വത്തിക്കാന്‍ സിറ്റി: പുതിയ പോപ്പായി തെരഞ്ഞെടുക്കപ്പെട്ട ലിയോ പതിനാലാമന്‍ മാര്‍പാപ്പയുടെ സെന്റ് പീറ്റേഴ്‌സ് ചത്വരത്തില്‍ വച്ചുള്ള ആദ്യ സന്ദേശം യുദ്ധം അവസാനിപ്പിക്കുന്നത് സംബന്ധിച്ച്. എല്ലാ യുദ്ധങ്ങളും അവസാനിപ്പിക്കണമെന്ന് അഭ്യര്‍ഥിച്ച മാര്‍പാപ്പ, ഗസ്സയിലും ഉക്രൈനിലും വെടിനിര്‍ത്താന്‍ ആഹ്വാനംചെയ്യുകയും ഇന്ത്യയും പാകിസ്താനും തമ്മിലുള്ള വെടിനിര്‍ത്തലിനെ പ്രശംസിക്കുകയും ചെയ്തു.

കത്തോലിക്കാ സഭയുടെ മേധാവിയായി തിരഞ്ഞെടുക്കപ്പെട്ടതിനുശേഷമുള്ള തന്റെ ആദ്യ ഞായറാഴ്ച അനുഗ്രഹപ്രഭാഷണത്തിലാണ് പോപ്പ് സാധാനത്തിന്റെ ആവശ്യകതയെക്കുറിച്ച് ലോകത്തെ ഓര്‍മിപ്പിച്ചത്. പോപ്പിനെ കേള്‍ക്കാന്‍ വത്തിക്കാന്‍ സിറ്റിയിലെ സെന്റ് പീറ്റേഴ്‌സ് ചത്വരത്തില്‍ ആയിരക്കണക്കിന് വിശ്വാസികളാണ് തടിച്ചുകൂടിയത്.
ഉക്രൈനില്‍ നീതിയുക്തവും ശാശ്വതവുമായ സമാധാനം കൊണ്ടുവരണമെന്നും ഗസ്സയില്‍ ഉടന്‍ വെടിനിര്‍ത്തല്‍ പ്രഖ്യാപിക്കമമെന്നും   അദ്ദേഹം പറഞ്ഞു. ഇന്ത്യയും പാകിസ്ഥാനും തമ്മിലുള്ള സമീപകാല വെടിനിര്‍ത്തല്‍ പ്രഖ്യാപനത്തെ ലിയോ പതിനാലാമന്‍ മാര്‍പ്പാപ്പ സ്വാഗതം ചെയ്തതായും വരാനിരിക്കുന്ന ചര്‍ച്ചകളിലൂടെ ശാശ്വത കരാറില്‍ ഉടന്‍ എത്തിച്ചേരുമെന്ന് അദ്ദേഹം പ്രതീക്ഷിക്കുന്നുവെന്നും വത്തിക്കാന്‍ വാര്‍ത്താക്കുറിപ്പില്‍ പറഞ്ഞു.

മാതൃദിനമായ ഇന്നലെ സ്വര്‍ഗ്ഗത്തിലുള്ളവര്‍ ഉള്‍പ്പെടെ എല്ലാ മാതാക്കള്‍ക്കും ആശംസകള്‍ നേര്‍ന്നാണ് അദ്ദേഹം പ്രസംഗം തുടങ്ങിയത്.