റിയാദ്: യു.എസ് പ്രസിഡന്റായ ശേഷമുള്ള ഡൊണാള്‍ഡ് ട്രംപിന്റെ ആദ്യ വിദേശപര്യടനം ഗള്‍ഫ് രാഷ്ട്രങ്ങളിലേക്കായിരുന്നു. 

ചൊവ്വാഴ്ച സഊദി അറേബ്യയിലെത്തിയ ട്രംപ് സഊദി കിരീടാവകാശി മുഹമ്മദ് ബിന്‍ സല്‍മാനുമായി ഉഭയകക്ഷി ചര്‍ച്ചനടത്തി.

 

പ്രതിരോധ മേഖലയില്‍ ചരിത്രത്തിലെ ഏറ്റവും വലിയ ആയുധ വില്‍പ്പന കരാറില്‍ ആണ് യുഎസും സഊദിയും ഒപ്പുവച്ചത്. 14,200 കോടി ഡോളറിന്റെ കരാറിലാണ് ഇരു രാജ്യങ്ങളും ഒപ്പുവച്ചത്. 

 

രണ്ട് പ്രസിഡന്റ് കാലാവധികളിലായി രണ്ടാം തവണയാണ് ട്രംപ് സഊദിയില്‍ എത്തുന്നത്. 

 

രണ്ട് തവണയും ട്രംപ് ആദ്യ സന്ദര്‍ശനത്തിനായി സഊദിയെ തിരഞ്ഞെടുത്തത് ഏറ്റവും ശക്തമായ അറബ് രാജ്യങ്ങളിലൊന്നായ സഊദിയുടെ സ്ഥാനമാണ് വ്യക്തമാക്കുന്നത്. 

 

ടെസ്ല മോവി ഇലോണ്‍ മസ്‌ക്, മെറ്റ സിഇഒ മാര്‍ക് സുകര്‍ബര്‍ഗ്, ഓപ്പണ്‍ എ.ഐ മേധാവി സാം ആള്‍ട്ട്മാന്‍, ഗൂഗ്ള്‍ പ്രതിനിധി, ആമസോണ്‍ പ്രതിനിധി തുടങ്ങി ആഗോള ബിസിനസ് പ്രമുഖരും ട്രംപിനൊപ്പം ഉണ്ടായിരുന്നു.

 

പിന്നാലെ ഉറബ് ഉച്ചകോടിയിലും ട്രംപ് പങ്കെടുത്തു. ഖത്തര്‍ അമീര്‍ ശൈഖ് തമീം ബിന്‍ ഹമദ് അല്‍താനി, കുവൈത്ത് അമീര്‍ ശൈഖ് മിഷാല്‍ അല്‍ അഹ്മദ് അല്‍ സബാഹ്, അബൂദാബി കിരീടാവകാശി ശൈഖ് ഖാലിദ് ബിന്‍ മുഹമ്മദ് ബിന്‍ സായിദ്, ഒമാന്‍ ഉപപ്രധാനമന്ത്രി അസാദ് ബിന്‍ താരിഖ് അല്‍ സായിദ്, ബഹ്‌റൈന്‍ രാജാവ് ഹമദ് ബിന്‍ ഈസ ആല്‍ ഖലീഫ എന്നിവര്‍ ഗള്‍ഫ് അമേരിക്കന്‍ ഉച്ചകോടിക്ക് എത്തിയത്.

ഇതിനിടെ റിയാദ് കൊട്ടാരത്തില്‍ വച്ച് സിറിയന്‍ ഭരണാധികാരി അഹമ്മ്ദ അല്‍ ഷറാ (ജുലാനി)യുമായും ട്രംപ് കൂടിക്കാഴ്ച നടത്തി.

 

സഊദി സന്ദര്‍ശനം പൂര്‍ത്തിയാക്കിയ ട്രംപ് പിന്നീട് ഖത്തറിലേക്കാണ് പോയത്. ഗസ്സ ഉള്‍പ്പെടെയുള്ള വിഷയങ്ങളിലെ മധ്യസ്ഥ രാജ്യം കൂടിയാണ് ഖത്തര്‍. 

 

ട്രംപിനെയും അദ്ദേഹത്തിന്റെ കൂടെയുണ്ടായിരുന്ന പ്രതിനിധി സംഘത്തെയും ആദരിക്കുന്നതിനായി ലുസൈല്‍ കൊട്ടാരത്തില്‍ അമീര്‍ ഷെയ്ഖ് തമീം ബിന്‍ ഹമദ് അല്‍താനി അത്യാഡംബര ഡിന്നര്‍ ആണ് ഒരുക്കിയത്. 

ഇരു രാജ്യങ്ങളും തമ്മില്‍ സുപ്രധാനമായ നിരവധി പ്രതിരോധ വാണിജ്യ കരാറുകളിലും ഒപ്പുവച്ചു. ഖത്തര്‍ എയര്‍വെയ്‌സ് യു.എസില്‍ നിന്ന് 160 ബോയിങ് വിമാനങ്ങള്‍ വാങ്ങുന്നതിന് ഒപ്പുവച്ച കരാറാണ് ഇതില്‍ പ്രധാനപ്പെട്ടത്. 

 

20,000 കോടി ഡോളറിന്റെ കരാറിലാണ് ഇരു നേതാക്കളും ഒപ്പുവച്ചത്.

 

ശതകോടികളുടെ പ്രതിരോധ സഹകരണം, എം.ക്യു9ബി ആളില്ലാ വിമാനങ്ങള്‍ വാങ്ങുന്നത് തുടങ്ങിയ കരാറുകളിലും ഒപ്പുവച്ചു. പെന്റഗണ്‍ മേധാവി പീറ്റ് ഹെഗ്‌സതാണ് യു.എസിനു വേണ്ടി പ്രതിരോധ കരാറിലൊപ്പുവച്ചത്.

2003ല്‍ ജോര്‍ജ് ഡബ്ല്യു ബുഷ് നടത്തിയ സന്ദര്‍ശനത്തിനു ശേഷം ഒരു യു.എസ് പ്രസിഡന്റ് ഖത്തര്‍ സന്ദര്‍ശിക്കുന്നത് ആദ്യമായാണ്. 

ഇന്ന് അബൂദബി സന്ദര്‍ശിക്കുന്ന ട്രംപ് അതു കഴിഞ്ഞ് തുര്‍ക്കിയിലേക്കു പോകും.

US President Donald Trump's historic Gulf tour: In pictures