മുഖക്കുരുവും ചുവപ്പു പാടുകളും ടാനുമൊക്കെ പരിചരണം ലഭ്യമല്ലാത്ത ചര്‍മത്തില്‍ പ്രകടമായി കാണാം. ചര്‍മാരോഗ്യം സംരക്ഷിക്കുന്നതിലൂടെ പെട്ടെന്നുള്ള വാര്‍ധക്യത്തിന്റെ ലക്ഷണങ്ങളില്‍ നിന്ന് ചര്‍മത്തെ അകറ്റി നിര്‍ത്താന്‍ സാധിക്കും. ചര്‍മം എപ്പോഴും വൃത്തിയോടെ സൂക്ഷിക്കേണ്ടതാണ്. പുറത്തുപോയി വന്നാല്‍ ഉടനെയും കിടക്കുന്നതിനു മുമ്പും മുഖം നിര്‍ബന്ധമായും കഴുകണം.

വെറുതെ വെള്ളം ഉപയോഗിക്കുന്നതു കൊണ്ട് മാത്രം ചര്‍മത്തില്‍ അടിഞ്ഞു കൂടിയിരിക്കുന്ന അഴുക്കും എണ്ണ മയവും മൃതകോശങ്ങളും നീക്കം ചെയ്യാന്‍ സാധിക്കില്ല. അതിനായി ചര്‍മത്തിനിണങ്ങുന്ന ഫെയ്‌സ് വാഷുകള്‍ ഉപയോഗിക്കേണ്ടതുണ്ട്. 

വിപണിയില്‍ ഇത്തരം സൗന്ദര്യ വര്‍ധക ഉത്പന്നങ്ങള്‍ ഒരുപാടുണ്ട്. എന്നാല്‍ അവയില്‍ അടങ്ങിയിരിക്കുന്ന രാസ വസ്തുക്കള്‍ ചര്‍മാരോഗ്യത്തെ പ്രതികൂലമായി ബാധിച്ചേക്കാം. ഇതിനു വേണ്ടി പ്രകൃതിദത്തമായ ചേരുവകള്‍ തിരഞ്ഞെടുക്കുക എന്നതാണ് ഉചിതം.

കടലമാവ് അത്തരത്തിലൊരു മികച്ച സ്‌കിന്‍ എക്‌സ്‌ഫോളിയന്റാണ്. അതുപയോഗിച്ച് കെമിക്കല്‍ രഹിത ഫെയ്‌സ് വാഷ് വളരെ സിംപിളായി തന്നെ നമുക്ക് വീട്ടില്‍ തയാറാക്കാം.

ചേരുവകള്‍

കടലമാവ്
മഞ്ഞള്‍പ്പൊടി
റോസ് വാട്ടര്‍ 

ഉണ്ടാക്കുന്ന വിധം

ഒരു ബൗളിലേയ്ക്ക് കുറച്ച് കടലമാവെടുക്കുക. അതിലേയ്ക്ക് ഒരു നുള്ള് മഞ്ഞള്‍പ്പൊടിയും അല്‍പം റോസ് വാട്ടറും ചേര്‍ത്തിളക്കി നന്നായി യോജിപ്പിക്കുക. ഈ മിശ്രിതം മുഖത്ത് പുരട്ടി മൃദുവായി മസാജ് ചെയ്തു കൊടുക്കാം. ശേഷം തണുത്ത വെള്ളത്തില്‍ കഴുകിക്കളയാവുന്നതാണ്.