കോഴിക്കോട്: വിഷുവിന് വിപണിയില്‍ വന്‍തോതില്‍ വിറ്റുപോയ പ്ലാസ്റ്റിക് കണിക്കൊന്നയുടെ ഉപയോഗം പരിസ്ഥിതിക്ക് ഗുരുതര പ്രത്യാഘാതങ്ങള്‍ ഉണ്ടാക്കുന്നുവെന്ന പരാതിയില്‍ മനുഷ്യാവകാശ കമ്മീഷന്‍ സ്വമേധയാ കേസെടുത്തു. കമ്മീഷന്റെ ജുഡീഷ്യല്‍ അംഗമായ കെ. ബൈജുനാഥ് തദ്ദേശസ്വയംഭരണ വകുപ്പ് ഡയറക്ടര്‍ക്ക് നോട്ടീസ് അയച്ചു.

ശുഭപ്പുലരിയുടെ ഭാഗമായി വീടുകളിലും കടകളിലും കണിവയ്ക്കാന്‍ വാങ്ങുന്ന ഈ പ്ലാസ്റ്റിക് കണിക്കൊന്ന ഒറ്റ തവണ ഉപയോഗിച്ച ശേഷം പാഴാക്കപ്പെടുന്നത് കേരളത്തിലെ മാലിന്യ പ്രശ്‌നങ്ങള്‍ക്ക് കാരണമാകുന്നു. ഇത്തരം പ്ലാസ്റ്റിക് പൂക്കള്‍ പിന്നീട് പൊതുസ്ഥലങ്ങളിലും നദികളിലും ഉപേക്ഷിക്കപ്പെടുന്നതിലൂടെ പരിസ്ഥിതിക്ക് വലിയ നാശം സംഭവിക്കുമെന്ന് പരാതിയില്‍ ചൂണ്ടിക്കാട്ടുന്നു.

പ്ലാസ്റ്റിക് മലിനീകരണത്തിന്റെ ഭാഗമായി ഈ തരം കൃത്രിമ പൂക്കളുടെ ഉപയോഗം നിരോധിക്കുകയോ അതിന്മേല്‍ നിയന്ത്രണങ്ങള്‍ കൊണ്ടുവരുകയോ ചെയ്യേണ്ടതുണ്ടെന്നാണ് മനുഷ്യാവകാശ കമ്മീഷന്റെ നിലപാട്. പരാതിയുമായി ബന്ധപ്പെട്ട് രണ്ടു ആഴ്ചക്കകം റിപ്പോര്‍ട്ട് സമര്‍പ്പിക്കാന്‍ തദ്ദേശ വകുപ്പ് ഡയറക്ടര്‍ക്ക് നിര്‍ദേശം നല്‍കിയിട്ടുണ്ട്. മേയില്‍ മനുഷ്യാവകാശ കമ്മീഷന്‍ നടത്തുന്ന സിറ്റിംഗില്‍ കേസ് വീണ്ടും പരിഗണിക്കും.

 മാധ്യമ വാര്‍ത്തയുടെ അടിസ്ഥാനത്തില്‍ വി. ദേവദാസ് എന്നയാളാണ് കമ്മീഷന് മുന്നില്‍ പരാതി സമര്‍പ്പിച്ചത്.

Following widespread sales of plastic Kanikonna (Golden Shower Tree) flowers during Vishu, Kerala’s Human Rights Commission has intervened over environmental concerns. Judicial member K Baijunath sent a notice to the Director of the Local Self-Government Department, citing the threat of plastic pollution in public spaces and water bodies. The action follows a complaint by V. Devadas, highlighting the impact of single-use plastic flowers. A report has been requested within two weeks.