കുവൈത്ത് സിറ്റി: കുവൈത്തിലെ മൊത്തം ജനസംഖ്യയില്‍ സ്വദേശികള്‍ 31 ശതമാനം മാത്രമെന്ന് പബ്ലിക് അതോറിറ്റി ഫോര്‍ സിവില്‍ ഇന്‍ഫര്‍മേഷന്‍ (പിഎസിഐ) പുറത്തിറക്കിയ സ്ഥിതിവിവരക്കണക്ക്. 2024 ഡിസംബറില്‍ പൂര്‍ത്തിയാക്കിയ കണക്കെടുപ്പ് പ്രകാരം  കുവൈത്തിലെ മൊത്തം ജനസംഖ്യ 4,987,826 ആയി. ഇതില്‍ കുവൈത്ത് പൗരന്മാരുടെ എണ്ണം 1,567,983 ആണ്. രാജ്യത്ത് കുവൈത്തികള്‍ അല്ലാത്തവരുടെ എണ്ണം ആകെ 3,419,843 ഉം ആണെന്ന് അല്‍സിയാസ ദിനപത്രം റിപ്പോര്‍ട്ട് ചെയ്യുന്നു. മൊത്തം ജനസംഖ്യയുടെ 31 ശതമാനം മാത്രമാണ് കുവൈത്തികള്‍. അതായത്, 773,060 കുവൈത്ത് പുരുഷന്മാരും 794,923 സ്ത്രീകളും. കുവൈത്തി ഇതര പുരുഷന്മാരുടെ എണ്ണം 2,259,690 ഉം കുവൈത്തി ഇതര സ്ത്രീകളുമാണ് 1,160,153 ഉം ആണ്. തൊഴില്‍ കാര്യത്തില്‍ സര്‍ക്കാര്‍ ജീവനക്കാരില്‍ 78 ശതമാനം കുവൈത്തികളും 22 ശതമാനം പ്രവാസികളുമാണ്.

സ്വകാര്യ മേഖലയില്‍ പക്ഷേ കുവൈത്തികള്‍ നാല് ശതമാനത്തില്‍ കവിയുന്നില്ല. സ്വകാര്യമേഖലയിലെ 96 ശതമാനവും വിദേശികളാണ്. ആകെ പ്രവാസി തൊഴിലാളികളുടെ എണ്ണം 2,560,252 ആണ്. കുവൈത്ത് തൊഴിലാളികള്‍ 540,878 ഉം. 
ഗാര്‍ഹിക തൊഴിലാളികളുടെ എണ്ണം 780,930 ആയി. പ്രവാസി കുടുംബങ്ങളിലെ ശരാശരി രണ്ട് അംഗങ്ങള്‍ മാത്രമുള്ളപ്പോള്‍, ശരാശരി കുവൈത്ത് കുടുംബത്തില്‍ ഏഴ് അംഗങ്ങളാണുള്ളതെന്നും സ്ഥിതിവിവരക്കണക്കുകള്‍ വെളിപ്പെടുത്തി. 

ആയിരം ജനസംഖ്യയില്‍ ജനനനിരക്ക് കുവൈത്തികള്‍ക്ക് 21 ഉം കുവൈത്തികളല്ലാത്തവര്‍ക്ക് നാലും ആണ്. ജനസംഖ്യയുടെ കാര്യത്തില്‍ വിദേശ പൗരന്മാരില്‍ ഇന്ത്യക്കാര്‍ ആണ് ഒന്നാം സ്ഥാനത്ത്. പത്തുലക്ഷത്തിലധികം ഇന്ത്യക്കാരാണ് കുവൈത്തിലുള്ളത്. തൊട്ടുപിന്നാലെ ഈജിപ്തുകാരാണ്. ബംഗ്ലാദേശികള്‍, ഫിലിപ്പിനോകള്‍, സിറിയക്കാര്‍, ശ്രീലങ്കക്കാര്‍, സഊദികള്‍, നേപ്പാളികള്‍, പാകിസ്ഥാനികള്‍, ജോര്‍ദാനികള്‍ എന്നിവരാണ് യഥാക്രമം പിന്നിലുള്ളത്.

Statistics issued by the Public Authority for Civil Information (PACI) reveal that the number of Kuwaiti citizens reached 1,567,983 as of the end of December 2024, and the number of non-Kuwaitis totaled 3,419,843.