പാരീസ്: യുവേഫ ചാമ്പ്യൻസ് ലീഗിന്റെ ഫൈനലിലേക്ക് മുന്നേറി പാരീസ് സെയ്ന്റ് ജെർമെയ്ൻ. ആഴ്സണലിനെ ഒന്നിനെതിരെ രണ്ട് ഗോളുകൾക്ക് തകർത്താണ് ഫ്രഞ്ച് വമ്പന്മാർ കലാശപോരാട്ടത്തിന് യോഗ്യത നേടിയത്. ഇരു പാദങ്ങളിലുമായി 3-1 എന്ന അഗ്രിഗേറ്റ് സ്കോറിന് ഗണ്ണേഴ്സിനെ പിഎസ്ജി ഫൈനലിലേക്ക് മുന്നേറിയത്. ഫൈനലിലേക്ക് മുന്നേറിയതിനൊപ്പം പാരീസിന്റെ ഫ്രഞ്ച് താരം ഉസ്മാൻ ഡെമ്പലെ ടീമിനൊപ്പം ഒരു പുതിയ നേട്ടമാണ് കൈവരിച്ചത്. 

ചാമ്പ്യൻസ് ലീഗിൽ ഒരു സീസണിൽ പിഎസ്ജിക്ക് വേണ്ടി ഏറ്റവും കൂടുതൽ ഗോൾ കോൺഡ്രിബ്യുഷൻസ് നടത്തുന്ന താരമായാണ് ഡെമ്പലെ മാറിയത്. ഈ സീസണിൽ 12 ഗോൾ പങ്കാളിത്തമാണ് താരം ഡെമ്പലെ ഫ്രഞ്ച് ടീമിനൊപ്പം നടത്തിയത്. എട്ട് ഗോളുകളും നാല് അസിസ്റ്റുകളുമാണ് താരം സ്വന്തമാക്കിയത്. കിലിയൻ എംബാപ്പയെ മറികടന്നാണ് താരം ഈ റെക്കോർഡ് കൈവരിച്ചത്. 2021-22 സീസണിൽ 11 ഗോൾ കോൺഡ്രിബ്യുഷൻസ് ആണ് താരം സ്വന്തമാക്കിയിരുന്നത്.

മത്സരത്തിൽ പിഎസ്ജിക്ക് വേണ്ടി ഫാബിയൻ റൂയിസാണ് ആദ്യ ഗോൾ നേടിയത്. ആദ്യ പകുതി എതിരില്ലാത്ത ഒരു ഗോളിന് ഫ്രഞ്ച് ക്ലബ് മുന്നിൽ നിൽക്കുകയായിരുന്നു. രണ്ടാം പകുതിയിൽ അഷ്‌റഫ് ഹക്കീമി പാരീസിനായി വീണ്ടും ലക്ഷ്യം കണ്ടു. ബുക്കയോ സാക്കയാണ് ഗണ്ണേഴ്സിന് വേണ്ടി ആശ്വാസ ഗോൾ നേടിയത്. 

ജൂൺ ഒന്നിനാണ് ചാമ്പ്യൻസ് ലീഗിന്റെ ഫൈനൽ പോരാട്ടം നടക്കുന്നത്. ആലിയൻസ് അറീനയിൽ നടക്കുന്ന മത്സരത്തിൽ ഇറ്റാലിയൻ വമ്പന്മാരായ ഇന്റർ മിലാനാണ് പിഎസ്ജിയുടെ എതിരാളികൾ. സ്പാനിഷ് വമ്പൻമാരായ ബാഴ്‌സലോണയെ കീഴടക്കിയാണ് ഇന്റർ മിലാൻ ഫൈനലിലേക്ക് മുന്നേറിയത്. രണ്ടാം പാദ മത്സരത്തിൽ ബാഴ്‌സയെ 4-3ന് മറികടന്നാണ് ഇന്റർ മിലാൻ ഫെനലിലേക്ക് യോഗ്യത നേടിയത്. സെമിയിൽ ഇരു പാദങ്ങളിലുമായി 7-6 എന്ന മാർജിനാണ് ഇന്ററിന്റെ ചാമ്പ്യൻസ് ലീഗ് ഫൈനൽ പ്രവേശനം. 

ലൗട്ടാരോ മാർട്ടിനസ്, ഹാക്കൻ ചലനോളു, ഫ്രാൻസെസ്‌കോ അചർബി, ഡേവിഡ് ഫ്രാറ്റസി എന്നിവർ ഇന്റർ മിലാനായി വല കുലുക്കിയപ്പോൾ എറിക് ഗാർസിയ, ഡാനി ഓൽമോ, റഫീഞ്ഞ്യ എന്നിവരാണ് ബാഴ്‌സക്കായി സ്‌കോർ ചെയ്തത്. 

ousmane dembele create a new record in ucl for psg