ബംഗളൂരു: തകര്‍ന്ന റോഡുകളും തീരാത്ത ഗതാഗതക്കുരുക്കും. രാജ്യത്തെ വമ്പന്‍ നഗരങ്ങളിലൊന്നായ ബംഗളൂരുവിന്റെ അവസ്ഥയാണിത്. ഈ സാഹചര്യം മൂലം തനിക്കുണ്ടായ കഷ്ടതകള്‍ക്ക് നഷ്ടപരിഹാരം ആവശ്യപ്പെട്ട് നഗരസഭയെ സമീപിച്ചിരിക്കുകയാണ് ഒരു യുവാവ്. റിച്ച്‌മോണ്ട് ടൗണില്‍ താമസിക്കുന്ന ദിവ്യ കിരണാണ് പരാതി നല്‍കിയത്. 

നഗരത്തിലെ ശോചനീയമായ റോഡുകള്‍ കാരണം തന്റെ കഴുത്തിനും നട്ടെല്ലിനും ഗുരുതരമായ പരിക്കുകളേറ്റുവെന്ന് ചൂണ്ടിക്കാട്ടി ബൃഹത് ബെംഗളൂരു മഹാനഗര പാലികെ (ബിബിഎംപിക്കെതിരെ അയച്ച വക്കീല്‍ നോട്ടിസില്‍ യുവാവ് ആവശ്യപ്പെടുന്നു.   കുഴികളും വെള്ളക്കെട്ടുകളും നിറഞ്ഞ റോഡുകളില്‍ ആവര്‍ത്തിച്ച് യാത്ര ചെയ്യുന്നത് ദീര്‍ഘകാല ആരോഗ്യപ്രശ്‌നങ്ങള്‍ക്ക് കാരണമായെന്ന് നോട്ടിസില്‍ ചൂണ്ടിക്കാട്ടുന്നു. മെയ് 14നാണ് നോട്ടിസ് അയച്ചത്. 
ആരോഗ്യം മോശമായതു മൂലം അഞ്ച് തവണ ഓര്‍ത്തോ ഡോക്ടറെ കണ്ടെന്നും ആശുപത്രി സന്ദര്‍ശനങ്ങള്‍ പതിവാണെന്നും നോട്ടിസില്‍ പറയുന്നുണ്ട്.

'ദീര്‍ഘകാലമായുള്ള വേദന കാരണം ഉത്കണ്ഠ, ഉറക്കമില്ലായ്മ തുടങ്ങിയ മാനസിക ബുദ്ധിമുട്ടുകളും അനുഭവിക്കേണ്ടി വന്നു,' കിരണിന്റെ അഭിഭാഷകന്‍ പറഞ്ഞു. കൂടാതെ വ്യക്തിപരവും തൊഴില്‍പരവുമായ ജീവിതത്തിലെ തടസങ്ങള്‍ക്കും നഷ്ടപരിഹാരം നല്‍കണമെന്ന് കിരണ്‍ ആവശ്യപ്പെട്ടു. തകര്‍ന്ന റോഡുകള്‍ നട്ടെല്ലിന്റെയും കഴുത്തിന്റെയും അവസ്ഥ വഷളാക്കിയതിനാല്‍ ഓട്ടോയിലോ ഇരുചക്രവാഹനങ്ങളിലോ യാത്ര ചെയ്യാന്‍ കഴിയില്ല- കിരണ്‍ പറഞ്ഞു. 15 ദിവസത്തിനുള്ളില്‍ ബിബിഎംപി മറുപടി നല്‍കിയില്ലെങ്കില്‍ നിയമനടപടി സ്വീകരിക്കുമെന്നും നോട്ടിസില്‍ പറയുന്നു. ബിബിഎംപിക്ക് നല്‍കിയ നോട്ടീസിന് 10,000 രൂപ ചാര്‍ജായി നല്‍കണമെന്നും കിരണ്‍ ആവശ്യപ്പെടുന്നു. 

ബംഗളൂരുവില്‍ ഈയിടെയുണ്ടായ കനത്ത മഴ നഗരത്തിലെ റോഡുകളെ കൂടുതല്‍ ശോചനീയാവസ്ഥയിലാക്കിയിരിക്കുകയാണ്. പല പ്രദേശങ്ങളും വെള്ളത്തിനടിയിലായതത് ഗതാഗതത്തേയും ബാധിച്ചിട്ടുണ്ട്. മറ്റുള്ളവരെ പോലെ റോഡുകളെ ദുരവസ്ഥയില്‍ അധികാരികള്‍ക്ക് നിരവധി തവണ പരാതി നല്‍കിയിരുന്നു. എന്നാല്‍ യാതൊരു പ്രതികരണവുമുണ്ടായില്ല. കിരണ്‍ കൂട്ടിച്ചേര്‍ത്തു. 

'ആവശ്യമെങ്കില്‍ പൊതുതാല്‍പര്യ ഹരജി ഫയല്‍ ചെയ്യുമെന്ന് പറഞ്ഞ കിരണ്‍ ഞാന്‍ എന്തിന് കഷ്ടപ്പെടണമെന്നും ചോദിക്കുന്നു. നോട്ടിസിന് ബിബിഎംപി ഇതുവരെ മറുപടി നല്‍കിയിട്ടില്ല.
    

A Bangalore resident, Divya Kiran, has sent a legal notice to BBMP demanding compensation for severe neck and spinal injuries caused by pothole-ridden roads.