നിലമ്പൂര്‍: എഐസിസി ജനറല്‍ സെക്രട്ടറി കെസി വേണുഗോപാല്‍ ക്ഷേമപെന്‍ഷനെ കുറിച്ച് നടത്തിയ പരാമര്‍ശത്തില്‍ കടുത്ത വിമര്‍ശനവുമായി സിപിഎം. വിഷയം നിലമ്പൂര്‍ തിരഞ്ഞെടുപ്പില്‍ സജീവ ചര്‍ച്ചയാക്കി നിര്‍ത്താനാണ് സിപിഎം തീരുമാനം. പെന്‍ഷന്‍ വാങ്ങുന്നവരെ അപമാനിക്കുന്ന പരാമര്‍ശമാണ് കെസി വേണുഗോപാല്‍ നടത്തിയതെന്നും, അദ്ദേഹം മാപ്പ് പറയണമെന്നുമാണ് ഇടതുമുന്നണി ആവശ്യം. ക്ഷേമപെന്‍ഷന്‍ സര്‍ക്കാര്‍ കൈക്കൂലിയായി കാണുന്നു എന്നായിരുന്നു കെസി വേണുഗോപാല്‍ പറഞ്ഞത്. 

സിപിഎം സംസ്ഥാന സെക്രട്ടറി ഉള്‍പ്പെടെ വിഷയത്തില്‍ വിമര്‍ശനവുമായി രംഗത്തെത്തിയിരുന്നു. ക്ഷേമപെന്‍ഷന്‍ നിലമ്പൂര്‍ ഉപതിരഞ്ഞെടുപ്പില്‍ സജീവ ചര്‍ച്ചയാണ്. മുഖ്യമന്ത്രി ഉള്‍പ്പെടെയുള്ളവര്‍ തിരഞ്ഞെടുപ്പ് കണ്‍വെന്‍ഷനുകളില്‍ ക്ഷേമപെന്‍ഷന്‍ എടുത്ത് പറഞ്ഞിട്ടുണ്ട്. സാധാരണക്കാര്‍ക്ക് നേരിട്ട് ബാധിക്കുന്ന വിഷയമായതിനാല്‍ ഇരുമുന്നണികളും ശ്രദ്ധയോടെ കൈകാര്യം ചെയ്യുന്ന വിഷയാണിത്. അതിനിടെയാണ് കെസി വേണുഗോപാലിന്റെ പരാമര്‍ശം പുതിയ വിവാദങ്ങള്‍ക്ക് തുടക്കം കുറിച്ചത്.

 മണ്ഡലത്തിന്റെ ചുമതലയുള്ള എല്‍ഡിഎഫ് നേതാക്കള്‍ വിഷയം സജീവമാക്കി പ്രചരണത്തിന് ഉപയോഗിക്കാനുള്ള നീക്കത്തിലാണ്. പെന്‍ഷന്‍ വാങ്ങുന്നവരെ അപമാനിച്ച കെസി വേണുഗോപാല്‍ മാപ്പ് പറയണമെന്ന് ആവശ്യപ്പെട്ട് നിലമ്പൂര്‍ ടൗണില്‍ ഇടതുമുന്നണി പ്രവര്‍ത്തകര്‍ പ്രതിഷേധം സംഘടിപ്പിച്ചിരുന്നു. 

CPM lashes out at AICC General Secretary K.C. Venugopal over welfare pension remark; Plans to highlight issue in Nilambur by-election