കണ്ണൂര്‍: സുകുമാര്‍ അഴീക്കോടിന്റെ പ്രഭാഷണ മാധുര്യമാണ് ജനങ്ങളെ അദ്ദേഹത്തിലേക്ക് അടുപ്പിച്ചതെന്നു മന്ത്രി ഇ.പി ജയരാജന്‍. പ്രശ്‌നങ്ങളോടുള്ള തന്റെ സമീപനമായിരുന്നു അഴീക്കോടിന്റെ ഓരോ പ്രഭാഷണവും. തനിക്കു തോന്നുന്ന കാര്യങ്ങള്‍ വെട്ടിത്തുറന്നു പറയാന്‍ ആര്‍ജവം കാണിച്ച എഴുത്തുകാരനായിരുന്നു അദ്ദേഹമെന്നും മന്ത്രി പറഞ്ഞു. കണ്ണൂര്‍ വേവ്‌സിന്റെ ഡോ. സുകുമാര്‍ അഴീക്കോട് സ്മാരക പുരസ്‌കാരം എഴുത്തുകാരന്‍ എം മുകുന്ദനു സമ്മാനിച്ചു സംസാരിക്കുകയായിരുന്നു ഇ.പി ജയരാജന്‍.
സാഹിത്യത്തിലെ അമൂല്യനിധികളിലൊന്നാണു അഴീക്കോടിന്റെ തത്വമസി. എം മുകുന്ദന്‍ അഴീക്കോടിനെ പോലെ പൊതുവിഷയങ്ങളില്‍ കാര്യങ്ങള്‍ വെട്ടിത്തുറന്നു പറയുന്ന പ്രതിഭയും മലയാള സാഹിത്യത്തെ മറ്റു സാഹിത്യരംഗത്തോടൊപ്പം ഉയര്‍ത്താന്‍ ശ്രമിച്ച എഴുത്തുകാരനുമാണെന്നും ജയരാജന്‍ പറഞ്ഞു. കെ.പി ശ്രീശന്‍ അധ്യക്ഷനായി. ബാലകൃഷ്ണന്‍ കൊയ്യാല്‍ അഴീക്കോട് അനുസ്മരണ പ്രഭാഷണം നടത്തി.
വിവിധ രംഗങ്ങളിലെ പ്രമുഖരായ ജെമിനി ശങ്കരന്‍ (ജെമിനി സര്‍ക്കസ്), സി ശേഖരന്‍ (മസ്‌കോട്ട് ഗ്രൂപ്പ്), സത്താര്‍ ഹാജി (ഷെര്‍ലോണ്‍ മാട്രസ്), ഇ.എം ഹാഷിം, ആല്‍ബര്‍ട്ട് അലക്‌സ് (ബ്ലൂംസ് മയ്യഴി സിനിമ) എന്നിവരെ ചടങ്ങില്‍ ആദരിച്ചു. സി.കെ പദ്മനാഭന്‍, സി ജയചന്ദ്രന്‍, ദിനകരന്‍ കൊമ്പിലാത്ത്, ഒ.സി മോഹന്‍രാജ്, ഒ.എന്‍ രമേശന്‍, പി.പി വേണുഗോപാല്‍ സംസാരിച്ചു.