റിയാദ്: ഭീകരവാദ പ്രവര്‍ത്തനങ്ങളില്‍ ഏര്‍പ്പെട്ട  സ്വദേശി പൗരന്റെ വധശിക്ഷ നടപ്പാക്കി സഊദി. സഊദി ആഭ്യന്തര മന്ത്രാലയമാണ് ഇക്കാര്യം അറിയിച്ചത്.

തീവ്രവാദ സെല്ലില്‍ ചേരുക, സുരക്ഷാ ഉദ്യോഗസ്ഥരെ വെടിവയ്ക്കുക, തീവ്രവാദ കേസുകളില്‍ ഉള്‍പ്പെട്ടവര്‍ക്ക് അഭയം നല്‍കുക, ആഭ്യന്തര സുരക്ഷയ്ക്ക് ദോഷം വരുത്തുന്ന തരത്തിലുള്ള ആയുധങ്ങള്‍ കൈവശം വയ്ക്കുക, ഉപയോഗിക്കുക തുടങ്ങിയ തീവ്രവാദ കുറ്റകൃത്യങ്ങള്‍ ചെയ്തതിന്റെ പേരില്‍ സഊദി പൗരനായ അലി ബിന്‍ അബ്ദുല്ല ബിന്‍ അബ്ദുള്‍കരീം അല്‍ റബാഹിന്റെ വധശിക്ഷയാണ് നടപ്പാക്കിയത്.

സുപ്രീം കോടതിയില്‍ നല്‍കിയ അപ്പീല്‍ തള്ളിയ കോടതി വിധി ശരിവച്ച ശേഷമാണ് ശിക്ഷ അന്തിമമാക്കിയത്.

മറ്റുള്ളവരുടെ സുരക്ഷയും അവകാശങ്ങളും ലംഘിക്കുന്ന ഏതൊരാള്‍ക്കും എതിരെ സുരക്ഷ നിലനിര്‍ത്തുന്നതിനും നീതി കൈവരിക്കുന്നതിനും ഇസ്ലാമിക നിയമത്തിലെ വ്യവസ്ഥകള്‍ നടപ്പിലാക്കുന്നതിനുമുള്ള സഊദി അറേബ്യയുടെ പ്രതിബദ്ധത മന്ത്രാലയം ആവര്‍ത്തിച്ചു. ഇത്തരം പ്രവൃത്തികള്‍ ചെയ്യാന്‍ മുതിരുന്ന എല്ലാവര്‍ക്കും ഇസ്‌ലാമിക നിയമപ്രകാരമുള്ള പ്രത്യാഘാതങ്ങള്‍ നേരിടേണ്ടിവരുമെന്നും മന്ത്രാലയം മുന്നറിയിപ്പ് നല്‍കി.

Saudi Arabia has executed a citizen found guilty of terrorism-related offenses, reinforcing its firm approach toward protecting national security and countering extremist threats.