈക്കില്‍ സഞ്ചരിച്ച മൂന്ന് പേരും മരിച്ചത്. ഇന്നലെ പുലര്‍ച്ചെ ഒന്നിന് വീട്ടിലേക്ക് മടങ്ങുമ്പോള്‍ ദേശീയപാതയിലെ വളവില്‍ വെച്ചാണ് അപകടം നടന്നത്. ഉടന്‍ തന്നെ സമീപത്ത് പോസ്റ്റര്‍ ഒട്ടിച്ച് കൊണ്ടിരുന്ന ഡി.വൈ.എഫ് .ഐ പ്രവര്‍ത്തകര്‍ രക്ഷാപ്രവര്‍ത്തനത്തിനെത്തിയെങ്കിലും മൂന്ന് പേരും സംഭവസ്ഥലത്ത് തന്നെ മരിക്കുകയായിരുന്നു. വിവരമറിഞ്ഞ് നൂറുകണക്കിന് ആളുകള്‍ പുലര്‍ച്ചെ മുതല്‍ മെഡിക്കല്‍ കോളജ് ആശുപത്രിലെത്തിയിരുന്നു.
പാണക്കാട് സയ്യിദ് ഹമീദലി ശിഹാബ് തങ്ങള്‍ ബന്ധുക്കളെ സന്ദര്‍ശിച്ച് ആശ്വസിപ്പിച്ചു.നിരവധി പേര്‍ ജനാസ നിസ്‌ക്കാരത്തില്‍ പങ്കെടുത്തു. കുന്നുമ്മ പള്ളി ഖബര്‍സ്ഥാനില്‍ മൂന്ന് പേര്‍ക്കും തൊട്ടടുത്ത് തന്നെയാണ് അന്ത്യനിദ്രയൊരുക്കിയത്.