ഇടുക്കി: ഏലപ്പാറ ടൗണിന് സമീപം വാഗമൺ റോഡിൽ നിർത്തിയിട്ട കാറിൽ യുവാവിന്റെ മൃതദേഹം കണ്ടെത്തി. ഏലപ്പാറ തണ്ണിക്കാനം പുത്തൻ പുരക്കൽ ഷക്കീർ ഹുസൈനാണ് (32) മരിച്ചത്. ഏലപ്പാറയിൽ മത്സ്യവ്യാപാരം നടത്തിവന്നിരുന്ന ഷക്കീറിനെ കാണാതായതിനെ തുടർന്ന് ബന്ധുക്കൾ നടത്തിയ അന്വേഷണത്തിനൊടുവിലാണ് ഞായറാഴ്ച പുലർച്ചെ കാർ കണ്ടെത്തിയത്.

കാറിന്റെ പിൻസീറ്റിൽ ഡോർ തുറന്ന നിലയിൽ മൃതദേഹം കണ്ടെത്തിയതായി ദൃക്സാക്ഷികൾ പറഞ്ഞു. വാഹനത്തിനുള്ളിൽ രക്തക്കറയും കണ്ടെത്തി. മരണത്തിൽ ദുരൂഹതയുണ്ടെന്ന് ആരോപിച്ച് ഷക്കീറിന്റെ ബന്ധുക്കൾ രംഗത്തെത്തി.

വിവരമറിഞ്ഞ് പീരുമേട് പൊലീസ് സ്ഥലത്തെത്തി അന്വേഷണം ആരംഭിച്ചു. ഫോറൻസിക് വിഭാഗം തെളിവുകൾ ശേഖരിച്ചു. സമീപത്തെ സിസിടിവി ദൃശ്യങ്ങളും പൊലീസ് പരിശോധിക്കുന്നുണ്ട്. മൃതദേഹം പോസ്റ്റ്മോർട്ടത്തിനായി ആശുപത്രിയിലേക്ക് മാറ്റി. പോസ്റ്റ്മോർട്ടം റിപ്പോർട്ട് ലഭിച്ചാലേ മരണകാരണം വ്യക്തമാകൂവെന്ന് പൊലീസ് അറിയിച്ചു. ഷക്കീറിന്റെ ബന്ധുക്കളുടെ പരാതിയിൽ പീരുമേട് പൊലീസ് കേസെടുത്ത് തുടർനടപടികൾ സ്വീകരിച്ചുവരികയാണ്.