അബൂദബി: യു.എ.ഇയിലെ പ്രാദേശിക ഉത്പന്നങ്ങളുടെ പ്രാധാന്യവും മികവും വിളംബരം ചെയ്യുന്ന 'മേക് ഇറ്റ് ഇൻ ദി എമിേററ്റ്സ് ഫോറ'ത്തിന് അബൂദബിയിൽ ഉജ്വല തുടക്കം. ഈ മാസം 22 വരെ നീളുന്ന പ്രദർശനം പ്രാദേശിക ഉത്പന്നങ്ങളുടെ ഗുണമേന്മ എടുത്തു കാട്ടുന്നതാണ്. ഭക്ഷ്യോത്പന്നങ്ങൾ, സ്റ്റീൽ, ആരോഗ്യം, ഐ.ടി, ടൂറിസം, ആർട്ടിഫിഷ്യൽ ഇന്റലിജൻസ് തുടങ്ങി വിവിധ മേഖലകളിൽ നിന്നുള്ള 720ലേറെ കമ്പനികൾ ഫോറത്തിൽ പങ്കെടുക്കുന്നുണ്ട്. യു.എ.ഇയിൽ നിന്നുള്ള 3,800 ഉത്പന്നങ്ങളുടെ പ്രദർശനവുമുണ്ട്.
കെസാദ് ഗ്രൂപ്, എമിറേറ്റ്സ് സ്റ്റീൽ, സിലാൽ, എഡ്ജ് തുടങ്ങിയ വിവിധ കമ്പനികൾ ഏറ്റവും പുതിയ ഉത്പന്നങ്ങളും ഫോറത്തിൽ അവതരിപ്പിക്കുന്നുണ്ട്.

പ്രമുഖ റീട്ടെയ്ൽ ബ്രാൻഡായ ലുലു ഗ്രൂപ് മികച്ച പ്രദർശന സ്റ്റാൾ 'മേക് ഇറ്റ് ഇൻ ദി എമിറേറ്റ്സ് ഫോറ'ത്തിൽ സജ്ജീകരിച്ചിട്ടുണ്ട്. യു.എ.ഇയിലെ പ്രാദേശിക ഉത്പന്നങ്ങൾക്ക് ലുലു നൽകുന്ന പിന്തുണയും പ്രോത്സാഹനവും വ്യക്തമാക്കുന്ന പ്രദർശനവും ഒരുക്കിയിട്ടുണ്ട്. മേക് ഇറ്റ് ഇൻ ദി എമിറേറ്റ്സ് കാംപയിൻ ഭാഗമായി ലുലു സ്റ്റോറുകളിൽ പ്രാദേശിക ഉത്പന്നങ്ങൾക്ക് കൂടുതൽ വിപണി സാധ്യത ലുലു ഉറപ്പാക്കിയിരുന്നു.

ഇതിന്റെ തുടർച്ചയായി പുതിയ ഉത്പന്നങ്ങൾ ഫോറത്തിൽ അവതരിപ്പിച്ചു. 5,000ത്തിലേറെ യു.എ.ഇ ഉത്പന്നങ്ങൾ ലുലു സ്റ്റോറുകളിൽ ലഭ്യമാക്കിയിട്ടുണ്ടെന്നും, പ്രാദേശിക ഉത്പന്നങ്ങൾക്ക് മികച്ച പിന്തുണ ഉറപ്പാക്കുകയാണ് ലക്ഷ്യമെന്നും ലുലു റീട്ടെയ്ൽ സി.ഇ.ഒ സെയ്ഫി രൂപാവാല പറഞ്ഞു. യു.എ.ഇയുടെ വിഷൻ 2031ന് കരുത്തേകുന്ന മേക് ഇറ്റ് ഇൻ ദി എമിറേറ്റ്സ് കാംപയിന് പൂർണ പിന്തുണയാണ് ലുലു നൽകുന്നതെന്നും അദ്ദേഹം വ്യക്തമാക്കി. 
ലുലു റീട്ടെയ്ൽ ചീഫ് ഓപറേറ്റിങ്ങ് ആൻഡ് സ്ട്രാറ്റജി ഓഫിസർ സലിം വി.ഐ, ലുലു റീട്ടെയൽ പ്രൈവറ്റ് ലേബൽസ് ഡയരക്ടർ ഷമീം സൈനുൽ അബ്ദീൻ, ലുലു മാർക്കറ്റിങ്ങ് ആൻഡ് കമ്മ്യൂണിക്കേഷൻസ് ഡയരക്ടർ വി.നന്ദകുമാർ, അബൂദബി റീജിയൻ ഡയരക്ടർ അബൂബക്കർ.ടി, അൽ തയിബ് ഡയരക്ടർ റിയാദ് ജബ്ബാർ തുടങ്ങിയവരും പരിപാടിയിൽ പങ്കെടുത്തു.

The ‘Make It in the Emirates Forum’ promotes locally made UAE products, with Lulu Group announcing plans to stock more UAE-made goods across its stores.