ബെംഗളൂരു: കനത്ത മഴയിൽ ബെംഗളൂരു നഗരം വെള്ളത്തിനടിയിലായതിന് പിന്നാലെ ന​ഗരത്തിൽ ദാരുണമായ മൂന്ന് മരണങ്ങൾ. ബിടിഎം ലേഔട്ടിലെ മധുവൻ അപ്പാർട്ട്മെന്റിൽ വെള്ളം കയറിയ ബേസ്മെന്റിൽ വൈദ്യുതാഘാതമേറ്റ് 63-കാരനായ മൻമോഹൻ കാമത്തും 12 വയസ്സുകാരൻ ദിനേശും മരിച്ചു. വൈറ്റ്ഫീൽഡിൽ മതിൽ ഇടിഞ്ഞുവീണ് 35-കാരിയായ യുവതിയും കൊല്ലപ്പെട്ടു.

തിങ്കളാഴ്ച വൈകിട്ട് 6.15-നാണ് ബിടിഎം രണ്ടാം സ്റ്റേജിലെ മധുവൻ അപ്പാർട്ട്മെന്റിൽ ദുരന്തം നടന്നത്. മൻമോഹൻ കാമത്ത്, വെള്ളം കെട്ടിക്കിടക്കുന്ന ബേസ്മെന്റിൽ നിന്ന് വെള്ളം പുറത്തേക്ക് പമ്പ് ചെയ്യാൻ ശ്രമിക്കുമ്പോൾ മോട്ടോറിൽ നിന്ന് ഷോർട്ട് സർക്യൂട്ട് മൂലം വൈദ്യുതാഘാതമേൽക്കുകയായിരുന്നു. അപ്പാർട്ട്മെന്റ് സമുച്ചയത്തിലെ തൊഴിലാളിയായ നേപ്പാളി പൗരന്റെ മകൻ ദിനേശ്, കാമത്തിനെ സഹായിക്കവെ വെള്ളത്തിൽ നിന്നും വൈദ്യുതാഘാതമേറ്റ് മരിക്കുകയായിരുന്നു.

മൻമോഹൻ കാമത്ത് പുറത്തുനിന്ന് കൊണ്ടുവന്ന മോട്ടോർ പവർ സ്രോതസ്സുമായി ബന്ധിപ്പിച്ച് വെള്ളം പമ്പ് ചെയ്യാൻ ശ്രമിക്കുകയായിരുന്നു. ഈ സമയം ഷോർട്ട് സർക്യൂട്ട് ഉണ്ടായതാണ് ദുരന്തത്തിന് കാരണം. ദിനേശിനും വൈദ്യുതാഘാതമേറ്റ് സംഭവസ്ഥലത്ത് തന്നെ മരണം സംഭവിച്ചു, സൗത്ത് ഈസ്റ്റ് ഡിവിഷൻ ഡെപ്യൂട്ടി പോലീസ് കമ്മീഷണർ സാറ ഫാത്തിമ വ്യക്തമാക്കി. മൃതദേഹങ്ങൾ പോസ്റ്റ്‌മോർട്ടത്തിനായി സെന്റ് ജോൺസ് ആശുപത്രിയിലേക്ക് മാറ്റി.

വൈറ്റ്ഫീൽഡിൽ, കനത്ത മഴയിൽ കോമ്പൗണ്ട് മതിൽ ഇടിഞ്ഞുവീണാണ് 35-കാരിയായ യുവതി മരിച്ചത്. ഐടി തലസ്ഥാനമായ ബെംഗളൂരുവിൽ എല്ലാ വർഷവും മഴക്കാലത്ത് വെള്ളക്കെട്ടും ഗതാഗതക്കുരുക്കും പതിവാണ്. സിൽക്ക് ബോർഡ് ജംഗ്ഷൻ, ഹെബ്ബാൾ, യെലഹങ്ക തുടങ്ങിയ പ്രദേശങ്ങൾ കനത്ത മഴയിൽ പ്രത്യേകിച്ച് ബുദ്ധിമുട്ടിലായി.

നഗരത്തിൽ 210 വെള്ളപ്പൊക്ക സാധ്യതാ പ്രദേശങ്ങൾ കണ്ടെത്തിയിട്ടുണ്ട്. ഇതിൽ 166 എണ്ണത്തിലെ പ്രശ്നങ്ങൾ 70% പരിഹരിച്ചു. 24 സ്ഥലങ്ങളിൽ പണി പുരോഗമിക്കുന്നു, ബാക്കി 20 സ്ഥലങ്ങൾ ഉടൻ ഏറ്റെടുക്കും." 197 കിലോമീറ്റർ മഴവെള്ള ഡ്രെയിനുകൾ നിർമ്മിച്ചതിനായി 2,000 കോടി രൂപ അനുവദിച്ചിട്ടുണ്ടെന്നും അദ്ദേഹം വ്യക്തമാക്കി.

"132 വെള്ളക്കെട്ട് സ്ഥലങ്ങൾ ട്രാഫിക് പോലീസ് കണ്ടെത്തി, ഇതിൽ 82 എണ്ണം പരിഹരിച്ചു. 41 സ്ഥലങ്ങളിലെ പ്രശ്നങ്ങൾ ഇനിയും തീർപ്പാക്കാനുണ്ട്," ശിവകുമാർ കൂട്ടിച്ചേർത്തു. അണ്ടർപാസ് നിർമ്മാണം പോലുള്ള പ്രവൃത്തികൾ പുരോഗമിക്കുന്നുണ്ടെങ്കിലും, മഴക്കാലത്തെ വെല്ലുവിളികൾ പരിഹരിക്കാൻ ബന്ധപ്പെട്ട വകുപ്പുകളുമായി ഏകോപനം തുടരും, കർണാടക ഉപമുഖ്യമന്ത്രി ഡി.കെ. ശിവകുമാർ സംഭവത്തിൽ പ്രതികരിച്ചു.