പാലക്കാട്:മണ്ണാർക്കാട് പൊലീസ് സ്റ്റേഷൻ വളപ്പിൽ പ്ലാസ്റ്റിക് മാലിന്യം കത്തിച്ചതിന് നഗരസഭ 5000 രൂപ പിഴ ചുമത്തി. സംഭവം സംബന്ധിച്ച് പൊലീസ് സ്റ്റേഷൻ ഹൗസ് ഓഫീസർക്ക് നഗരസഭ സെക്രട്ടറി എം. സതീഷ്കുമാർ നോട്ടീസ് നൽകി. പതിനഞ്ച് ദിവസത്തിനകം പിഴ അടച്ചില്ലെങ്കിൽ നിയമനടപടി സ്വീകരിക്കുമെന്ന് നോട്ടീസിൽ വ്യക്തമാക്കിയിട്ടുണ്ട്.

തിങ്കളാഴ്ച ലഭിച്ച പരാതിയിലുടെയാണ് പൊലീസ് സ്റ്റേഷൻ വളപ്പിൽ മാലിന്യം കത്തിക്കുന്നതായി നഗരസഭക്ക് വിവരം ലഭിച്ചത്. തുടര്‍ന്ന് നഗരസഭാ ഉദ്യോഗസ്ഥർ സ്ഥലത്തെത്തി പരിശോധന നടത്തി, പരാതിയിൽ സത്യമുണ്ടെന്ന് സ്ഥിരീകരിച്ചു. നേരത്തെയും സമാന രീതിയിൽ മാലിന്യം കത്തിച്ചതായി പൊലീസിന് എതിരെ പരാതി ലഭിച്ചിരുന്നു.

മാലിന്യ സംസ്‌കരണ രീതികളെക്കുറിച്ച് പൊലീസ് സ്റ്റേഷനുകൾക്ക് ഉൾപ്പെടെ വിവിധ സർക്കാർ ഓഫീസുകളിൽ നഗരസഭ ക്ലാസുകൾ എടുത്തിരുന്നു. അതേസമയം, നിയമവിരുദ്ധമായി പ്ലാസ്റ്റിക് കത്തിച്ചത് സംബന്ധിച്ച് പൊലീസ് വിഭാഗത്തോട് നഗരസഭ നേതൃത്വം വിശദീകരണം തേടിയിട്ടുണ്ട്.

ഹരിതകർമ സേനയുടെ സേവനം പ്രയോജനപ്പെടുത്താതെ ഇത്തരം പ്രവർത്തനം നടത്തിയത് ഗുരുതരമായ കുറ്റകൃത്യമാണെന്നും, നഗരസഭ പരിധിയിൽ ഇനിയും ഇത്തരത്തിൽ മാലിന്യം കത്തിച്ചാൽ കർശന നടപടി ഉണ്ടാകുമെന്നും സെക്രട്ടറി വ്യക്തമാക്കി. ഇതിനു മുമ്പ് സിവിൽ സ്റ്റേഷനുമെതിരെ സമാന നടപടി സ്വീകരിച്ചതായും അദ്ദേഹം പറഞ്ഞു.