വാഷിങ്ടൺ: അമേരിക്കയുടെ മിഡ്‌വെസ്റ്റ് മേഖലയിൽ വീശിയടിച്ച ശക്തമായ ചുഴലിക്കാറ്റിൽ 27 പേർ മരിച്ചു. കെന്റക്കി, മിസോറി, വിർജീനിയ എന്നീ സംസ്ഥാനങ്ങളിലാണ് കനത്ത നാശനഷ്ടമുണ്ടായത്. കെന്റക്കിയിൽ 18 പേരും മിസോറിയിൽ ഏഴ് പേരും വിർജീനിയയിൽ രണ്ട് പേരും മരിച്ചതായി അധികൃതർ അറിയിച്ചു. ഡസൻ കണക്കിന് ആളുകൾക്ക് പരിക്കേറ്റു.

മിസോറിയിലെ സെന്റ് ലൂയിസ് നഗരത്തിൽ വെള്ളിയാഴ്ച സെന്റിനൽ ക്രിസ്ത്യൻ പള്ളിയുടെ ഒരു ഭാഗം തകർന്നുവീണു. ഈ അപകടത്തിൽ ഒരാൾ മരിച്ചു. മരണസംഖ്യ ഇനിയും ഉയർന്നേക്കാമെന്ന് ഉദ്യോഗസ്ഥർ മുന്നറിയിപ്പ് നൽകി.

മിസോറിയിൽ 5,000-ലേറെ കെട്ടിടങ്ങൾക്ക് കേടുപാടുകൾ സംഭവിച്ചു. മേൽക്കൂരകൾ തകർന്നും വൈദ്യുതി ലൈനുകൾ തകർന്നും വൻനാശം വിതച്ചു. ശനിയാഴ്ച ഉച്ചയോടെ മിസോറിയിലും കെന്റക്കിയിലും 1.4 ലക്ഷം പ്രോപ്പർട്ടികളിൽ വൈദ്യുതി വിച്ഛേദിക്കപ്പെട്ടു. സെന്റ് ലൂയിസിൽ അഗ്നിശമന സേന വീടുകൾ തോറും തിരച്ചിൽ നടത്തുകയാണ്.

 

 

സെന്റ് ലൂയിസ് മേയർ കാര സ്പെൻസർ പറഞ്ഞു: "38-ലേറെ പേർക്ക് പരിക്കേറ്റിട്ടുണ്ട്. തകർന്ന കെട്ടിടങ്ങളും കടപുഴകി വീണ മരങ്ങളുമാണ് പരിക്കിന് പ്രധാന കാരണം. ജീവൻ നഷ്ടപ്പെട്ടതും നാശനഷ്ടവും ഭയാനകമാണ്. രക്ഷാപ്രവർത്തനവും സുരക്ഷ ഉറപ്പാക്കലുമാണ് ഇപ്പോഴത്തെ മുൻഗണന."

സെന്റ് ലൂയിസ് മൃഗശാലയ്ക്കും 1904 ഒളിമ്പിക് ഗെയിംസ് നടന്ന ഫോറസ്റ്റ് പാർക്കിനും സമീപം ശനിയാഴ്ച ഉച്ചയ്ക്ക് 2:30-നാണ് ടൊർണാഡോ ആഞ്ഞടിച്ചതെന്ന് നാഷണൽ വെതർ സർവീസ് റഡാർ സ്ഥിരീകരിച്ചു. ഏറ്റവും കൂടുതൽ നാശനഷ്ടമുണ്ടായ പ്രദേശങ്ങളിൽ രാത്രി 9 മുതൽ രാവിലെ 6 വരെ കർഫ്യൂ ഏർപ്പെടുത്തി.

 

 

അയൽസംസ്ഥാനമായ ഇല്ലിനോയിസിലും ചുഴലിക്കാറ്റ് റിപ്പോർട്ട് ചെയ്തു. കിഴക്കോട്ട് അറ്റ്ലാന്റിക് തീരം വരെ കഠിനമായ കാലാവസ്ഥ വ്യാപിക്കുന്നതായി യുഎസ് നാഷണൽ വെതർ സർവീസ് മുന്നറിയിപ്പ് നൽകി. വടക്കൻ ടെക്സസിൽ വാരാന്ത്യത്തിൽ ശക്തമായ കൊടുങ്കാറ്റുകൾക്ക് സാധ്യതയുണ്ടെന്നും അറിയിപ്പുണ്ട്.

'ടൊർണാഡോ ആലി' എന്നറിയപ്പെടുന്ന യുഎസിന്റെ മധ്യഭാഗത്താണ് ഈ ദുരന്തം അരങ്ങേറിയത്. മെയ്, ജൂൺ മാസങ്ങളിലാണ് സാധാരണയായി ഇത്തരം ടൊർണാഡോകൾ കൂടുതലായി ഉണ്ടാകാറ്. 2000 മുതൽ കെന്റക്കിയിൽ ഓരോ മെയ് മാസവും ശരാശരി അഞ്ച് ടൊർണാഡോകളും മിസോറിയിൽ 16 എണ്ണവും റിപ്പോർട്ട് ചെയ്യപ്പെട്ടിട്ടുണ്ട്.