ഷാര്‍ജ: ഹംരിയ മേഖലയിലെ ഇന്ധന ഗോഡൗണില്‍ ഇന്നലെ രാവിലെ ഉണ്ടായ അഗ്‌നിബാധ പൂര്‍ണമായും നിയന്ത്രണവിധേയമാക്കിയത് 16 മണിക്കൂര്‍ നീണ്ട പ്രയത്‌നത്തിനൊടുവില്‍. രാവിലെ പൊട്ടിപ്പുറപ്പെട്ട തീ രാത്രി ഷാര്‍ജ സിവില്‍ ഡിഫന്‍സ് അതോറിറ്റി, ഷാര്‍ജ പൊലിസ്, നാഷനല്‍ ഗാര്‍ഡ് എന്നിവയിലെ സംഘങ്ങള്‍ സംയുക്തമായി നടത്തിയ ശ്രമത്തിനൊടുവില്‍ വൈകിയോടെയാണ് പൂര്‍ണമായും നിയന്ത്രണവിധേയമാക്കിയത്. 

അതേസമയം, തീപിടിത്തം സംബന്ധിച്ച വിവരങ്ങള്‍ക്കായി ഔദ്യോഗിക ഉറവിടങ്ങളെ മാത്രം ആശ്രയിക്കാന്‍ താമസക്കാരോടും മാധ്യമങ്ങളോടും അധികൃതര്‍ അഭ്യര്‍ഥിച്ചു. നിയമപരമായ പ്രത്യാഘാതങ്ങള്‍ ഒഴിവാക്കാന്‍ തീപിടിത്തവുമായി ബന്ധപ്പെട്ട ചിത്രങ്ങളോ വിഡിയോകളോ പങ്കിടരുതെന്നും കിംവദന്തികള്‍ പ്രചരിപ്പിക്കരുതെന്നും പൊലിസ് എക്‌സ് അക്കൗണ്ടില്‍ പോസ്റ്റ് ചെയ്ത പ്രസ്താവനയില്‍ പൊതുജനങ്ങളോട് അഭ്യര്‍ഥിച്ചു.

കഴിഞ്ഞയാഴ്ച ഷാര്‍ജ അല്‍ സജാ പ്രദേശത്തെ ഒരു പെട്രോകെമിക്കല്‍, ഫൈബര്‍ ഗ്ലാസ് പ്ലാന്റിലുണ്ടായ അഗ്‌നിബാധ പെട്ടെന്ന് നിയന്ത്രണ വിധേയമാക്കിയെന്നും മറ്റു സ്ഥാപനങ്ങളിലേക്ക് തീ പടരാതെ നോക്കാന്‍ സാധിച്ചുവെന്നും സിവില്‍ ഡിഫന്‍സ് പറഞ്ഞു.

തീപിടുത്തത്തില്‍ അധികൃതര്‍ വേഗത്തില്‍ പ്രതികരിക്കുകയും തീ പടരുന്നത് തടയുകയും ചെയ്തതായും ആര്‍ക്കും പരിക്കുകള്‍ റിപ്പോര്‍ട്ട് ചെയ്തിട്ടില്ലെന്നും അധികൃതര്‍ അറിയിച്ചു.