എറണാകുളം: ക്രിസ്ത്യൻ മത വിശ്വാസികളായ പാസ്റ്റർമാർ സംഘടിപ്പിച്ച പ്രാർഥനാ പരിപാടിയിൽ പാകിസ്ഥാൻ പതാക ഉപയോഗിച്ച സംഭവത്തിൽ പൊലിസ് കേസെടുത്തു. എറണാകുളം ഉദയംപേരൂരിൽ രാജ്യങ്ങളുടെ ക്ഷേമത്തിനായി നടത്തിയ പ്രാർഥനയിലാണ് പാക് പതാകയും ഉപയോഗിച്ചത്. ബിജെപി എറണാകുളം ജില്ലാ സെക്രട്ടറി ശ്രീക്കുട്ടൻ നൽകിയ പരാതിയിലാണ് പൊലിസ് കേസെടുത്തത്. മതസ്പർദ്ധയ്‌ക്കും കലാപാഹ്വാനത്തിനുമാണ് കേസെടുത്തിരിക്കുന്നത്. ഇന്ത്യൻ പതാക ശുചിമുറിയുടെ പരിസരത്ത് കൂട്ടിയിട്ട് അപമാനിച്ചെന്നും പരാതിയിൽ പറയുന്നുണ്ട്.

ഉദയംപേരൂർ ജീസസ് ജനറേഷൻ ഓഡിറ്റോറിയത്തിൽ വെച്ചാണ് പ്രാർഥന നടന്നത്. വിവിധ പ്രൊട്ടസ്റ്റൻറ് സഭകളിലെ പാസ്റ്റർമാർ പങ്കെടുത്ത പരിപാടിയുടെ സംഘാടകൻ, പാസ്റ്ററും ഓഡിറ്റോറിയത്തിന്റെ ഉടമയുമായ ദീപു ജേക്കബ് ആയിരുന്നു. ഇയാൾക്കെതിരെയാണ് നിലവിൽ കേസെടുത്തിരിക്കുന്നത്. ഇയാളെ ചോദ്യം ചെയ്ത പൊലിസ് പാക്കിസ്ഥാൻ പതാക കണ്ടുകെട്ടി. വിവിധ രാജ്യങ്ങളുടെ ക്ഷേമത്തിനായി നടത്തിയ പ്രാർഥനകൾക്കിടെ പാകിസ്ഥാൻറെ പതാകയും ഉപയോഗിച്ചതിനാണ് മതസ്പർദ്ധയ്‌ക്കും കലാപാഹ്വാനത്തിനും കേസെടുത്തത്.

ALSO READ: ഫ്രഞ്ച് പതാകയിലെ ആഫ്രിക്കൻ ചോര

എന്നാൽ പാക് പതാക ഉപയോഗിച്ചതിൽ യാതൊരു ദുരുദ്ദ്വേശവുമില്ലെന്നും കഴിഞ്ഞ ഒന്നര വർഷമായി സകല രാജ്യങ്ങൾക്കും വേണ്ടിയുള്ള പ്രാർഥനയിൽ 20 രാജ്യങ്ങളുടെ പതാക ഉപയോഗിക്കാറുണ്ടെന്നും അതിലൊന്ന് മാത്രമാണ് പാക് പതാക എന്നുമാണ് സംഘാടകർ പൊലിസിന്  നൽകിയ മൊഴി. സകല രാജ്യങ്ങൾക്കും സമാധാനവും ക്ഷേമവും ലഭിക്കാനായി അതാത് രാജ്യങ്ങളുടെ പതാകകളിൽ തൊട്ടുള്ള പ്രാർഥനയാണ് നടക്കാറുള്ളത് എന്നും സംഘാടകർ അറിയിച്ചു. ചൈനയിൽ നിന്നാണ് ദീപു ജേക്കബ് പതാക വാങ്ങിയത്.

സമൂഹമാധ്യമങ്ങളിൽ പ്രാർഥനയുടെ ദൃശ്യം പ്രചരിച്ചിരുന്നു. ഇതിൽ പാക് പതാക കണ്ടാണ് ബിജെപി നേതാവ് പൊലിസിന് പരാതി നൽകിയത്. ഇന്ത്യൻ പതാകയോട് സംഘാടകർ അനാദരവ് കാണിച്ചെന്നും പരാതിയിൽ വ്യക്തമാക്കുന്നു. പരിപാടിക്ക് ശേഷം ഇന്ത്യൻ പതാക ശുചിമുറിയുടെ പരിസരത്ത് ഒന്നിച്ച് കൂട്ടിയിട്ടെന്നാണ് പരാതി.