ജയ്പൂർ: ഐപിഎല്ലിൽ മുംബൈ ഇന്ത്യൻസിനെതിരെ പഞ്ചാബ് കിങ്സിന് 185 റൺസ് വിജയലക്ഷ്യം. ജയ്പൂർ സവായ് മാൻസിംഗ് സ്റ്റേഡിയത്തിൽ നടക്കുന്ന മത്സരത്തിൽ ടോസ് നേടിയ പഞ്ചാബ് നായകൻ ശ്രേയസ് അയ്യർ ബൗളിംഗ് തെരഞ്ഞെടുക്കുകയായിരുന്നു. ആദ്യം ബാറ്റ് ചെയ്ത മുംബൈ ഏഴ് വിക്കറ്റ് നഷ്ടത്തിലാണ് 184 റൺസ് നേടിയത്. 

സൂര്യകുമാർ യാദവിന്റെ അർദ്ധ സെഞ്ച്വറി കരുത്തിലാണ് മുംബൈ മികച്ച സ്കോർ നേടിയത്. 39 പന്തിൽ 57 റൺസ് നേടിയാണ് സ്‌കൈ തിളങ്ങിയത്. ആറ് ഫോറുകളും രണ്ട് സിക്സുകളും അടങ്ങുന്നതാണ് താരത്തിന്റെ ഇന്നിംഗ്സ്. ഈ സീസണിലെ സ്ഥിരതയാർന്ന പ്രകടനങ്ങളിലൂടെ മുംബൈക്കായി ഒരു വമ്പൻ റെക്കോർഡ് കൈവരിക്കാനും സൂര്യക്ക് സാധിച്ചു.

ഐപിഎല്ലിൽ ഒരു സീസണിൽ മുംബൈ ഇന്ത്യൻസിന് വേണ്ടി ഏറ്റവും കൂടുതൽ റൺസ് നേടുന്ന താരമായി മാറാനാണ് സ്കൈക്ക് സാധിച്ചത്. സാക്ഷാൽ സച്ചിൻ ടെണ്ടുൽക്കറെ മറികടന്നാണ് സൂര്യകുമാർ യാദവ് ഈ നേട്ടം കൈവരിച്ചത്. 2010 സീസണിൽ 618 റൺസായിരുന്നു സച്ചിൻ നേടിയിരുന്നത്. ഇപ്പോൾ നീണ്ട 15 വർഷങ്ങൾക്ക് ശേഷം സ്‌കൈ മുംബൈയുടെ റൺ വേട്ടക്കാരിൽ ഒന്നാമതെത്തിയിരിക്കുകയാണ്. 

പഞ്ചാബ് ബൗളിങ്ങിൽ അർഷ്ദീപ് സിംഗ്, വൈശാഗ് വിജയ കുമാർ, മാർക്കോ ജാൻസൻ എന്നിവർ രണ്ട് വീതം വിക്കറ്റുകൾ നേടി മികച്ച പ്രകടനമാണ് നടത്തിയത്. ഹർപ്രീത് ബ്രാർ ഒരു വിക്കറ്റും നേടി. 

പഞ്ചാബ് കിംഗ്സ് പ്ലെയിങ് ഇലവൻ

പ്രിയാൻഷ് ആര്യ, ജോഷ് ഇംഗ്ലിസ്(വിക്കറ്റ് കീപ്പർ), നെഹാൽ വധേര, ശ്രേയസ് അയ്യർ (ക്യാപറ്റൻ), മാർക്കസ് സ്റ്റോണിസ്, ശശാങ്ക് സിംഗ്, മാർക്കോ ജാൻസൻ, ഹർപ്രീത് ബ്രാർ, അർഷ്ദീപ് സിംഗ്, കൈൽ ജാമിസൺ.

മുംബൈ ഇന്ത്യൻസ് പ്ലെയിങ് ഇലവൻ

രോഹിത് ശർമ്മ, റയാൻ റിക്കൽടൺ(വിക്കറ്റ് കീപ്പർ), വിൽ ജാക്സ്, സൂര്യകുമാർ യാദവ്, തിലക് വർമ്മ, നമാൻ ധിർ, ഹാർദിക് പാണ്ഡ്യ (ക്യാപ്റ്റൻ), മിച്ചൽ സാൻ്റ്‌നർ, ദീപക് ചഹർ, ട്രെൻ്റ് ബോൾട്ട്, ജസ്പ്രീത് ബുംറ.

Suryakumar Yadav Create a Historical Record For Mumbai Indians in IPL