ലണ്ടന്‍: ആശങ്കയിലായിരുന്ന ചാംപ്യന്‍സ് ലീഗ് യോഗ്യത അവസാന മത്സരത്തിലെ വിജയത്തോടെ നേടിയെടുത്ത് വമ്പന്മാരായ മാഞ്ചസ്റ്റര്‍ സിറ്റിയും ചെല്‍സിയും.  ഇന്നലെ നടന്ന ഇംഗ്ലിഷ് പ്രീമിയര്‍ ലീഗിലെ അവസാന മത്സരങ്ങളില്‍ മാഞ്ചസ്റ്റര്‍ സിറ്റി ഫുള്‍ഹാമിനെയും ചെല്‍സി നോട്ടിങ് ഹാം ഫോറസ്റ്റിനെയുമാണ് പരാജയപ്പെടുത്തിയത്. എതിരില്ലാത്ത രണ്ട് ഗോളിനായിരുന്നു സിറ്റിയുടെ ജയം. ഏകപക്ഷീയമായ ഒരുഗോളിനാണ് ചെല്‍സി നോട്ടിങ്ഹാമിനെ വീഴ്ത്തിയത്. 

പട്ടികയില്‍ 71 പോയിന്റുമായി സിറ്റി മൂന്നാമതും 69 പോയിന്റുമായി ചെല്‍സി നാലാമതുമാണ് ഫിനിഷ് ചെയ്തത്. ഇന്നലെ എവർട്ടനോട് തോറ്റെങ്കിലും 66 പോയിന്റുമായി അഞ്ചാമതെത്തിയ ന്യൂകാസില്‍ യുനൈറ്റഡും ചാംപ്യന്‍സ് ലീഗിന് യോഗ്യത നേടി. 

നേരത്തെ ചാംപ്യന്‍ പട്ടം ഉറപ്പിച്ച ലിവര്‍പൂള്‍ അവസാന മത്സരത്തില്‍ ക്രിസ്റ്റല്‍ പാലസിനോട് സമനില വഴങ്ങി. 84 പോയിന്റാണ് ലിവര്‍പൂളിന്റെ സമ്പാദ്യം. നേരത്തെ രണ്ടാം സ്ഥാനം ഉറപ്പിച്ചിരുന്ന ആഴ്‌സനല്‍ ഇന്നലെ 2-1ന് സതാംപ്ടനെ വീഴ്ത്തി 74 പോയിന്റോടെ സീസണ്‍ അവസാനിപ്പിച്ചു. മറ്റൊരു മത്സരത്തില്‍ യൂറോപ്പാ ലീഗ് കിരീടം നേടിയ പകിട്ടോടെയെത്തിയ ടോട്ടനം ഹോട്‌സ്പറിനെ ബ്രൈറ്റണ്‍ 4-1ന് പരാജയപ്പെടുത്തി.  

അതേ സമയം ചാംപ്യന്‍സ് ലീഗ് യോഗ്യത ലക്ഷ്യമിട്ടിരുന്ന ആസ്റ്റണ്‍ വില്ലയെ 2-0ന് വീഴ്ത്തി മാഞ്ചസ്റ്റര്‍ യുനൈറ്റഡ് ജയത്തോടെ മടങ്ങി. 42 പോയിന്റ് മാത്രമഉുള്ള യുനൈറ്റഡ് പട്ടികയില്‍ 15ാം സ്ഥാനത്താണ് ഫിനിഷ് ചെയ്തത്.

The English Premier League season climaxed with thrilling photo-finish battles for European spots. Manchester City, Chelsea and Newcastle secured Champions League qualification, while Aston Villa grabbed Europa League berth after defeating Manchester United. Intense final-day drama reshaped next season's European football landscape. Stay updated with post-match analysis and reactions.