ഡൽഹി: 2025 ഐപിഎൽ സീസണിലെ അവസാന മത്സരത്തിന് ഒരുങ്ങിയിരിക്കുകയാണ് രാജസ്ഥാൻ റോയൽസ്. ഇന്ന് രാത്രി ഡൽഹി അരുൺ ജെയ്റ്റ്‌ലി സ്റ്റേഡിയത്തിൽ നടക്കുന്ന മത്സരത്തിൽ ചെന്നൈ സൂപ്പർ കിങ്സിനയാണ് രാജസ്ഥാൻ നേരിടുക. ഈ സീസണിൽ ഇരു ടീമുകൾക്കും അത്ര മികച്ച പ്രകടനം പുറത്തെടുക്കാൻ സാധിച്ചിട്ടില്ല.

13 മത്സരങ്ങളിൽ നിന്നും മൂന്ന് വിജയവും 10 തോൽവിയുമായി ആറ് പോയിന്റോടെ ഒമ്പതാം സ്ഥാനത്താണ് രാജസ്ഥാൻ റോയൽസ്. മറുഭാഗത്ത് 12 മത്സരങ്ങളിൽ നിന്നും മൂന്ന് വിജയവും ഒമ്പത് തോൽവിയും അടക്കം ആറ് പോയിന്റുമായി അവസാനം സ്ഥാനത്താണ് ചെന്നൈ. അതുകൊണ്ടുതന്നെ സീസണിലെ അവസാന മത്സരത്തിൽ വിജയിച്ചുകൊണ്ട് തലയുയർത്തി മടങ്ങാനാവും രാജസ്ഥാൻ ലക്ഷ്യം വെക്കുക. 

ഈ മത്സരത്തിൽ രാജസ്ഥാൻ റോയൽസ് നായകൻ സഞ്ജു സാംസണിന് ടി-20യിലെ ഒരു പുതിയ നാഴികക്കല്ല് സ്വന്തമാക്കാൻ സാധിക്കും. മത്സരത്തിൽ രണ്ട് സിക്‌സറുകൾ കൂടി നേടിയാൽ ടി-20യിൽ 350 സിക്‌സറുകൾ പൂർത്തിയാക്കാൻ സഞ്ജുവിന് സാധിക്കും. 348 സിക്സുകളാണ് സഞ്ജു ഇതുവരെ ടി-20യിൽ അടിച്ചെടുത്തിട്ടുള്ളത്. മൂന്ന് ഇന്ത്യൻ താരങ്ങൾക്ക് മാത്രമേ ടി-20യിൽ 350 സിക്സുകൾ പൂർത്തിയാക്കാൻ സാധിച്ചിട്ടുള്ളൂ. രോഹിത് ശർമ്മ, വിരാട് കോഹ്‌ലി, സൂര്യകുമാർ യാദവ് എന്നിവരാണ് ഇതിനു മുമ്പ് ഈ നേട്ടം കൈവരിച്ചിട്ടുള്ളത്. 

ഈ സീസണിൽ പരുക്കേറ്റത്തിന് പിന്നാലെ സഞ്ജുവിന് ധാരാളം മത്സരങ്ങൾ നഷ്ടമായിരുന്നു. ഡൽഹി ക്യാപ്പിറ്റൽസിനെതിരായ മത്സരത്തിലാണ് പരുക്കേറ്റ് സഞ്ജു പുറത്തായത്. മത്സരത്തിൽ റിട്ടയേർഡ് ഹാർട്ടായാണ് സഞ്ജു മടങ്ങിയത്. മത്സരത്തിൽ 19 പന്തിൽ 31 റൺസായിരുന്നു സഞ്ജു നേടിയിരുന്നത്. രണ്ട് ഫോറുകളും ഒരു സിക്‌സും നേടിക്കൊണ്ട് മിന്നും ഫോമിൽ തുടരവെയാണ് സഞ്ജുവിനു ഈ തിരിച്ചടി നേരിടേണ്ടി വന്നത്. ഇതോടെ രാജസ്ഥാൻ റോയൽസിന്റെ ചരിത്രത്തിൽ ആദ്യമായി പരുക്കേറ്റ് റിട്ടയർഡ് ഹർട്ട് ആവുന്ന താരമായും സഞ്ജു മാറി. 

അവസാന മത്സരത്തിൽ പഞ്ചാബ് കിങ്സിനെതിരെയാണ് സഞ്ജുവും സംഘവും തോൽവി വഴങ്ങിയത്. മത്സരത്തിൽ രാജസ്ഥാൻ 10 റൺസിനാണ് പരാജയപ്പെട്ടത്.  മത്സരത്തിൽ ആദ്യം ബാറ്റ് ചെയ്ത പഞ്ചാബ് 20 ഓവറിൽ അഞ്ച് വിക്കറ്റ് നഷ്ടത്തിലാണ് 219 റൺസ് ആണ് നേടിയത്. വിജയലക്ഷ്യം പിന്തുടർന്നിറങ്ങിയ രാജസ്ഥാൻ ഇന്നിംഗ്സ് ഏഴ് വിക്കറ്റ് നഷ്ടത്തിൽ 209 റൺസിൽ അവസാനിക്കുകയായിരുന്നു.

Sanju Samson Need Two Six To Create A Historical Record In T20 Cricket