റാഞ്ചി: ജാർഖണ്ഡിലെ ലതേഹർ ജില്ലയിൽ സുരക്ഷാ സേനയുമായുള്ള വെടിവയ്പ്പിൽ തലയ്ക്ക് അഞ്ച് ലക്ഷം രൂപ പ്രതിഫലം പ്രഖ്യാപിച്ചിരുന്ന മാവോയിസ്റ്റ് നേതാവിനെ വെടിവച്ചു കൊന്നു. മനീഷ് യാദവ് എന്ന മാവോയിസ്റ്റാണ് കൊല്ലപ്പെട്ടത്. മൗഹാദന്ദ് പൊലിസ് സ്റ്റേഷന് കീഴിലുള്ള ദൗനയിലെ വനപ്രദേശത്താണ് ഞായറാഴ്ച രാത്രി സുരക്ഷാ സേനയും സി.പി.ഐ (മാവോയിസ്റ്റ്) വിമതരും തമ്മിലുള്ള ഏറ്റുമുട്ടൽ നടന്നത്. ഇതേ ഓപ്പറേഷനിൽ മറ്റൊരു മാവോയിസ്റ്റ് പ്രവർത്തകനെ അറസ്റ്റ് ചെയ്തിട്ടുണ്ട്.

" തലയ്ക്ക് അഞ്ച് ലക്ഷം രൂപ പ്രതിഫലം പ്രഖ്യാപിച്ചിരുന്ന മനീഷ് യാദവ് സുരക്ഷാ സേനയുമായുള്ള വെടിവയ്പിൽ കൊല്ലപ്പെട്ടു. മറ്റൊരു മാവോയിസ്റ്റായ കുന്ദൻ ഖേർവാറിനെ അറസ്റ്റ് ചെയ്തു" പലാമു ഡെപ്യൂട്ടി ഇൻസ്പെക്ടർ ജനറൽ വൈ.എസ് രമേശ് പറഞ്ഞതായി വാർത്താ ഏജൻസിയായ പി.ടി.ഐ റിപ്പോർട്ട് ചെയ്തു. തലക്ക് പത്ത് ലക്ഷം രൂപ ഇനാം പ്രഖ്യാപിച്ച നക്സലൈറ്റായിരുന്നു പിടിയിലായിരുന്ന കുന്ദൻ ഖേർവാർ.

മാവോവാദികൾ ദൗനയിലെ വനത്തിൽ മറഞ്ഞിരിക്കുന്നതായി രഹസ്യവിവരം ലഭിച്ചതിന്‍റെ അടിസ്ഥാനത്തിൽ സുരക്ഷാസേന നടത്തിയ തിരച്ചിലിനിടെയാണ് ആക്രമണം ഉണ്ടായത്. സംഭവസ്ഥലത്തുന്ന് രണ്ട് ഓട്ടോമാറ്റിക് റൈഫിളുകൾ കണ്ടെടുത്തതായി പൊലിസ് അറിയിച്ചു.

ജാർഖണ്ഡ് ജൻ മുക്തി പരിഷത്ത് (ജെ.ജെ.എം.പി) ഗ്രൂപ്പിന്റെ തലവനായ പപ്പു ലോഹ്റ ഉൾപ്പെടെ രണ്ട് മാവോയിസ്റ്റുകൾ ജില്ലയിൽ കൊല്ലപ്പെട്ടതിന് രണ്ട് ദിവസത്തിന് ശേഷമാണ് ഈ ഓപ്പറേഷൻ നടന്നത്. പത്ത് ലക്ഷം രൂപ ഇനാം പ്രഖ്യാപിച്ചിരുന്നയാളാണ് പപ്പു ലോഹ്റ. 5 ലക്ഷം രൂപ പാരിതോഷികം പ്രഖ്യാപിച്ചിരുന്ന മറ്റൊരു നക്സൽ നേതാവായ സോണൽ കമാൻഡർ പ്രഭാത് ഗഞ്ച്ഹുവിനെയും ഓപ്പറേഷനിൽ വെടിവച്ചു കൊലപ്പെടുത്തിയിരുന്നു. പ്രദേശത്ത് നിന്ന് പൊലിസ് ആയുധങ്ങളും വെടിക്കോപ്പുകളും കണ്ടെടുത്തതായി വാർത്താ ഏജൻസിയായ എ.എൻ.ഐ റിപ്പോർട്ട് ചെയ്തു. 

ഉദ്യോഗസ്ഥർ പറയുന്നതനുസരിച്ച്, ഒരു സി.ആർ.പി.എഫ് ഉദ്യോഗസ്ഥന്റെ കൊലപാതകം ഉൾപ്പെടെ നൂറോളം ക്രിമിനൽ കേസുകളിലെ പിടികിട്ടാപുള്ളിയാണ് പപ്പു ലോഹ്റ. ഇയാൾ ലതേഹാറിൽ നിരവധി ആളുകളെ കൊലപ്പെടുത്തുകയും നിരവധി ആളുകളുടെ ഭൂമി കൊള്ളയടിക്കുകയും ചെയ്തിട്ടുണ്ടെന്ന് ജാർഖണ്ഡ് പൊലിസ് ഡയറക്ടർ ജനറൽ അനുരാഗ് ഗുപ്ത ശനിയാഴ്ച മാധ്യമപ്രവർത്തകരോട് പറഞ്ഞു.