തിരുവനന്തപുരം: ഈ വര്‍ഷത്തെ എസ്എസ്എല്‍സി പരീക്ഷ ഫലം മെയ് 9ന് പ്രഖ്യാപിക്കുമെന്ന് വിദ്യാഭ്യാസ മന്ത്രി വി ശിവന്‍കുട്ടി അറിയിച്ചു. ജൂണ്‍ ഒന്നിന് പൊതുഅവധി നല്‍കി ജൂണ്‍ രണ്ടിന് സ്‌കൂളുകള്‍ തുറക്കും. 

മാര്‍ച്ച് 3 മുതല്‍ മാര്‍ച്ച് 26 വരെയാണ് സംസ്ഥാനത്ത് എസ്എസ്എല്‍സി പരീക്ഷകള്‍ നടന്നത്. കേരളത്തില്‍ 2964 പരീക്ഷ കേന്ദ്രങ്ങളും, ലക്ഷദ്വീപില്‍ 9 കേന്ദ്രങ്ങളും, ഗള്‍ഫ് മേഖലകളില്‍ 7 കേന്ദ്രങ്ങളുമാണ് അനുവദിച്ചത്. ഇവിടങ്ങളില്‍ ആകെ 4,27,021 വിദ്യാര്‍ഥികള്‍ റഗുലര്‍ വിഭാഗത്തില്‍ പരീക്ഷ എഴുതി. ഇതില്‍ 2,17,696 ആണ്‍കുട്ടികളും, 2,09,325 പെണ്‍കുട്ടികളും ഉള്‍പ്പെടും. 

സര്‍ക്കാര്‍ മേഖലയില്‍ 1,42,298 വിദ്യാര്‍ഥികളും, എയ്ഡഡ് മേഖലയില്‍ 2,55,092 വിദ്യാര്‍ഥികളും, അണ്‍ എയ്ഡഡ് മേഖലയില്‍ 29,631 വിദ്യാര്‍ഥികളും പരീക്ഷയെഴുതി. ഗള്‍ഫ് മേഖലയില്‍ നിന്ന് 682 വിദ്യാര്‍ഥികളും, ലക്ഷദ്വീപില്‍ നിന്ന് 447 വിദ്യാര്‍ഥികളും പരീക്ഷ എഴുതി.

കൂടുതല്‍ വിദ്യാര്‍ഥികള്‍ എസ്എസ്എല്‍സി പരീക്ഷ എഴുതിയത് മലപ്പുറം വിദ്യാഭ്യാസ ജില്ലയില്‍. 28,358 കുട്ടികളാണ് പരീക്ഷയെഴുതുന്നത്. ആലപ്പുഴ ജില്ലയിലെ കുട്ടനാട് വിദ്യാഭ്യാസ ജില്ലയിലാണ് കുറവ് വിദ്യാര്‍ഥികള്‍ പരീക്ഷയെഴുതിയത്, 1893പേര്‍. തിരൂരങ്ങാടി വിദ്യാഭ്യാസ ജില്ലയിലെ എടരിക്കോട് പികെഎംഎം എച്ച്എസ്എസ് ആണ് കൂടുതല്‍ കുട്ടികള്‍ പരീക്ഷയെഴുതിയ സ്‌കൂള്‍.

SSLC results will be declared on May 9 June 1 will be a public holiday and schools will reopen on June 2