ഇന്ത്യയിലെ മോട്ടോർസൈക്കിൾ പ്രേമികൾക്ക് സന്തോഷവാർത്ത! ട്രയംഫ് 400 സീരീസിനും കെടിഎം 390 ഡ്യൂക്കിനും 10 വർഷത്തെ സ്റ്റാൻഡേർഡ് വാറന്റി പ്രഖ്യാപിച്ചു. ഈ ആകർഷകമായ ഓഫർ ഈ മാസം ജൂൺ 30 വരെ നടത്തുന്ന വാങ്ങലുകൾക്ക് മാത്രമാണ് ബാധകം. സ്റ്റാൻഡേർഡ് 5 വർഷത്തെ വാറന്റിക്ക് പുറമേ, അധിക 5 വർഷത്തെ എക്സ്റ്റൻഡഡ് വാറന്റി അധിക ചെലവില്ലാതെ ഇതോടെ ലഭിക്കും. ട്രയംഫിന്റെ സ്പീഡ് 400, സ്പീഡ് T4, സ്ക്രാംബ്ലർ 400 X, സ്ക്രാംബ്ലർ 400 XC എന്നിവയ്ക്കും കെടിഎം 390 ഡ്യൂക്കിനും ഈ ഓഫർ ലഭ്യമാണ്.

ktm duke 390

 

വാറന്റി വിശദാംശങ്ങൾ

10 വർഷത്തെ വാറന്റി പ്രോഗ്രാം ട്രയംഫിന്റെ TR സീരീസ് എഞ്ചിനും പ്രധാന ഇലക്ട്രിക്കൽ ഘടകങ്ങളും ഉൾക്കൊള്ളുന്നു. ഈ ഓഫർ ജൂൺ 30-ന് മുമ്പ് വാങ്ങുന്നവർക്ക് ലഭ്യമാകും. ബൈക്ക് വർഷങ്ങളോളം ഉപയോ​ഗിക്കാൻ താല്പര്യപ്പെടുന്നവർക്ക് ഈ വാറന്റി മനസ്സമാധാനം നൽകും. ഇനി വിൽക്കാൻ ഉദേശിക്കുകയാണെങ്കിൽ, ഈ വാറന്റി പുതിയ ഉടമയ്ക്ക് കൈമാറാനും സാധിക്കും, ഇത് ബൈക്കിന്റെ മൂല്യവും വർദ്ധിപ്പിക്കുന്നു.

ബൈക്കുകളുടെ സവിശേഷതകൾ

കെടിഎം 390 ഡ്യൂക്ക്: 2.95–2.97 ലക്ഷം രൂപ (എക്സ്-ഷോറൂം) വിലയിൽ ലഭ്യമാണ്. 399 സിസി, സിംഗിൾ-സിലിണ്ടർ, ലിക്വിഡ്-കൂൾഡ് എഞ്ചിൻ 45.3 bhp കരുത്തും 39 Nm ടോർക്കും ഉത്പാദിപ്പിക്കുന്നു. ആറ് സ്പീഡ് ഗിയർബോക്സും സ്ലിപ്പ് ആൻഡ് അസിസ്റ്റ് ക്ലച്ചും ഇതിന്റെ പ്രത്യേകതയാണ്.

ട്രയംഫ് 400 സീരീസ്: സ്പീഡ് 400, സ്ക്രാംബ്ലർ 400 X, സ്ക്രാംബ്ലർ 400 XC എന്നിവ 398 സിസി, ലിക്വിഡ്-കൂൾഡ്, സിംഗിൾ-സിലിണ്ടർ എഞ്ചിനോടുകൂടിയാണ് വരുന്നത്. ഇത് 39.5 bhp കരുത്തും 37.5 Nm ടോർക്കും നൽകുന്നു. സ്പീഡ് T4-ന് ഒരേ എഞ്ചിനിൽ 30.6 bhp-യും 36 Nm ടോർക്കും ലഭിക്കുന്നു. എല്ലാ മോഡലുകളും 6-സ്പീഡ് ഗിയർബോക്സുമായാണ് വരുന്നത്, എന്നാൽ സ്പീഡ് T4-ൽ സ്ലിപ്പ് ആൻഡ് അസിസ്റ്റ് ക്ലച്ച് ഒഴിവാക്കിയിരിക്കുന്നു.

 

 

ട്രയംഫ് അടുത്തിടെ ഇന്ത്യയിൽ സ്ക്രാംബ്ലർ 400 XC പുറത്തിറക്കി, വില 2.94 ലക്ഷം രൂപ (എക്സ്-ഷോറൂം). ട്യൂബ്‌ലെസ്, ക്രോസ്-സ്‌പോക്ക് വീലുകൾ, ബോഡി-കളർ ഫ്ലൈസ്‌ക്രീൻ, ഫ്രണ്ട് ഫെൻഡർ, പുതിയ നിറങ്ങൾ എന്നിവ ഇതിന്റെ പ്രത്യേകതകളാണ്. 398 സിസി എഞ്ചിൻ 39.5 bhp-യും 37.5 Nm ടോർക്കും ഉത്പാദിപ്പിക്കുന്നു, ആറ് സ്പീഡ് ഗിയർബോക്സുമായി ജോടിയാക്കിയിരിക്കുന്നു.

 

 

ഇന്ത്യയിൽ ട്രയംഫിന്റെയും കെടിഎമ്മിന്റെയും ഉൽപ്പാദനവും വിൽപ്പനയും വിൽപ്പനാനന്തര സേവനവും ബജാജ് ഓട്ടോയാണ് കൈകാര്യം ചെയ്യുന്നത്.