ന്യൂഡല്‍ഹി: ലോക്‌സഭ പ്രതിപക്ഷ നേതാവ് രാഹുല്‍ ഗാന്ധി നാളെ കശ്മീരിലെ പൂഞ്ചിലേക്ക്. പാകിസ്താന്റെ ഷെല്ലാക്രമണത്തില്‍ മരിച്ചവരുടെ കുടുംബങ്ങളെ അദ്ദേഹം സന്ദര്‍ശിക്കും. കോണ്‍ഗ്രസ് നേതാവ് ജയറാം രമേശ് അക്‌സ് വഴിയാണ് ഇക്കാര്യം അറിയിച്ചത്. പഹല്‍ഗാം ഭീകരാക്രമണത്തില്‍ പരുക്കേറ്റ് ചികിത്സയില്‍ കഴിയുന്നവരെ കാണുന്നതിനായി ഏപ്രില്‍ 25ന് അദ്ദേഹം ശ്രീനഗര്‍ സന്ദര്‍ശിച്ചിരുന്നു. ഭീകരാക്രമണത്തിനിരയായവരുടെ കുടുംബാംഗങ്ങളുമായി അദ്ദേഹം സംസാരിക്കുകയും ചെയ്തിരുന്നു.

ഇന്ത്യ പാക് സംഘര്‍ഷം ശക്തമായ സമയത്ത് പാകിസ്താന്റെ ഭാഗത്തുനിന്ന് അതിര്‍ത്തി മേഖലയില്‍ ഷെല്ലാക്രമണം ഉണ്ടായിരുന്നു. ഇതില്‍ നിരവധിപേര്‍ക്ക് ജീവന്‍ നഷ്ടമാവുകയും ചെയ്തിരുന്നു. പൂഞ്ചില്‍ മാത്രം ഏകദേശം 13 പേരാണ് അന്ന് കൊല്ലപ്പെട്ടത്.

അതേസമയം, കിഷ്ത്വാര്‍ മേഖലയില്‍ ഭീകരര്‍ക്കായി തെരച്ചില്‍ ഇന്നും തുടരുകയാണ്. ഇന്നലെ മേഖലയില്‍ ശക്തമായ വെടിവെപ്പ് നടന്നിരുന്നു. ഏറ്റുമുട്ടലില്‍ സുരക്ഷാസേന രണ്ട് ഭീകരരെ വധിക്കുകയും ചെയ്തിരുന്നു. പൂഞ്ചില്‍ ഭീകരരുമായി ബന്ധമുണ്ടെന്ന് സംശയിക്കുന്നവരുടെ വീടുകളില്‍ റെയ്ഡും നടന്നു.

പഹല്‍ഗാം ഭീകരാക്രമണത്തിന് ശേഷം ജമ്മു കശ്മീരില്‍ നടക്കുന്ന മൂന്നാമത്തെ ഏറ്റുമുട്ടലാണിത്. നേരത്തെ ഷോപ്പിയാന്‍ ത്രാല്‍ അടക്കമുള്ള മേഖലകളിലായി ആറ് ഭീകരരെ സൈന്യം വധിച്ചിരുന്നു. എന്നാല്‍ ഭീകരാക്രമണം കഴിഞ്ഞ് ഒരു മാസം പിന്നിട്ടിട്ടും ഭീകരരെ കണ്ടെത്താന്‍ കഴിഞ്ഞിട്ടില്ല.

അതിനിടെ ഡല്‍ഹിയില്‍ ഭീകരാക്രമണം നടത്താനുള്ള പദ്ധതി രഹസ്യന്വേഷണ വിഭാഗം തടഞ്ഞതായി റിപ്പോര്‍ട്ടുണ്ടിയ സംഭവവുമായി ബന്ധപ്പെട്ട് രണ്ട് നേപ്പാള്‍ സ്വദേശികളെ അറസ്റ്റ് ചെയ്തതായാണ് റിപ്പോര്‍ട്ട്. പാക് രഹസ്യാന്വേഷണ ഏജന്‍സിയുടെ പരിശീലനം ലഭിച്ചവരെയാണ് അറസ്റ്റ് ചെയ്തത്. 

ഐ.എസ്.ഐ-യുടെ നിര്‍ദേശപ്രകാരം ഡല്‍ഹിയിലെ സൈനിക കേന്ദ്രങ്ങടേത് ഉള്‍പെടെ വിവരങ്ങള്‍ ഇവര്‍ ശേഖരിച്ചിരുന്നു എന്നാണ് രഹസ്യാന്വേഷണ വിഭാഗം പറയുന്നത്.