കൊടുങ്ങല്ലൂർ (തൃശൂർ): വെളുത്തകടവ് ദാറുസ്സലാം പള്ളിക്ക് ദേശീയപാത അതോറിറ്റിയിൽനിന്ന് ലഭിച്ച  2,76,44,485 രൂപ ജമാഅത്തെ ഇസ്‌ലാമിയുടെ ദാറുസ്സലാം ചാരിറ്റബിൾ ആൻഡ് റിലീജിയസ്  ട്രസ്റ്റ് വകമാറ്റിയതോടെയാണ്  2024 ജൂൺ 29നു മഹല്ല് നിവാസികൾ അടിയന്തര യോഗം ചേരുന്നത്. തുടർന്ന് അന്നത്തെ പ്രസിഡന്റ് മക്കാർ മുഹമ്മദിന്റെ സഹോദരൻ അബ്ദുറഹ്മാൻ മാസ്റ്റർ പ്രസിഡന്റും അബ്ദുൽ നാസർ സെക്രട്ടറിയും വി.എച്ച് മെഹ്ബൂബ് ട്രഷററുമായ 15 അംഗ പുതിയ കമ്മിറ്റി നിലവിൽവന്നു. നഷ്ടപ്പെട്ട പണം തിരിച്ചുപിടിക്കാനായിരുന്നു പുതിയ കമ്മിറ്റിയുടെ ആദ്യ ശ്രമം.

പുതിയ കമ്മിറ്റി പള്ളിയുടെ നിലവിലുള്ള ഭൂമിയുടെ നികുതി അടക്കാൻ പനങ്ങാട് വില്ലേജ് ഓഫിസിലെത്തിയപ്പോഴാണ് പള്ളിക്കു നഷ്ടപരിഹാരം ലഭിച്ച പണം മാത്രമല്ല, ഭൂമിയും നഷ്ടപ്പെട്ടിട്ടുണ്ടെന്ന ഞെട്ടിക്കുന്ന വിവരം അറിയുന്നത്. 2022 ഡിസംബർ 23നാണ് കൊടുങ്ങല്ലൂർ രജിസ്ട്രാർ ഓഫിസിൽ ജമാഅത്തെ ഇസ്‌ലാമിയുടെ തൃശൂർ ജില്ലാ അമീർ കെ.കെ ഷാനവാസ്, നിലവിലെ ജുമാമസ്ജിദ് സെക്രട്ടറിയും ഖതീബുമായ അബ്ദുൽ ലത്തീഫ് എന്നിവർ വഖ്ഫ് ഭൂമി എഴുതിവാങ്ങിയതായി അറിയുന്നത്. ഇതിനായി ഇവർ 11 പേർ ചേർന്ന് ദാറുസ്സലാം ചാരിറ്റബിൾ ആൻഡ് റിലീജിയസ് ട്രസ്റ്റുമുണ്ടാക്കി. ഇതിൽ മുൻ പ്രസിഡന്റ് മക്കാർ മുഹമ്മദിനെയും ഉൾപ്പെടുത്തി. ജോ. സെക്രട്ടറിയും മക്കാർ മുഹമ്മദും ഒഴികെ മറ്റുള്ളവരൊന്നും മഹല്ല് പരിധിയിൽ വരുന്നവരുമല്ല.

ആധാരം ട്രസ്റ്റിന്റെ പേരിൽ എഴുതിക്കൊടുക്കുന്നത് പ്രസിഡന്റായ മക്കാർ മുഹമ്മദും സെക്രട്ടറി അബ്ദുൽ ലത്തീഫുമാണ്. ഈ രജിസ്‌ട്രേഷനു പിന്നിൽ ഒരു കൊടുംചതിയുണ്ടായതായി മുൻ പ്രസിഡന്റ് മക്കാർ മുഹമ്മദ് പറഞ്ഞു.

നിലവിലെ മസ്ജിദിനു പിറകിൽ മദ്‌റസയോട് ചേർന്ന് ഒന്നര സെന്റ് സ്ഥലം പ്രദേശവാസിയായ പുറക്കൊളത്ത് യൂസുഫിന്റെ ഭാര്യ ഹാജറ മസ്ജിദിനു നൽകാൻ വസിയ്യത്ത് ചെയ്തിരുന്നു. ഇതിന്റെ രജിസ്‌ട്രേഷൻ നടപടികൾക്കെന്നു പറഞ്ഞാണ് സെക്രട്ടറി തന്നെ സാക്ഷിയാക്കി കൊടുങ്ങല്ലൂരിലെ രജിസ്ട്രർ ഓഫിസിലേക്ക് കൊണ്ടുപോയത്. എന്നാൽ ഇവർ ഭൂമി മുഴുവനായും ട്രസ്റ്റിന്റെ പേരിൽ രജിസ്റ്റർ ചെയ്യുകയായിരുന്നുവെന്ന് എനിക്കറിയില്ലായിരുന്നു. നിലവിലുള്ള വെളുത്തകടവ് ദാറുസ്സലാം എന്ന പേരിന് സമാനമായ പേരും ഇതിനു നൽകിയാണ് മഹല്ല് വാസികളെ കബളിപ്പിച്ചത്.

ജുമാമസ്ജിദിനു നഷ്ടപരിഹാരമായി ലഭിച്ച പണംകൊണ്ട് മസ്ജിദ് കമ്മിറ്റി അംഗങ്ങളും മഹല്ല് വാസികളും അറിയാതെ എറണാകുളം സൗത്ത് റെയിൽവേ സ്റ്റേഷൻ പരിസരത്ത് 12 മുറികളുള്ള ഒരു കെട്ടിടം വാങ്ങിയിരുന്നു. എന്തു മാനദണ്ഡത്തിലാണ് ഇതെന്ന് ആർക്കും അറിയില്ല. മാസവരുമാനം ഒന്നരലക്ഷം  കിട്ടുന്നുണ്ട് എന്നാണ് അറിയിച്ചിരുന്നത്.

എന്നാൽ ഇതിൽ 30,000 രൂപ മാത്രമാണ് പള്ളിക്ക് ആദ്യമാസം നൽകിയിരുന്നത്. ശേഷിക്കുന്ന തുക എന്തു ചെയ്യുന്നുവെന്നതിനു ഉത്തരമില്ല. ഇതിനിടെയാണ് അക്കൗണ്ടിൽ സീറോ ബാലൻസ് കണ്ടത്. ഇതോടെ മുൻ പ്രസിഡന്റ് മക്കാർ മുഹമ്മദ് അടക്കം സെക്രട്ടറിയും ഖതീബുമായ അബ്ദുൽ ലത്തീഫിനോട് വിശദീകരണം തേടി. എന്നാൽ അന്യായം പറഞ്ഞ് ഇവർ മഹല്ലിനെ കബളിപ്പിക്കൽ തുടർന്നു. നഷ്ടപ്പെട്ട പണവും വഖ്ഫ് ഭൂമിയും ലഭിക്കാൻ ഇവർ പൊലിസിൽ പരാതി നൽകി സമരം തുടങ്ങി. ഈ സമരമാണ് 180-ാം ദിവസത്തിലേക്ക് കടക്കുന്നത്.