ചാണ്ഡിഗഡ്: പാകിസ്ഥാന് രാജ്യ രഹസ്യങ്ങള്‍ ചോര്‍ത്തിക്കൊടുത്തതിന് അറസ്റ്റിലായ ഹരിയാന സ്വദേശിനിയായ ട്രാവല്‍ വ്‌ളോഗര്‍ ജ്യോതി മല്‍ഹോത്ര അന്വേഷണത്തോട് സഹകരിക്കുന്നില്ലെന്നും കുറ്റം സമ്മതിക്കാന്‍ തയാറാകുന്നില്ലെന്നും പൊലിസ്. ചോദ്യം ചെയ്യലില്‍ ജ്യോതി മല്‍ഹോത്ര പശ്ചാത്താപത്തിന്റെ ലക്ഷണങ്ങള്‍ കാണിക്കുകയോ കുറ്റസമ്മതം നടത്തുകയോ തെറ്റ് ചെയ്തതായ സൂചന പ്രകടിപ്പിക്കുകയോ ചെയ്തില്ലെന്ന് അന്വേഷണസംഘം പറഞ്ഞു. രാജ്യരഹസ്യങ്ങള്‍ ശേഖരിക്കുന്നതിനൊപ്പം ഇന്ത്യയില്‍ പാക് അനുകൂലവികാരം ഉണ്ടാക്കുകയും പാകിസ്ഥാനിലേക്ക് കൂടുതല്‍ പേരെ ആകര്‍ഷിപ്പിക്കുകയും ചെയ്യുന്ന വിധത്തില്‍ വിഡിയോ തയാറാക്കാന്‍ ജ്യോതിക്ക് നിര്‍ദേശം ലഭിച്ചതായാണ് വൃത്തങ്ങള്‍ വെളിപ്പെടുത്തിയത്. 

ജ്യോതി മല്‍ഹോത്രയുടെ ചുരുങ്ങിയ സമയത്തിനുള്ളിലെ പാകിസ്ഥാന്‍, കശ്മീര്‍ സന്ദര്‍ശനങ്ങളും അന്വേഷണപരിധിയിലാണ്. നിര്‍ദ്ദിഷ്ട സ്ഥലങ്ങളോ ഉള്ളടക്കമോ ഉള്‍ക്കൊള്ളുന്ന യാത്രാ വിഡിയോകള്‍ അപ്‌ലോഡ് ചെയ്യാന്‍ അവര്‍ക്ക് പാക് നിര്‍ദേശം ലഭിച്ചിട്ടുണ്ടോ എന്നും അന്വേഷിക്കുന്നുണ്ട്. ഹല്‍ഗാം ഭീകരാക്രമണത്തിന് മുമ്പ് 2023ലും 2024ലും ഈ വര്‍ഷം മാര്‍ച്ചിലും ജ്യോതി പാകിസ്ഥാനിലേക്ക് യാത്ര ചെയ്തതായി കണ്ടെത്തിയതിനെത്തുടര്‍ന്നാണിത്. 

അതേസമയം, ജ്യോതിയെ പാക് ഹൈക്കമ്മിഷനര്‍ക്ക് പരിചയപ്പെടുത്തിക്കൊടുത്തത് ഹരിയാനയിലെ സിഖ് ഗുരുദ്വാര കമ്മിറ്റി ജീവനക്കാരി അജ്രാന സ്വദേശിനിയായ ഹര്‍കിരത് സിങ് ആണെന്ന വിവരവും പുറത്തുവന്നു. ഇവരെ ചോദ്യംചെയ്യാനായി പൊലിസ് കസ്റ്റഡിയിലെടുത്തെങ്കിലും പിന്നീട് വിട്ടയച്ചു. 

അതേസമയം, ജ്യോതി മല്‍ഹോത്ര പ്രതിയായ ചാരക്കേസില്‍ ഒരാള്‍കൂടി അറസ്റ്റിലായി. ഹരിയാനയില്‍നിന്ന് തന്നെയുള്ള നൂഹ് സ്വദേശിയായ മുഹമ്മദ് താരിഫ് ആണ് ഏറ്റവും ഒടുവില്‍ അറസ്റ്റിലായത്. ഇതേ കേസില്‍ കഴിഞ്ഞദിവസം അറസ്റ്റിലായ അര്‍മന്‍ എന്നയാളുടെ നാട്ടുകാരനാണ് താരിഫ്. ഇന്ത്യന്‍ സൈന്യത്തെയും സൈനികനടപടികളെയും കുറിച്ചുള്ള വിവരങ്ങള്‍ ഡല്‍ഹിയിലെ പാക് ഹൈക്കമ്മിഷനിലെ ജീവനക്കാരന് പങ്കുവച്ചെന്നാണ് രണ്ടുപേര്‍ക്കുമെതിരായ ആരോപണം. അര്‍മനെ കോടതി ആറ് ദിവസത്തേക്ക് പൊലിസ് കസ്റ്റഡിയില്‍ വിട്ടു. 

ഇതോടെ കേസില്‍ പിടിയിലായവരുടെ എണ്ണം 11 ആയി. മുഖ്യപ്രതിയായ യൂടൂബറും ട്രാവല്‍ വ്‌ളോഗറുമായ ഹരിയാനയിലെ ഹിസാര്‍ സ്വദേശിനി ജ്യോതി മല്‍ഹോത്ര, ഹരിയാന സ്വദേശിയും ഖല്‍സ കോളജ് ബിരുദവിദ്യാര്‍ഥിയുമായ ദേവേന്ദര്‍ സിങ് (25), ഹരിയാനയിലെ നൂഹ് സ്വദേശിയായ അര്‍മന്‍ (23), ഹരിയാനയിലെ പാനപത്ത് സ്വദേശി നുഅ്മാന്‍ ഇലാഹി (24), യു.പി രാംപൂര്‍ സ്വദേശിയായ വ്യവസായി ഷെഹ്‌സാദ്, പഞ്ചാബിലെ ഗുര്‍ദാസ്പൂര്‍ സ്വദേശി കരണ്‍ബീര്‍ സിങ്, പഞ്ചാബിലെ ജലന്ധര്‍ സ്വദേശി മുഹമ്മദ് മുര്‍തസ, പഞ്ചാബിലെ മലര്‍കോട്ട്‌ല സ്വദേശി ഗുസല, അമൃതസര്‍ സ്വദേശികളായ പലക് ഷേര്‍ മസിഹ്, സുരാജ് മസിഹ്, ജ്യോതി മല്‍ഹോതയുടെ സുഹൃത്തും ഒഡീഷ സ്വദേശിനിയായ വ്‌ളോഗറുമായ പ്രിയങ്കാ സേനാപതി എന്നിവരാണ് പിടിയിലായത്. ജ്യോതിക്കൊപ്പം പാകിസ്ഥാനിലുള്‍പ്പെടെ സന്ദര്‍ശനം നടത്തിയ പ്രിയങ്കയെ ശനിയാഴ്ചയാണ് ഒഡിഷ പൊലിസ് ചോദ്യംചെയ്യാനായി കസ്റ്റഡിയിലെടുത്തത്. 

Haryana-based travel vlogger Jyoti Malhotra, who was arrested for leaking state secrets to Pakistan, is not cooperating with the investigation and is not ready to confess to the crime, police said. During interrogation, Jyoti Malhotra did not show any signs of remorse, confessed to the crime or hinted at any wrongdoing, the investigation team said. Sources revealed that Jyoti was instructed to create a video in a way that would create pro-Pak sentiment in India and attract more people to Pakistan, along with collecting state secrets.