അലനല്ലൂർ (പാലക്കാട്): ജനവാസമേഖലയ്ക്കു സമീപം കൃഷിയിടത്തിൽ കാട്ടാനയുടെ ആക്രമണത്തിൽ കർഷകൻ കൊല്ലപ്പെട്ടു.

എടത്തനാട്ടുകര കോട്ടപ്പള്ള എം.ഇ.എസ് പടിയിൽ വാലിപ്പറമ്പൻ ഉമ്മർ (70)ആണ് മരിച്ചത്. ഇന്നലെ വൈകിട്ട് നാലോടെയാണ് ഇദ്ദേഹത്തിന്റെ മൃതദേഹം കൃഷിയിടത്തിൽ നാട്ടുകാർ കണ്ടത്. മുഖത്തും തലയിലും പരുക്കുകളുണ്ട്.  വനത്തിനടുത്തുള്ള ചോലമണ്ണ് ഭാഗത്ത് മൂന്നേക്കറിൽ ഉമ്മർ റബറും കുരുമുളകും കൃഷി ചെയ്ത് വരികയാണ്. കൃഷിയിടത്തിലേക്കു പോയ ഉമ്മറിനെ കാണാതായതിനെ തുടർന്നു നടത്തിയ അന്വേഷണത്തിലാണ് മരിച്ചനിലയിൽ കണ്ടെത്തിയത്.

ഉമ്മറിന്റെ കൃഷിഭൂമിക്കു തൊട്ടടുത്തുള്ള മറ്റൊരുകർഷകന്റെ കൃഷിയിടത്തിലാണ് മൃതദേഹം കിടന്നിരുന്നത്. രാത്രി എട്ടുമണിയോടെ നാട്ടുകാരും പൊലിസും വനപാലകരുമെല്ലാം ചേർന്ന് മൃതദേഹം താഴേക്കെത്തിച്ചു. കൃഷിയിടത്തിലേക്കുള്ള വഴി ദുർഘടമായതിനാൽ ജീപ്പിലാണ് മൃതദേഹം താഴേക്കു കൊണ്ടുവന്നത്. തുടർന്ന് പോസ്റ്റ്‌മോർട്ടത്തിനായി പാലക്കാട് ജില്ലാ ആശുപത്രിയിലേക്കു കൊണ്ടുപോയി. 
ചോലമണ്ണിന്റെ താഴെ ഭാഗത്ത് നിരവധി കുടുംബങ്ങൾ താമസിക്കുന്നുണ്ട്. ഇവിടെനിന്ന് കുന്നുകയറി വേണം കൃഷിഭൂമിയിലെത്താൻ.

മണ്ണാർക്കാട് ഡി.എഫ്.ഒ.സി അബ്ദുൽ ലത്തീഫ്, റെയ്ഞ്ച് ഓഫിസർ എൻ. സുബൈർ, തിരുവിഴാംകുന്ന് ഫോറസ്റ്റ് സ്റ്റേഷൻ ഡെപ്യുട്ടി റെയ്ഞ്ച് ഫോറസ്റ്റ് ഓഫിസർ കെ. സുനിൽകുമാർ എന്നിവർ സ്ഥലത്തെത്തി.
ഉമ്മറിന്റെ ഭാര്യ സുലൈഖ. മക്കൾ: ശൈനി, ജഷിയ, ഷാനിഫ. മരുമക്കൾ: ഷൗകത്ത്, ഹമീദ്, ഹനീഫ.