തിരുവനന്തപുരം: കരാർ തൊഴിലാളികളുടെ ഇ.എസ്.ഐ വിഹിതം അടയ്ക്കാത്തതിനെ തുടർന്ന് ഇ.എസ്.ഐ കോർപറേഷൻ കെ.എസ്.ഇ.ബിയുടെ അക്കൗണ്ട് മരവിപ്പിക്കുകയും അക്കൗണ്ടിൽ നിന്നു 31 കോടി രൂപ പിടിച്ചെടുക്കുകയും ചെയ്തു. മാർച്ച്, ഏപ്രിൽ മാസങ്ങളിലായാണ് ബോർഡിന്റെ എസ്.ബി.ഐ തിരുവനന്തപുരം പട്ടം ശാഖയിലെ പ്രധാന അക്കൗണ്ടും കനറാ ബാങ്കിന്റെ കന്റോൺമെന്റ് ശാഖയിലെ കലക്ഷൻ അക്കൗണ്ടും മരവിപ്പിച്ചത്. ഇ.എസ്.ഐ തുക അടയ്ക്കണമെന്ന് ആവശ്യപ്പെട്ട് പലതവണ നോട്ടിസ് നൽകിയിട്ടും അനുകൂല മറുപടി ലഭിക്കാതായതോടെയാണ് നടപടി.

31 കോടിയോളം രൂപ ഇ.എസ്.ഐ കോർപറേഷൻ പിടിച്ചെടുത്തിട്ടും കരാർ തൊഴിലാളികളുടെ പട്ടിക കൈമാറാൻ ബോർഡ് ഇതുവരെ തയാറായിട്ടില്ല. 2017 മുതൽ 2021 വരെയുള്ള 4 വർഷക്കാലത്തെ അടവ് മുടങ്ങിയതിൽ 18 കോടി രൂപ മുതലായും 13 കോടി പലിശയിനത്തിലുമാണ് അക്കൗണ്ടുകൾ മരവിപ്പിച്ച് ഇ.എസ്.ഐ കോർപറേഷൻ പിടിച്ചെടുത്തത്. കെ.എസ്.ഇ.ബിയിൽ ഇരുപതിനായിരത്തോളം കരാർ തൊഴിലാളികൾ ഉണ്ടെന്നാണ് കണക്ക്. ഇതിൽ 20 വർഷം പിന്നിട്ടവരുടെ എണ്ണം പതിമുവായിരത്തിനു മുകളിലാണ്. മീറ്റർ റീഡർമാർ, സബ് സ്‌റ്റേഷൻ ഓപറേറ്റർമാർ, ലൈൻ വർക്കേഴ്‌സ്, ഷിഫ്റ്റ് അസിസ്റ്റന്റുമാർ എന്നിവരിൽ ഭൂരിപക്ഷവും കരാർ തൊഴിലാളികളാണ്.

നേരത്തെ ഇ.എസ്.ഐ കോർപറേഷൻ നോട്ടിസ് നൽകിയതിനു പിന്നാലെ നിയമാനുസൃതമായ വിഹിതം അടയ്ക്കുന്നതിനു പകരം ബോർഡ് ഹൈക്കോടതിയെ സമീപിക്കുകയും സ്‌റ്റേ വാങ്ങുകയും ചെയ്തിരുന്നു. ഇതിനെതിരേ ഇ.എസ്.ഐ കോർപറേഷൻ ഹൈക്കോടതി ഡിവിഷൻ ബെഞ്ചിൽ അപ്പീൽ നൽകി. കരാർ തൊഴിലാളികളുടെ സംഘടനയായ കരാർ തൊഴിലാളി ഫെഡറേഷനും കേസിൽ കക്ഷി ചേർന്നു. ഹൈക്കോടതി സിംഗിൾ ബെഞ്ചിന്റെ ഉത്തരവ് ഡിവിഷൻ ബെഞ്ച് റദ്ദാക്കി. ഇതിനുപിന്നാലെയാണ് ബാങ്ക് അക്കൗണ്ടുകൾ മരവപ്പിച്ച് ഇ.എസ്.ഐ കോർപറേഷൻ തുക പിടിച്ചെടുത്തത്. കരാർ തൊഴിലാളികൾ ഇ.എസ്.ഐ തുകയ്ക്ക് അർഹരല്ലെന്നായിരുന്നു കെ.എസ്.ഇ.ബിയുടെ വാദം. എന്നാൽ, ഇ.എസ്.ഐ അധികൃതർ വൈദ്യുതി ഓഫിസുകളിൽ പരിശോധന നടത്തുകയും കരാർ തൊഴിലാളികൾ അർഹരാണെന്ന് കണ്ടെത്തുകയും ചെയ്തിരുന്നു.